ގައުމީ ތަރިކަ ހިމާޔަތްކޮށް ރައްކާތެރި ކުރުމަށް މިސަރުކާރުން އިސްކަންދޭނެ
މުލީއާގެ
ރައީސުލްޖުމްހޫރިއްޔާ ދިރިއުޅުއްވާ ރަސްމީ ގެކޮޅު މުލީއާގެ މަރާމާތު ކުރުމުގެ މަސައްކަތް ކުރާނީ އެ އިމާރާތުގެ އަސްލަށް ގެއްލުން ނުވާ ގޮތަށް ކަމަށް ރައީސް އޮފީހުން ބުނެފިއެވެ.
މުލީއާގެ މަރާމާތު ކުރާތީ ބައެއް ރައްޔިތުން ދަނީ އެކަމާއި ގުޅިގެން ކަންބޮޑުވުންފާޅު ކުރަމުންނެވެ. މުލީއާގެއަކީ އާސާރި ބިނާއެއް ކަމަށާއި، އެތަނުގެ އަސްލަށް ބަދަލެއް ގެނެސްގެން ނުވާނެ ކަމަށް އެ ފަރާތްތަކުން ގޮވާލާފައިވެއެވެ.
މިމައްސަލައާ ގުޅިގެން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް އަބްދުﷲ ޚަލީލް ވިދާޅުވީ ދިވެހި ގައުމީ ތަރިކަ ހިމާޔަތްކޮށް ރައްކާތެރި ކުރުމަށް މިސަރުކާރުން އިސްކަންދޭނެ ކަމަށާއި، އަންނަން އޮތް ޖީލުތަކަށް ތަރިކަ ފޯރުކޮށްދިނުމަކީ ރައީސްގެ ވައުދުފުޅެއް ކަމަށެވެ. އެ ތަރިކައިގެ އެންމެ ބޮޑު އެއްބަޔަކީ މިކަހަލަ އާސާރުތަންތަން ކަމަށާއި، އެއާސާރުތަކަށް އުނިކަން ލިބޭ ގޮތަށް އެއްވެސް ކަމެއް ނުކުރާނެ ކަމަށް ފިރުޒުލް ވިދާޅުވިއެވެ.
ފިރުޒުލް ވިދާޅުވީ މަރާމާތުގެ ކަންކަން ކުރިއަށްދާއިރު، އެގެކޮޅުގެ އަސްލަށް ބަދަލެއް އަންނަ އެއްވެސް ކަމެއް ނުހިނގާނެ ކަމަށެވެ. އަދި ވެރިކަން ބަދަލުނުވި ކަމުގައި ވިޔަސް އޮންނަ އުސޫލުން މެއިންޓަނަންސްއަށް ކުރަންޖެހޭ މަސައްކަތްތައް ކުރާ ކަމަށް ފިރުޒުލް ވިދާޅުވިއެވެ.
ރައީސް މުއިއްޒުގެ ދެކަނބަލުން މުލީއާގެއަށް ދިރިއުޅުން ބަދަލުކުރައްވާނީ އެތަން މަރާމާތުކޮށް ނިމުމުންނެވެ. އެމަސައްކަތްތަށް ގާތްގަނޑަކަށް ދެ މަސް ދުވަސް ނަގާނެ ކަމަށް ރައީސް އޮފީހުން ބުނެއެވެ. އަދި މުލީއާގެ މަރާމާތުކޮށް ނިމެންދެން ރައީސް މުއިއްޒުގެ ދެކަނބަލުން ދިރިއުޅުއްވަމުން ގެންދަވާނީ އެމަނިކުފާނުގެ ގެކޮޅު މ. ދިމްޔާތުގައެވެ.
