ޓޮމް އިސްވެ، ބައްސާމްގެ އިތުބާރު ނެތް ކަމުގެ މައްސަލަ ހުށަހެޅުމުގެ މަސައްކަތް ފަށައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ބައްސާމް އަދީލް ޖަލީލުގެ އިތުބާރު ނެތްކަމުގެ މައްސަލަ ހުށަހެޅުމުގެ މަސައްކަތް ފަށައިފި އެވެ.

މާލީ ގޮތުން ބޮޑު މައްސަލަތަކެއް ކުރިމަތިވެ، މިވަގުތު އެފްއޭއެމް އޮތީ ބޮޑު އަނދަވަޅެއްގެ ތެރޭގަ އެވެ. އެފްއޭއެމްގެ މާލީ މައްސަލައާ ގުޅިގެން ފުލުހުން ވަނީ މިދިޔަ އޮކްޓޫބަރު އެ އިދާރާ އަށް ވަދެ، ބަލައި ފާސް ކުރުން ކުރިއަށް ގެންގޮސްފަ އެވެ. އެއަށްފަހު ތަހުގީގަށް ބޭނުންވާ ބައެއް ސާމާނު ފުލުހުން ވަނީ ގެންގޮސްފަ އެވެ. ބައިނަލްއަޤްވާމީ އިދާރާތަކުން އެފްއޭއެމް އަށް ފޮނުވާ ފައިސާ އެ އިދާރާގެ ވެރިންނާއި, އެ އިދާރާގެ ވެރިންނާ ގުޅުން އޮންނަ ފަރާތްތަކުގެ އެކައުންޓަށް ޖަމާކުރާ ކަމަށް ވެސް ތުހުމަތު ކުރެ އެވެ. މައްސަލަ ތަހުގީގު ކުރަނީ އެ ފައިސާ ނަހަމަ ގޮތުގައި ބޭނުން ކުރާކަމުގެ ތުހުމަތަށެވެ. ނަމަވެސް ތުހުމަތުތަކަށް އެފްއޭއެމްއިން އިންކާރު ކުރެ އެވެ.

ދާދިފަހުން ބޭއްވި ނޫސްވެރިންގެ ބައްދަލުވުމެއްގައި ޕްރޮސެކިއުޓަރ ޖެނެރަލް (ޕީޖީ) ހުސެއިން ޝަމީމް ވިދާޅުވީ އެފްއޭއެމްގެ ރައީސް ހިމެނޭ ގޮތަށް އެ އިދާރާގެ ވެރިންގެ މައްޗަށް ދައުވާކުރެވޭނެ ހެކި ލިބިފައިވާ ކަމަށެވެ. އެ ތަހުގީގުގައި އެންމެ އިސް ތުހުމަތު ކުރެވެނީ އެ އިދާރާގެ ރައީސް ބައްސާމް އަދީލް ޖަލީލްގެ މައްޗަށް ކަމަށް ވެސް ޕީޖީ ވިދާޅުވި އެވެ.

ބައްސާމްގެ އިތުބާރު ނެތްކަމުގެ މައްސަލަ ހުށަހެޅުމުގެ މަސައްކަތް ފަށާފައިވާކަން އިއުލާން ކުރީ، އެފްއޭއެމްގެ ކުރީގެ ރައީސް އަދި މިހާރު މަހިބަދޫ ދާއިރާގެ މެމްބަރު އަޙުމަދު ޠާރިޤު (ޓޮމް) އެވެ. އެކަން އިއުލާން ކުރައްވަނުން ޓޮމް އެކްސްގައި ކުރެއްވި ޕޯސްޓެއްގައި ވިދާޅުވީ، ފުޓުބޯޅަ އަށް ކިރިޔާ ވެސް ކުލުނެއް ހުރިނަމަ، ރީތި ގޮތަކީ ބައްސާމް އިސްތިއުފާ ދެއްވުން ކަމަށެވެ. މިދިޔަ އޮކްޓޫބަރު މަހު ޓޮމް ވަނީ ކުރިއަށް އޮތް އެފްއޭއެމްގެ އިންތިޚާބުގައި، އެ އިދާރާގެ ރައީސްކަމަށް ވާދަކުރައްވާނެކަން ވެސް އިއުލާން ކުރައްވައިފަ އެވެ.

ޓޮމް އަކީ ކުރިން ރާއްޖޭގެ ޤައުމީ ފުޓުބޯޅަ ޓީމާއި، ނިއުރޭޑިއަންޓް ސްޕޯޓްސް ކުލަބު އަދި ވެލެންސިއާ ފަދަ ބޮޑެތި ކުލަބުތަކަށް ކުޅެފަައިވާ ހުނަރުވެރި ފޯވާޑެކެވެ. މީގެ އިތުރުން 2008 ވަނަ އަހަރުގެ ސާފް ޗެމްޕިއަންޝިޕްގައި ރާއްޖެ އިން ރަން މެޑަލް ހޯދި ޓީމުގައި ވެސް ޓޮމް ހިމެނެ އެވެ.

ފުޓުބޯޅަ ކުޅުން ހުއްޓާލެއްވުމަށްފަހު، ސިޔާސީ މައިދާނަށް ނިކުންނެވި ނަމަވެސް ޓޮމް އަންނަނީ ކުޅިވަރުގެ އެކި އެކި ކަންކަމުގައި ބައިވެރިވަމުންނެވެ.