ބައްސާމްގެ ދައުރު ނިމެންދެން އަންހެން ފުޓުބޯޅަ ޓީމުގެ ކޯޗަކަށް އާތީ
އަންހެން ޓީމާ ހަވާލުވެގެން ކުރިން ހުރީ ޖަޕާން ކޯޗެއް
އަންހެން ފުޓުބޯލަ ޓީމުގެ ކޯޗު އާތީ (ކ) އަދި އެފްއޭއެމްގެ ރައީސް ބައްސާމް (ވ)
އެފްއޭއެމްގެ ރައީސް ބައްސާމް އަދީލް ޖަލީލުގެ ދައުރު ހަމަވަންދެން އަންހެން ފުޓުބޯޅަ ޓީމުގެ ކޯޗަކަށް ޔޫވީގެ ކުރީގެ ކޯޗު މުހައްމަދު އާތިފް (އާތީ) ހަމަޖައްސައިފި އެވެ.
އެފްއޭއެމް ހައުސްގައި އަންހެން ޓީމުގެ ކޯޗުކަން އާތީއާ ހަވާލުކުރުމަށް ބޭއްވި ރަސްމިއްޔާތުގައި ވާހަކަދައްކަމުން ރައީސް ބައްސާމް ވިދާޅުވީ، އާތީ އަކީ ވަރަށް ތަޖުރިބާ ކާރު މޮޅު ކޯޗެއް ކަމަށާއި، އަނެއްކާވެސް އޭނާ އައިސް ޓީމާ ހަވާލުވުމުން ޓީމަށް އިތުރު ބަދަލުތަކެއް އަންނާނެ ކަމާމެދު ޝައްކު ނުކުރާ ކަމަށެވެ.
އެގޮތުން ބާއްސާމް ވިދާޅުވީ، އާތީއާ އެކު އެފްއޭއެމް އިން ހަދާފައިވަނީ ދިގު މުއްދަތެއްގެ އެއްބަސްވުމެއް ކަމަށާއި، އެފްއޭއެމް މިހާރު އޮތް ދައުރު ނިމެންދެން އޭނާ ޓީމުގެ ކޯޗުކަމުގައި ދެމިހުންނާނެ ކަމަށެވެ.
ރަސްމިއްޔާތުގައި ވާހަކަދައްކަމުން އާތީ ބުނީ ޓީމާ ހަވާލުވިއިރު، ވަރަށް ބޮޑެތި ކުރިއެރުންތައް ޓީމަށް އައިސްފައިވާ ކަމަށާއި، އޭނާގެ ޓާގެޓަކީ އަންހެން ޓީމު ފައިނަލެއްގައި ކުޅުވުން ކަމަށެވެ. އެގޮތުން އޭނާ ބުނީ މިދިޔަ އަހަރު އަންހެން ޓީމު ސެމީފައިނަލް ކުޅެފައިވާ ކަމަށާއި، ދެން ޓީމަށް ކުރަންޖެހިފައިއޮތް ކަމަކީ ފައިނަލަކުން ފުރުސަތު ތަނަވަސްކުރުން ކަމަށެވެ.
ޔޫވީއާއެކު މި ސީޒަނުގައި މާލޭ ލީގާ ކުރިމަތިލި އާތީ ވަނީ ވަކި ހިސާބަކުން ޓީމުގެ ކޯޗުގެ މަގާމުން އިސްތިއުފާ ދީފައެވެ. އެގޮތުން އާތީގެ ބަދަލުގައި ނަޒީހުއާ ވަނީ ޓީމުގެ ކޯޗުކަން ހަވާލުކޮށްފައެވެ.
އަންހެން ގައުމީ ޓީމުގެ ކޯޗަކަށް ކުރިން ހުރީ ޖަޕާން ފުޓުބޯޅަ ފެޑެރޭޝަންގެ އެހީގެ ދަށުން ގެނެސްފައި ހުރި ކޯޗެކެވެ. އޭނާގެ އިރުޝާދުގެ ދަށުން ގައުމީ ޓީމު ވޭތުވެދިޔަ އަހަރު ބޮޑެތި ކާމިޔާބީތައް ހޯދާފައިވާ އިރު، މި އަހަރު ކުރީކޮޅު އެއްބަސްވުން ހަމަވުމުން އޭނާ ވަނީ ފުރައިގެން ގޮސްފައެވެ.
