އެމެރިކާ ޑޮލަރުގެ 100 ޑޮލަރުގު ފޭކު ނޫޓުތަކެއް ދައުރުވަމުންދާތީ ސަމާލުވުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިލްތިމާސްކޮށްފިއެވެ.
އެމްއެމްއޭއިން ބުނި ގޮތުގައި މި ނޫޓުތަކަކީ 1996 ން ފެށިގެން 2016 އާއި ދެމެދުގެ ތާރީހުގެ ތެރޭގައި ޕްރިންޓްކޮށްފައިވާ ނޫޓުތަކެއް ކަމަށެވެ. އަދި އެއީ ހުދު ބޯޑަރު ހިމެނޭ ޔޫއެސް ޑޮލަރުގެ ނޫޓުކަން ވެސް އެ އިދާރާއިން ފާހަގަކުރެއެވެ.
މިހާރު ދައުރު ކުރަމުންދާ ސައްހަ ނޫން ނޫޓުތަކުގައި ބޭނުން ކޮށްފައިވަނީ ސައްހަ ނޫޓާއި ތަފާތު ކަރުދާހެއް ކަމަށާއި ފޭކު ނޫޓު އައްޔަށް ދިއްކުރުމުން ނޫޓުގެ ކަނާތްފަރާތުގައި ފެންނަންހުންނަ ބެންޖަމިން ފްރެންކްލިންގެ ފޮޓޯ ހިމެނޭ ފެންމަރުކާ (ވޯޓަރ މާރކް) ސައްހަ ނޫޓާ ތަފާތު ކަމަށް ވަނީ ބުނެފައެވެ. އަދި އެ ނޫޓު އައްޔަށް ދިއްކުރުމުން ނޫޓުގެ ވައަތްފަރާތުން ފެންނަންހުންނަ “USA 100” ލިޔެފައިވާ ސަލާމަތީ ރޮދިފަށް ނޫޓުގެ ދެފަރާތުން ފެންނަން ނެތްކަމަށް ވެސް އެމްއެމްއޭއިން ބުންޏެވެ.
ފޭކު ނޫޓު އަލްޓްރާ ވައިލެޓް އައްޔަށް ދިއްކުރުމުން ނޫޓުގައި ދިއްލިފައި ހުންނަންޖެހޭ ސަލާމަތީ ރޮދިފަށް ނޫޓުގެ ދެފަރާތުން ދިއްލިފައި ނެހުންނަ ކަމަށާއި އެ ނޫޓު އަލްޓްރާ ވައިލެޓް އައްޔަށް ދިއްކުރުމުން ނޫޓުގެ މޫނުމަތީގައި ރަތް އަދި ނޫކުލައިން ދިއްލިފައި ހުންނަންޖެހޭ ސެކިއުރިޓީ ފައިބަރ ނެތް ކަމަށް ވެސް އެމްއެމްއޭއިން ބުންޏެވެ.
އެ ނޫޓުގެ ކަނާއަތް ފަރާތުން ތިރީގައި ހިމަނާފައިވާ މޫނުމަތީ އަގު ނޫޓު އަރިކުރުމުން ކުލަ ބަދަލު ނުވާ ކަމަށް ވެސް އެމްއެމްއޭއިން ބުންޏެވެ.
ފޭކު ނޫޓޫތަކެއް ދައުރުވާތީ 100 ޔޫއެސް ޑޮލަރުގެ ހުދު ބޯޑަރު ހިމެނޭ ނޫޓު ބަލައިގަތުމުގައި ސަމާލުވުމަށާއި ބަލައިގަނެވޭ ނޫޓުގެ ސައްހަ ކަމާމެދު ޝައްކުކުރެވޭ އެއްވެސް ނޫޓެއް ފެނިއްޖެނަމަ، އެމްއެމްއޭއަށް ގެންގޮސް އެ ނޫޓެއްގެ ސައްހަ ކަން ޔަގީން ކުރުމަށް އެ އިދާރާއިން ވަނީ ބުނެފައެވެ.
