ނޫސްވެރިން މެންޗެސްޓާ ސިޓީ މިނަނީ އެހެން ޓީމުތަކަށްވުރެ ހަރުކަށިކޮށް ކަމަށާއި ހަމަހަމަކަމެއްނެތް ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފިއެވެ.
އޭނާ މިހެން ބުނީ ޕްރެމިއާ ލީގުގައި ޓޭބަލުގެ 18 ވަނާގައިވާ ލުޓޮންއާ ދެކޮޅަށް މިރޭ ކުޅޭ މެޗުގެ ކުރިންނެވެ. މި މެޗަށް ސިޓީ ނުކުންނަނީ 2009ގެ ފަހުން ޖެހިޖެހިގެން ޕްރެމިއާ ލީގުގައި ފަސް މެޗަކުން ކާމިޔާނުވުމުގެ ރެކޯޑް ލިބުނު ނުދިނުމަށް ހިތުނިޔަތް ގަނެގެންނެވެ.
މި މެޗަށް ނުކުންނައިރު ސިޓީ އޮތީ ދުވަހަކު ވެސް ދަށްނުވާވަރަށް ފޯމު ކަޓާފައެވެ. މިދިޔަ ސީޒަނުގައި ޗެމްޕިއަންސް ލީގާއި އެފްއޭކަޕް އަދި އިނގިރޭސި ލީގު ކާމިޔާބުކުރި ޓީމު އޮތީ އެއްވަނާގައިވާ ލިވަޕޫލަށްވުރެ ހަތް ޕޮއިންޓް ފަހަތުގައެވެ. އަދި ޕްރެމިއާ ލީގު އެއްވެސް ޓީމަކަށް ޖެހިޖެހިގެން ހަތަރު އަހަރަކު ނުލިބޭކަން ވެސް ގާޑިއޯލާ ފާހަގަކުރެއެވެ.
އަހަރުމެން ކުރެން ޑިމާންޓްކުރާ ވަރަކަށް އެހެން ޓީމުތަކުގެ ކިބައިން ނޫސްވެރިން ޑިމާންޑެއް ނުކުރޭ. އަހަރުމެން ބަލިވެއްޖެނަމަ އެއީ ބޮޑު ކާރިސާއެއް. އެހެން ޓީމެއް، އާސެނަލް، ލިވަޕޫލް، މެންޗެސްޓާ ޔުނައިޓެޑް، ޓޮޓެނަހަމް ނުވަތަ ޗެލްސީ ބަލިވުމަކީ އާދައިގެ ކަމެއްގެ ގޮތުގައި ހަދަނީ. މިކަމުގައި އިންސާފެއްނެތްގާޑިއޯލާ
ދުނިޔޭގެ އެންމެ މޮޅު ކޯޗުކަމުގައި ގިނަ ބަޔަލު އިއްތިފާގުވާ ކޯޗު ބުނީ އެހެން ޓީމަކަށް ޕްރެމިއާ ލީގު ކާމިޔާބުވުމަށް ބަލިވާން ޖެހެނީ ވެސް އެންމެ ޓީމެއް ކަމަށާއި އެއީ އޭނާގެ ޓީމު ކަމަށެވެ. އަދި ސިޓީ ބަލިވެއްޖެނަމަ އެހެން ހުރިހާ ޓީމަކުން އެކަމާ އުފާކުރާ ކަމަށެވެ.
ކޮންމެ ޓީމަކަށް ވެސް ދަތި ވަގުތުތައް އަންނާނެ. ސިޓީ އަށް މިއީ ފޯމު ދަށް ދުވަސްވަރެއް. ފުޓްބޯޅައިގައި މިފަދަ ކަންކަން ދިމާވާނެ. އަބަދު އެއްބަޔަކު މޮޅުވަމުން ނުދާނެ. ނަތީޖާ ތަފާތުވާ ދުވަސްވަރު އަންނާނެގާޑިއޯލާ
އޭނާ އަދި ބުނީ ސިޓީ އަކީ ދުނިޔޭގެ އެންމެ މޮޅު ޓީމުކަމަށް އެއްބަޔަކު ދެކޭ ކަމަށާއި ބަލިވުމަކީ ނެތް އެއްޗެއް ކަމަށް ހީވާ ބަޔަކު ވެސް އުޅޭ ކަަމަށެވެ.
