ސްޕެއިންގެ ބާސެލޯނާ އަށް ކުޅެމުން އަންނަ އުރުގުއޭގެ ޑިފެންޑަރު ރޮނާލްޑް އަރައުހޯގެ ވިސްނުން ހުރީ ހަމައެކަނި ބާސެލޯނާ އަށް ކަމަށް މީޑިއާ ރިޕޯޓުތައް ބުނެފިއެވެ.
އުމުރުން 24 އަހަރުގެ ކުޅުންތެރިޔާ ބާސެލޯނާ އަށް ބަދަލުވީ 2018 ވަނަ އަހަރުއެވެ. އެ ފަހަރު އެ ކުލަބާއެކު އޭނާ ސޮއި ކުރީ ފަސް އަހަރު ދުވަހުގެ އެއްބަސްވުމެއްގައެވެ. އޭގެ ފަހުން މިދިޔަ އަހަރު އޭނާ ވަނީ އެ ކުލަބުގެ އެއްބަސްވުން އައު ކޮށްފައެވެ. ބާސެލޯނާ އާއެކު އަރައުހޯ މިހާރު ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އެހެން ނަމަވެސް، ބާސެލޯނާ އިން އޭގެ ކުރިން އަރައުހޯގެ އެއްބަސްވުން އައު ކުރުމަށް ހުށަހަޅާނެ ކަމަށް މީޑިއާ ތަކުން ވަނީ ބުނެފައެވެ.
ސްޕެއިންގެ ބައެއް މީޑިއާ ތަކުގައި ބުނެފައިވާ ގޮތުން އަރައުހޯގެ ވިސްނުން ހުރީ ހަމައެކަނި ބާސެލޯނާ އަށެވެ. އެހެން އެއްވެސް ކުލަބަކަށް ބަދަލުވާން އޭނާ ބޭނުން ނުވާ ކަމަށް ވެސް ވަނީ ބުނެފަ އެވެ. އަނެއްކޮޅުން، ބާސެލޯނާ އިން އިތުރަށް އެއްބަސްވުން އައު ކުރުމަށް ހުށަހަޅައިފި ނަމަ، އަރައުހޯ އެކަން ޤަބޫލު ކުރާނެ ކަމަށް ވެސް ވަނީ ބުނެފައެވެ. އަރަައުހޯ ހޯދުމަށް އެންމެ ބޮޑަށް މަސައްކަތް ކުރަމުން އަންނަ އެއް ކުލަބު ކަމަށް މީޑިއާ ތަކުން ބުނަނީ، ޖަރުމަނުގެ ޗެމްޕިއަން ބަޔާން މިއުނިކްއެވެ. އެ ކުލަބުން އަރައުހޯ ހޯދުމަށް މަސައްކަތް ކުރަނީ، އެ ޓީމުގެ ކޯޗު ތޯމަސް ޓުޗެލް ބޭނުންވެގެންނެވެ. އެކަމަށް ޓުޗެލް އިންތިހާ އަށް ބާރުއަޅާ ކަމަށް ވެސް ބުނެފައިވެއެވެ.
ނަމަވެސް، އަރައުހޯ ދޫކޮށްލަން ބާސެލޯނާ އިން ބޭނުންނުވާކަމަށް ބުނެފައިވެއެވެ. ބާސެލޯނާގެ ކޯޗު ޒަވީ ހެނާންޑޭޒް ދެކޭ ގޮތުގައި އަރައުހޯ އަކީ އެ ޓީމަށް ވަރަށް މުހިންމު ކުޅުންތެރިޔެކެވެ. އަރައުހޯ ވަނީ މިހާތަނަށް ބާސެލޯނާ އަށް ކުޅެދިން 126 މެޗުން އަށް ލަނޑު ޖަހައިފައެވެ. އެ ޓީމާއެކު އޭނާ ވަނީ ތިން ތަށި ކާމިޔާބު ކޮށްފައެވެ. އޭގެ ތެރޭގައި ސްޕެނިޝް ލީގު، ކޮޕާ ޑެލް ރޭ އަދި ސްޕެނިޝް ސުޕަ ކަޕް ހިމެނެއެވެ.
