ޣައްޒާގައި އިސްރާއީލުން ހިންގަމުން އަންނަ ގަތުލުއާންމު ހުއްޓުވުމަށް އދ.ގެ ސަލާމަތީ މަޖިލީހަށް ހުށަހެޅި ގަރާރު އެމެރިކާއިން ވީޓޯކޮށްފިއެވެ.

އޮކްޓޯބަރ މަހުގެ 7 ވަނަ ދުވަހުން ފެށިގެން މެދުކެނޑުމެއްނެތި އިސްރާއީލުން އަންނަނީ ޣައްޒާއަށް ހަމަލާދެމުންނެވެ. ހަމަލާ ބަދަލުކުރުން ހުއްޓާލާފައި އޮތް 7 ދުވަސް ފިޔަވައި އިސްރާއީލުން އަންނަނީ ޣައްޒާގައި އިންސާނިއްޔަތާ ޚިލާފު އެތައް އަމަލެއް ހިންގަމުންނެވެ. މިއިން އެއްވެސް ކަމެއް ހުއްޓުވުމުގެ އެއްވެސް ބާރެއް އެއްވެސް ފަރާތަކަށް ލިބިފައި ނުވާ މައިގަނޑު ސަބަބަކީ، އެމެރިކާއިން އިސްރާއީލަށް ދެމުން އަންނަ ހިފެހެއްޓުމެއް ނެތް ތާއީދެވެ.

ވަގުތުން ހަމަލާތައް ހުއްޓާލައި އިންސާނީ އެހީތެރިކަން ޣައްޒާއަށް ފޯރުކޮށްދިނުމަށް ގޮވާލައި އދ.ގެ ސަލާމަތީ މަޖިލީހަށް ގަރާރު ހުށަހެޅީ ޔުނައިޓެޑް އަރަބް އެމިރޭޓްސް (ޔޫއޭއީ)އެވެ. މި ގަރާރަށް ސަލާމަތީ މަޖިލީހުގެ 13 މެމްބަރު ގައުމުން ތާއީދުކުރިއިރު ވަކި ކޮޅަކަށް ވޯޓު ނުދެނީ އިނގިރޭސިވިލާތެވެ. އަދި އެމެރިކާއަށް ލިބިފައިވާ ވީޓޯކުރުމުގެ ބާރާއެކު ގަރާރު ވީޓޯ ކުރުމުން، މި ގަރާރު ފާހެއް ނުވެއެވެ.

ގަރާރު ވީޓޯކުރަމުން އދ.ށް ކަނޑައަޅާފައި ހުންނަ އެމެރިކާގެ ޑެޕިއުޓީ އެމްބެސެޑަރ ރޮބަރޓް ވުޑް ބުނީ، އެމެރިކާއިން ފަލަސްތީނާއި އިސްރާއީލަށް ސުލްހަ ގެނައުމަށް ތާއީދުކުރާކަމަށާއި ނަމަވެސް ހަމަލާދިނުން ވަގުތުން ހުއްޓާލުމަށް ތާއީދުނުކުރާކަމަށެވެ. އޭގެ ސަބަބެއްކަމަށް ރޮބަރޓް ވުޑް ބުނީ، ހަމަލާތައް ހުއްޓާލައިފިނަމަ ހަމާސްއަށް އަނެއްކާވެސް އިތުރު ހަނގުރާމައެއް ކުރުމުގެ ފުރުސަތު ލިބިގެންދާނެކަމަށާއި، ފަލަސްތީނުގެ ބިމުގައި އިސްރާއީލާއި ފަލަސްތީނަށް ވަކި ދައުލަތެއް ގާއިމުކުރުމަށް ހަމާސް ބޭނުންނުވާކަމަށެވެ.

އިސްރާއީލާއި އެމެރިކާއިން ގަބޫލުކުރާ ގޮތުގައި ޣައްޒާއަށް ދޭ ހަމަލާތައް ހުއްޓާލައިފިނަމަ، އެކަމުގެ ސަބަބުން ފައިދާވާނީ ހަމާސްއަށެވެ. އެމެރިކާއިން ތާއީދުކުރަނީ ހަމަލާ ދިނުން ވަގުތީ ގޮތުން ހުއްޓާލައި، އާންމުން ސަލާމަތްކޮށް، އޮކްޓޯބަރ މަހުގެ 7 ވަނަ ދުވަހު ހަމާސްއިން ގެންދިޔަ އަސީރުން މިނިވަންކުރުމަށެވެ. ނަމަވެސް މިހާތަނަށް އިސްރާއީލުން ދެމުންދިޔަ ހަމަލާތަކުގައި މަރުވި އާންމުންގެ އަދަދު ވަނީ އިންތިހާއަށް މަތިވެފައެވެ.

އިސްރާއީލުން ޣައްޒާއަށް ދެމުންދާ ހަމަލާތަކުގައި ފުރާނަ ގެއްލިގެންދިޔަ މީހުންގެ އަދަދު ވަނީ 17،000ށްވުރެ މައްޗަށް އަރާފައެވެ. މީގެތެރޭގައި ގިނައީ އަންހެނުންނާއި ކުޑަކުދިންނެވެ. އަނެއްކޮޅުން 2.3 މިލިއަން މީހުން ދިރިއުޅޭ ޣައްޒާގެ 80 އިންސައްތަ މީހުންގެ ގެދޮރު ވަނީ ގެއްލިފައެވެ. އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް ވިދާޅުވީ ޣައްޒާގެ އާންމުންނަށް އެއްވެސް ރައްކާތެރިކަމެއް ނެތްކަމަށެވެ. ޣައްޒާގެ އެއްވެސް ތަނެއް އާންމުންނަށް އަމާން ތަނަކަށް ނުވާއިރު، އިސްރާއީލުން އަންނަނީ މުޅި ޣައްޒާއަށް އަމާޒުކޮށް ހަމަލާދެމުންނެވެ.