ރާއްޖެއާއި އިންޑިޔާގެ މެދުގައި އޮންނަ ދާއިމީ ގުޅުން އިތުރަށް ބަދަހިކުރުމަށް، ދެ ގައުމުގެ އިސް ބޭފުޅުން ހިމެނޭ "ކޯ ގްރޫޕެއް" އެކުލަވާލަން ރައީސް މުއިއްޒު އަދި އިންޑިޔާގެ ބޮޑު ވަޒީރު ނަރެންދުރަ މޯދީ ނިންމެވީ ކޮޕް-28 ސަމިޓުގެ ހަވާސާގެ ތެރޭގައެވެ.

އެގޮތުން އެކަމާ ގުޅޭގޮތުން ވެލާނާ އިންޓަަނޭޝަނަލް އެއާޕޯޓުގައި އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ، އެ ކޮމިޓީ ނުވަތަ ގްރޫޕުގެ މައިގަނޑު މަޝްވަރާތައް ބިނާވަނީ އިގްތިސާދީ ކަންކަމުގެ މައްޗަށް އެކަނިތޯއާއި އެ ގްރޫޕުގައި، އިންޑިޔާގައި ތިބި ރާއްޖޭގެ ސިފައިންނާ ގުޅޭ މަޝްވަރާތައް ކުރިއަށް ނުދާނެތޯ ސުވާލުކޮށްފައެވެ.

އެގޮތުން އެ ކޮމިޓީގައި އިންޑިޔާ ސިފައިންގެ މައްސަލައިގެ މަޝްވަރާ ނުކުރާނެ ކަމަށް ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހީމް ޚަލީލް ވިދާޅުވިކަމަށް ބުނެ ނޫސްވެރިޔާ ސުވާލު ދެންނެވުމުން ރައީސް ވަނީ އެކަން ދޮގުކުރައްވާފައެވެ.

އެގޮތުން ރައީސް ވިދާޅުވީ ރައީސް އޮފީހަކުން އެ މައުލޫމާތެއް ނުދޭނެ ކަމަށާއި، އެމަނިކުފާނު ވިދާޅުވިގޮތަށް، އެ ކޮމިޓީތެރޭގައި ވެސް އިންޑިޔާ ސިފައިންގެ މައްސަލަގެ މަޝްވަރާތައްވެސް ކުރިއަށްދާނެ ކަމަށެވެ.

ރައީސް އިތުރަށް ވިދާޅުވީ އެފަދަ ކޮމިޓީއެއް އެކުލަވާލެއްވުމަށް ހުށަހެޅުއްވީވެސް އެމަނިކުފާނު ކަމަށާއި، އެކަން ހުށަހެޅުއްވުމާއެކު މޯދީ އެކަން ގަބޫލުކުރެއްވިކަމަށާއި، އެ ބައްދަލުވުމުގައި ފޮރިން މިނިސްޓަރުގެ އިތުރުން ރައީސް އޮފީހުގެ މިނިސްޓަރުންވެސް ތިއްބެވި ކަމަށެވެ.

"ރައީސް އޮފީހަކުން ނުދެއްވާނެ ތި މައުލޫމާތެއް. އަޅުގަނޑު މި ދަންނަވަނީ ތެދު މައުލޫމާތު," ރައީސް މުއިއްޒު ވިދާޅުވިއެވެ.

މިއާއެކު، އެ މައުލޫމާތު ރައީސް އޮފީހުގެ ފަރާތުން ދެއްވީ ކޮމިއުނިކޭޝަންސް މިނިސްޓަރު އިބްރާހީމް ޚަލީލް ކަމަށް ނޫސްވެރިޔާ ދެންނެވުމުން، އެ މައުލޫމާތު ރަނގަޅު ކުރައްވާނެ ކަމަށް ރައީސް ވަނީ ވިދާޅުވެފައެވެ.

ރައީސް ވިދާޅުވިގޮތުންނަމަ، އެ ކޮމިޓީގައި އިގްތިސާދީ މަޝްވަރާތަކާއި، ބުރިޖުފަދަ އުމްރާނީ މަޝްރޫއުތަކުގެ މަޝްވަރާގެ އިތުރުން، އިންޑިޔާ ސިފައިންގެ މައްސަލައިގެ މަޝްވަރާތައް ވެސް ކުރެވޭނެއެވެ. އެގޮތުން އެ ކޮމިޓީގެ ސަބަބުން ދެގައުމުގެ ދެމެދުގައި ކަންކަން ނިންމުމުގައި ފަސޭހަ ވެގެންދާނެއެވެ.

މި ކޮމިޓީއާ ގުޅޭގޮތުން ރައީސް އޮފީހުން ނެރުނު މައުލޫމާތުތަކުން އެނގޭގޮތުން، ރާއްޖެއާއި އިންޑިޔާގެ މެދުގައި "ކޯ ގްރޫޕެއް" އެކުލަވާލަން ނިންމީ، ރާއްޖެއާ އިންޑިޔާއާ ދެމެދު އޮންނަ ދާއިމީ ގުޅުން އިތުރަށް ބަދަހިކުރުމަށެވެ.