ޣައްޒާގައި އާންމުން މެރުން ހުއްޓާލުމަށް ބެލްޖިއަމްގެ ބޮޑުވަޒީރު އެދިވަޑައިގެންފި

ޣައްޒާގައި އާންމުން މެރުން ހުއްޓާލުމަށް ބެލްޖިއަމްގެ ބޮޑުވަޒީރު އިސްރާއީލުގެ ކިބައިން އެދިވަޑައިގެންފި އެވެ.

ކޮޕް 28 ކްލައިމެޓް ކޮންފަރެންސްގައި ވާހަކަ ދައްކަވަމުން ބެލްޖިއަމްގެ ބޮޑުވަޒީރު އެލެގްޒެންޑާ ޑި ކްރޫ ވިދާޅުވީ ވަގުތީ ގޮތުން ހަނގުރާމަ ހުއްޓާލާފައި އޮތުމަށްފަހު އަނެއްކާވެސް ހަމަލާތައް ދޭން ފެށުމާއި ގުޅިގެން ޣައްޒާގައި އާންމުން މެރުން ހުއްޓާލުމަށް އިސްރާއީލުގެ ރައީސް އައިޒަކް ހަރްޒޯގްގެ ކިބައިން އަމިއްލަފުޅަށް އެދިވަޑައިގެންނެވި ކަމަށެވެ.

ޑި ކްރޫ ވިދާޅުވީ މިސްރު މެދުވެރިވެގެން ވެފައިވީ އެއްބަސްވުން ހަފުތާއެއްހާ ދުވަސް ވަންދެން ދެމިއޮތުމުން ވަރަށް ބޮޑަށް އުންމީދު އާވެގެން ދިޔަކަމަށާއި، ނަމަވެސް އަލުން އަނެއްކާ ހަނގުރާމަ ފެށުމުގެ ސަބަބުން ވަރަށްބޮޑަށް ކަންބޮޑުވެ ވަޑައިގަންނަވާ ކަމަށެވެ.

ބޮމުގެ ހަމަލާތައް މެދުކަނޑާލި އިރު ގައިދީން ބަދަލުކުރުން ފަދަ އިތުރު ކާމިޔާބީތަކަށް ތައުރީފު ކުރައްވަމުން ޑި ކްރޫ ވަނީ އަލުން ހަމަލާތައް ފެށުމުން ބޮޑެތި އެހީތައް ޣައްޒާއަށް ފޯރުކޮށްދިނުމަށް ހުރަސް އެޅިފައިވާ ކަމަށްވިދާޅުވެ، ހިތާމަ ކުރައްވާ ކަމަށް ވިދާޅުވެފަ އެވެ.

ޑި ކްރޫ ވިދާޅުވީ އުއްމީދުގެ މަންޒަރުތަކެއް ފެނުނު ނަމަވެސް ހަމަނުޖެހުންތައް އަލުން ފެށުމަކީ ހިތާމަހުރި ކަމެއް ކަމަށެވެ.

ޣައްޒާގެ އުމްރާނީ ވަސީލަތްތަކާއި ސަޕްލައިތައް މިހާރުވެސް ހުއްޓުމަކަށް އައިސްފައިވާއިރު، ބެލްޖިއަމުން ވަނީ އިސްރާއީލަށް އަލުން ހަނގުރާމައިގެ ތެރެއަށް ނުވަނުމަށް ނުވަތަ އިންސާނީ ކާރިސާގެ ނުރައްކާ ކުރިމަތި ނުކުރުމަށް ގޮވާލާފައެވެ.