ކެޕާ އަލުން ފަރިތަކުރަން ފަށައިފި

އަނިޔާގެ ސަބަބުން ކުޅުމާ ދުރުގައި ދުވަސްކޮޅަކު ހުރުމަށް ފަހު ރެއާލް މެޑްރިޑްގެ ކީޕަރު ކެޕާ އަރިޒަބަލަގާ ފަރިތަކުރަން ފަށައިފި އެވެ.

ޗެލްސީން ލޯނު އުސޫލުން ގެނައި ކީޕަރު ރަނގަޅު ކުޅުމެއް ދައްކަމުން ދަނިކޮށް، އަނިޔާވެ ކުޅުމާ ދުރަށް ދިޔައީ މިމަހުގެ ފަސް ވަނަ ދުވަހު އެވެ. ނަމަވެސް އޭނާގެ އަނިޔާ ރަނގަޅުވުމުން އަންނަ ހޮނިހިރު ދުވަހު ސްޕެނިޝް ލީގުގައި ގްރަނާޑާއާ ދެކޮޅަށް ރެއާލް މެޑްރިޑުގެ ގޯލު ބަލަހައްޓާނީ އޭނާ ކަމަށް ސްޕޭނުގެ ނޫސްތަކުން ބުނެ އެވެ.

ރެއާލްގެ އެއްވަނަ ކީޕަރު ބެލްޖިއަމްގެ ތިބައޫ ކޯޓުއާ އަށް ޕްރީ ސީޒަނުގައި އަނިޔާވުމުން އެތަން ފޫބައްދަން ގެނައި ކެޕާ ނެތުމުން މިހާތަނަށް ގޯލު ބެލެހެއްޓީ ޒުވާން ކީޕަރު އަންދްރޭ ލުނިން އެވެ.

ކެޕާ މިހާތަނަށް ކުޅުނު 12 މެޗުގައި އޭނާ ކޮޅަށް ވަނީ ނުވަ ގޯލެވެ. އޭނާގެ ކޮންޓްރެކްޓް ޗެލްސީގައި 2025އާ ހަމައަށް އޮތް ނަމަވެސް އޭނާ މިހާރު ބޭނުންވަނީ ރެއާލް މެޑްރިޑުގައި ހުރުމަށެވެ. ނަމަވެސް އޭނާ ވިއްކަން ޗެލްސީން ކިޔާ 18 މިލިއަން ޑޮލަރަކީ ރެއާލް މެޑްރިޑުން ހޭދަކުރަން ބޭނުންވާ ވަރަށްވުރެ ބޮޑު އަގެކެވެ. މިހެންވެ ކެޕާގެ ކުރިމަގާމެދު އަދި ވަކި ގޮތެއް ނުނިމެ އެވެ.