ލޯނު އެއްބަސްވުމަށްފަހު ވެސް ކެޕާ ބޭނުންވަނީ ރެއާލްގައި މަޑުކުރަން

މުސްތަޤުބަލުގައި ވެސް ބޭނުންވަނީ ރެއާލް މެޑްރިޑުގައި މަޑު ކުރަން ކަމަށް އެ ޓީމަށް ކުޅެމުން އަންނަ ސްޕެއިންގެ ގޯލް ކީޕަރު ކެޕާ އަރިއްޒަބަލާގާ ބުނެފި އެވެ.

ޗެލްސީގައި ހުރުމަށްފަހު އުމުރުން 29 އަހަރުގެ ކުޅުންތެރިޔާ ރެއާލަށް ބަދަލުވީ ލޯނު އެއްބަސްވުމެއްގެ ދަށުންނެވެ. އެއީ އެ ޓީމުގެ އެއް ނަންބަރު ގޯލް ކީޕަރު، ބެލްޖިއަމްގެ ތިބައޫ ކޯޓުއާ އަށް އަނިޔާވެ ކުޅުމާ ދުރަށް ދާން ޖެހުމުގެ ސަބަބުންނެވެ. ރެއާލާއެކު ކެޕާ ސޮއި ކޮށްފައި ވަނީ އެއް އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު އަންނަ އަހަރުގެ ޖޫން މަހުގެ ނިޔަލަށް ހަމަވާނެ އެވެ. ކެޕާ ރެއާލަށް ބަދަލުވީއިރު، ދާއިމީ ގޮތެއްގައި އޭނާ ހޯދޭނެ މާއްދާ އެއްބަސްވުމުގައި ހިމަނައިފައެއް ނުވެ އެވެ. އެހެންކަމުން އިތުރަށް އޭނާ އެ ކުލަބުގައި ބަހައްޓަން ރެއާލުން ބޭނުންވާނަމަ، ޗެލްސީ އާއެކު އިތުރު މަޝްވަރާތައް ކުރިއަށް ގެންދަން ޖެހޭނެ އެވެ.

ސްޕެއިންގެ މީޑިއާ އަކަށް ދިން އިންޓަވިޔުއެއްގައި ކެޕާ ބުނީ، މުސްތަޤުބަލުގައި ވެސް އޭނާ ބޭނުންވަނީ ރެއާލްގައި މަޑު ކުރަން ކަމަށެވެ. ރެއާލަށް ކުޅުމުގެ ފުރުސަތު ލިބުމުން އެކަން ދޫކޮށް، އެ ކުލަބަށް ކުޅެން ބޭނުންނުވާނީ ކާކުތޯ އަހައި ކެޕާ ވަނީ ސުވާލެއް ވެސް ކުރިމަތިކޮށްފަ އެވެ. ރެއާލްގައި މިހާތަނަށް ދައްކަމުން އައި ކުޅުމާ ގުޅޭ ގޮތުން ސުވާލު ކުރުމުން ކެޕާ ބުނީ، އެ ކުލަބުގައި އޭނާ ހުރީ ހިތްހަމަ ޖެހިގެން، އުފަލުން ކަމަށެވެ. ރެއާލާއެކު ކާމިޔާބު މަސައްކަތްތަކެއް ކުރެވިދާނެކަން ފާހަގަކޮށް ކެޕާ ބުނީ، ރެއާލަށް ބަދަލުވި ފަހުން ވެސް އެތައް ކަމެއް އޭނާ އަށް ރަނގަޅު ކުރެވިއްޖެ ކަމަށެވެ.

ރެއާލަށް ބަދަލުވެ ކެޕާ ވަނީ މިހާތަނަށް ނުވަ މެޗެއްގައި އެ ޓީމުގެ ގޯލު ބަލަހައްޓައިފަ އެވެ. ރެއާލަށް ބަދަލުވެ ފުރަތަމަ ކޮޅު، ކެޕާގެ ފަރާތުން ގޯސްތަކެއް ފެނުނު ނަމަވެސް، ރެއާލްގެ ކޯޗު ކާލޯ އަންޗެލޮޓީ ވަނީ ކެޕާ ދިފާއު ކޮށްފަ އެވެ. އަންޗެލޮޓީ ބުނު ގޮތުގައި. އޭނާގެ ފުރިހަމަ އިތުބާރު ކެޕާ އަށް އޮތް ކަމަށެވެ. ކެޕާ އަކީ ފާހަގަކޮށްލެވޭ މޮޅު ކީޕަރެއް ކަމަަށާއި، ދުވަސްތައް ފާއިތުވަމުން އަންނަ ވަރަކަށް އޭނާ ޓީމަށް ހޭނޭނެކަމަށް އަންޗެލޮޓީ ބުންޏެވެ. އަންޗެލޮޓީ ދެކޭ ގޮތުގައި ކެޕާގެ ކެރިއަރުގައި މިހާތަނަށް އޭނާ އަންނަނީ އެއީ މޮޅު ކީޕަރެއްކަން ސާބިތު ކޮށްދެމުންނެވެ.