ރެއާލް މެޑްރިޑަށް ލޯނު އުސޫލުން ކުޅެމުން އަންނަ ގޯލްކީޕަރު, ކެޕާ އަރިޒަބަލަގާ އެކުލަބުގައި ބަހައްޓަން ރެއާލްއިން ޝައުގުވެރިކަން ފާޅުކޮށްފިއެވެ.
ޗެލްސީން، ދުނިޔޭގެ ރެކޯޑް އަގެއް ކަމަށްވާ 72 މިލިއަން ޕައުންޑް ދީފައި މީގެ ފަސް އަހަރުކުރިން ގަތް ކީޕަރު ރެއާލްއަށް ގެނައީ މި ސީޒަން ފެށުނުތަނާއެވެ. އެއީ އެއްވަނަ ކީޕަރު ބެލްޖިއަމްގެ ތިބައޫ ކޯޓޫއާއަށް އަނިޔާވެ، ދިގު މުއްދަތަކަށް ކުޅުމާ ދުރަށް ދާންޖެހުމުންނެވެ.
ޗެލްސީގައި މާ އެދެވޭ ކުޅުމެއް ނުދެއްކުނަސް ކެޕާ އަންނަނީ ރެއާލްގައި ރަނގަޅު ކުޅުމެއް ދައްކަމުންނެވެ. އަދި ރެއާލްގައި އިތުރަށް ހުންނަން އޭނާ ވަނީ ޝައުގުވެރިކަން ފާޅުކޮށްފައެވެ.
އެއް ފެންވަރެއްގެ މޮޅު، އަދި ތަޖުރިބާކާރު ދެ ކީޕަރުން ބޭތިއްބުމަށް ރެއާލްއިން މިހާރު ވަނީ ކެޕާ އެކުލަބަށް ދާއިމީކޮށް ގަތުމަށް ޗެލްސީއާއެކު މަޝްވަރާތައް ފަށާފައެވެ. ސަބަބަކީ އޭނާއަކީ ސްޕޭނުގެ ރައްޔިތަކަށްވެސް ވާތީއެވެ. ނަމަވެސް ރެއާލްއިން އޭނާ އަނބުރާ ޗެލްސީއަށް ފޮނުވާނުލާނީ، 17 މިލިއަން ޕައުންޑަށްވުރެ ބޮޑު ނޫން އަގަކަށް ކެޕާ ވިއްކާލަން އެކުލަބުން އެއްބަސްވާނަމަ ކަމަށް ސްޕޭނުގެ ނޫސްތަކުން ދަނީ ބުނަމުންނެވެ.
