"ކަންތައްތައް ކުރަން ބޭނުންވާ މީހަކު ހޯދާނެ ކުރާނެ އެއްހާސް ގޮތް، ކަންތައްތައް ކުރަން ބޭނުންނުވާ މީހަކު ހޯދާނެ ނުކުރާނެ އެއްހާސް ގޮތްވެސް"
މާލެއަކީ ރައްޔިތުންނަށް ދިިރިއުޅެން ދަތި ތަނެއް
މާލެސީޓީގެ މޭޔަރުކަމަށް ކުރިމަތިލުމަށް އެމްޑީޕީ ޕްރައިމަރީގައި ފޯމް ހުށަހަޅުއްވަނީ
ކަންތައްތައް ކުރަން ބޭނުންވާ މީހަކު ކުރާނެ އެއްހާސް ގޮތް ހޯދާނެކަމަށާއި، ކަންތައްތައް ކުރަން ބޭނުންނުވާ މީހަކު ނުކުރާނެ އެއްހާސް ގޮތް ހޯދާނެ ކަމަށް އެމްޓީސީސީގެ ކުރީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް މިފަދައިން ވިދާޅުވީ މާލެސިޓީގެ މޭޔަރު ކަމަށް ކުރިމަތިލުމަށް އެމްޑީޕީ ޕްރައިމަރީގައި ފޯމް ހުށަހަޅުއްވަމުންނެވެ. ބުރާސްފަތި ދުވަހު އެމްޑީޕީ އޮފީހުގައި އޮތް ހަރަކާތުގައި، އާޒިމްގެ ފޯމާ ހަވާލުވެވަޑައިގެންނެވީ އެމްޑީޕީގެ ޗެއާޕަރސަން ފައްޔާޒު އިސްމާއީލެވެ.
ފޯމް ހުށަހެޅުއްވުމަށްފަހު ނޫސްވެރިންނާ ވާހަކަދައްކަވަމުން އާޒިމް ވިދާޅުވީ، އެބޭފުޅާގެ މިޒާޖަކީ ކަމެއް ކުރަން ބޭނުންފުޅުވާނަމަ، ކުރާނެ އެއްހާސް ގޮތް ހޯއްދަވައިގެން އެކަމެއް ކުރެއްވުން ކަމަށެވެ. ކޮންމެ ކަމަކަށްވެސް ހައްލު އޮންނަކަމަށާއި، ކަމެއް ކުރަން ބޭނުންވާނަމަ އެމީހަކަށް އެކަމެއް ކުރެވޭނެކަމަށެވެ. އަދި ކިތަންމެ ދަތިކަމެއް ނަމަވެސް އެކަމަށް ހައްލު އޮންނާނެ ކަމަށް އާޒިމް ވިދާޅުވިއެވެ.
މާލެއަކީ ރައްޔިތުންނަށް ދިިރިއުޅެން ދަތި ތަނަކަށް ވެފައިވާކަމަށްވެސް ވިދާޅުވިއެވެ. އެގޮތުން މަގުތަކުގެ މައްސަލައާއި ޕާކުތައް އަޅައިނުލާ ދޫކޮށްލެވިފައި އޮތުމާއި، ކުނީގެ މައްސަލަތަކާއި، ކަނޑު އުޅަނދުފަހަރު ލެފުމަށާއި، އެއްގަމު އުޅަނދުފަހަރު ޕާކުކުރުމަށް ހުރި ދަތިތައް އާޒިމް ފާހަގަކުރެއްވިއެވެ. ރައްޔިތުންނަށް އެހެން މާލެއެއް ހޯއްދަވައިދެއްވާނެ ކަމަށްވެސް އާޒިމް ވިދާޅުވިއެވެ.
އާޒިމް އިތުރަށް ވިދާޅުވީ، މޭޔަރުކަމަށް ހޮވިވަޑައިގެންފިނަމަ ރައްޔިތުންނާ ބައްދަލުކުރައްވައި، ކަންކަން ނިންމެވުމުގައި ރައްޔިތުންގެ ޚިޔާލާއި މަޝްވަރާ ހޯއްދަވާނެ ކަމަށެވެ. އަދި މަސައްކަތްތައް ކުރިއަށްދާގޮތާއި، މަސައްކަތެއް ލަސްވާނަމަ އެކަމުގެ ތަފްސީލުވެސް ރައްޔިތުންނާ ހިއްސާކުރައްވާނެ ކަމަށެވެ.
އާދަމް އާޒިމަކީ ފަހުގެ ތާރީޚެއްގައި ދިވެހިރާއްޖެ ދުށް އެންމެ ގާބިލު، އަދި ގިނަ ރައްޔިތުންތަކެއްގެ ލޯތްބާއި އިހުތިރާމު ލިބިވަޑައިގެންފައިވާ، އަދި ޚާއްސަކޮށް ކަންކަންކުރާ، ކެރޭ، އަދި ކަންކަން ކުރުމުގެ ވައްޓަފާޅި ހުރި ބޭފުޅެއްގެގޮތުގައި ގިނަބަޔަކު ސިފަކުރައްވާ ބޭފުޅެކެވެ.
މާލޭ މޭޔަރުގެ ގޮނޑި ހުސްވީ އެ މަގާމުގައި ކުރިން ހުންނެވި، ޑރ. މުހައްމަދު މުއިއްޒު، ރައީސްކަމާ ހަވާލުވެ ވަޑައިގަތުމަށްޓަކައި މި މަހު 17ގައި އިސްތިއުފާ ދެއްވުމުންނެވެ. މޭޔަރުގެ ގޮނޑިއަށް އާ ބޭފުޅަކު އިންތިޚާބުކުރުމަށް ބާއްވާ ބައި-އިލެކްޝަން އަންނަ ޖެނުއަރީ މަހު 13ގައި ބާއްވަން އިލެކްޝަންސް ކޮމިޝަން (އީސީ)ން ވަނީ ނިންމާފައެވެ.
