ޕީސީބީގެ ބޯޑުން މުޣުނީގެ ނަން އުނިކުރީ، ދައުލަތުގެ އެހެން ދިމާއެއްގައި ޚިދުމަތްކުރަން ފުރުސަތު ދޭން
29 ނޮވެމްބަރު 2023 | ބުދަ 12:50ޕީސީބީގެ ބޯޑަށް މުޣުނީ އައްޔަނުކޮށްފައިވަނީ މިދިޔަ ބުރާސްފަތި ދުވަހު
ސްޓެލްކޯގެ ކުރީގެ އެމްޑީ، ހަސަން މުޣުނީ | ޓްވިޓަރ
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އަށް އައްޔަނުކުރުމަށް ނަން ފޮނުވިތާ ހަފުތާއެއް ނުވަނީސް، މިދިޔަ ސަރުކާރުގެ ސްޓެލްކޯގެ މެނޭޖިންގ ޑިރެކްޓަރު ހަސަން މުޣުނީގެ ނަން ބޯޑުން އުނިކޮށްފިއެވެ.
ޕީސީބީގެ ބޯޑަށް މުޣުނީ އައްޔަނުކޮށްފައިވަނީ މިދިޔަ ބުރާސްފަތި ދުވަހުއެވެ. އެހެންނަމަވެސް ޕީސީބީން ބުދަ ދުވަހު އެކްސްގައި އާންމުކުރި ލިސްޓުގައި މުޣުނީގެ ނަން ހިމަނާފައެއް ނެތެވެ.
އެކަމުގެ މައުލޫމާތު ހޯދުމަށް ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހީމް ޚަލީލުއަށް ސުވާލު ދެންނެވުމުން ވިދާޅުވީ، މުޣުނީގެ ނަން ޕީސީބީގެ ބޯޑުގެ ލިސްޓުން އުނިކުރަން ނިންމީ، ދައުލަތުގެ އެހެން ދާއިރާއެއްގައި އޭނާއަށް މަސައްކަތް ކުރެއްވުމުގެ ފުރުސަތު ދެއްވުމަށް ކަމަށެވެ.
ޕީސީބީގެ ބޯޑުން މުޣުނީގެ ނަން އުނިކޮށްފައިވާއިރު، ޕީސީބީގައި ޖުމްލަ 7 މެމްބަރުން ތިބެއެވެ. އެއީ ރައީސް، ނައިބު ރައީސް އަދި ފަސް ދާއިރާއަށް ނިސްބަތްވާ ފަސް މެމްބަރުންނެވެ.
