ރަމަޟާންމަހާއި ގުޅުވައި އިތުރު ހަދިޔާތައް ނުދިނުމަށް އެންގި ސަރކިއުލަރ ބާތިލްކޮށްފި

ރަމަޟާންމަހާއި ގުޅުވައި އިތުރު ހަދިޔާތައް މުވައްޒަފުންނަށް ނުދިނުމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން އެންގި ސަރކިއުލަރ ބާތިލްކޮށްފިއެވެ.

މިމަހުގެ 12 ވަނަ ދުވަހު ޕީސީބީން ބުނީ ވަޒީފާއާބެހޭ ގާނޫނަށް 4 ވަނަ އިސްލާހު ގެނައުމުގެ ގާނޫނުގައި ބަޔާންކޮށްފައިވާ ފަދައިން ވަޒީފާ އަދާކުރާ ކޮންމެ މުސްލިމު މުވައްޒަފަކަށް ރަމަޟާން މަހުގެ އިނާޔަތުގެ ގޮތުގައި 3000 ރުފިޔާ ދޭންޖެހޭ ކަމަށެވެ. މުސާރަ ލިބޭ ގޮތަށް އެއް ވަޒީފާއަށްވުރެ ގިނަ ވަޒީފާ އަދާކުރާ މުވައްޒަފުންނަށް އިނާޔަތުގެ ފައިސާ ދޭއިރު، ހަމައެކަނި އެ މުވައްޒަފުގެ އަސާސީ ވަޒީފާ އޮންނަ އޮފީހަކުން ނުވަތަ ކުންފުންޏަކުން އިނާޔަތުގެ ފައިސާ ދިނުމަށާއި، އަދި އިތުރު ވަޒީފާ އަދާކުރާ އޮފީހަކުން ނުވަތަ ކުންފުންޏަކުން ފައިސާ ނުދިނުމަށް ޕީސީބީން އަންގާފައިވެއެވެ. އަދި ސަރުކާރު އަދި ސަރުކާރު ހިއްސާވާ ކުންފުނިތަކާއި، އަދި އެކުންފުނިތަކުގެ ސަބްސިޑިއަރީ ކުންފުނިތަކުން ރަމަޟާން މަހު އިނާޔަތް ދިނުމުގައި އުސޫލާ އެއްގޮތަށް އަމަލުކުރުމަށް ވަނީ އަންގާފައެވެ.

ކޮންމެ އަހަރެއްގެ ރަމަޟާން މަހާއި ގުޅިގެން ސަރުކާރުގެ ބައެއް ކުންފުނިތަކުން 3000 ރުފިޔާއަށް ވުރެ ގިނައިން ރޯދަ އިނާއަތް ދޫކުރެއެވެ. އަދި ޕީސީބީން 3000 ރުފިޔާއަށް ވުރެ ގިނައިން ރުފިޔާ ނުދިނުމަށް އެންގުމާއި ގުޅިގެން ގިނަ ބައެއްގެ ފާޑުކިޔުން އަމާޒުވެފައިވަނިކޮށް މިދިޔަ އަންގާރަ ދުވަހު މިސަރކިއުލަރ ޕީސީބީން ވަނީ ބާތިލްކޮށްފައެވެ.

މީގެ އިތުރުން ޕީސީބީން ބުނީ ރޯދަ އިނާއަތް ދިނުމުގައި ފިނޭންސް މިނިސްޓްރީން ނެރިފައިވާ ސަރކިއުލަރ އެއްގޮތަށް އަމަލުކުރުމަށް އެދޭ ކަމަށެވެ. ފިނޭންސް މިނިސްޓްރީން ނެރިފައިވާ ސަރކިއުލަރގައި ރޯދަ އިނާއަތުގެ ގޮތުގައި 3000 ރުފިޔާއަށް ވުރެ އިތުރަށް ނުދެވޭނެ ކަމަށް އަންގާފައިނުވެއެވެ.

ސަރުކާރު ހިއްސާވާ ބައެއް ކުންފުނިތައް ކަމަށްވާ، އެޗްޑީސީ، އެމްޑަބިޔުއެސްސީ އަދި އެމްއޭސީއެލް ކުންފުނިތަކުން 3000 ރުފިޔާއަށް ވުރެ އިތުރަށް ރޯދަ އިނާއަތުގެ ގޮތުގައި ފައިސާ ދެއެވެ.