ޕްރައިވެޓައިޒޭޝަން އެންޑް ކޯޕަރަޓައިޒޭޝަން (ޕީސީބީ)ގެ ސެކްރެޓަރީ ޖެނަރަލްގެ މަގާމުގައި ހުންނެވި އަޙުމަދު ޔާމީން، އެ މަޤާމުން ސަސްޕެންޑު ކޮށްްފި އެވެ.

އެ މަގާމުން ޔާމީން ސަސްޕެންޑު ކޮށްފައި ވަނީ ސިވިލް ސާރވިސް ކޮމިޝަން އިންނެވެ. ސިވިލް ސާރވިސް ކޮމިޝަން އިން ވަނީ 30 ދުވަހުގެ މުއްދަތަކަށް އޭނާ ސަސްޕެންޑު ކޮށްފަ އެވެ.

ޔާމީން ސަސްޕެންޑު ކޮށްފައި ވަނީ މިދިޔަ ހަފުތާގެ ބުރާސްފަތި ދުވަހު އެވެ. އަދި ސަސްޕެންޑު ކޮށްފައި ވަނީ އޭނާ އާއި ގުޅުން ހުރި މައްސަލައެއް ތަހުގީގު ކުރަމުން ދާތީ ކަމަށް ބުނެ އެވެ.

މައުލޫމާތު ލިބިފައިވާ ގޮތުގައި ޔާމީން ސަސްޕެންޑު ކޮށްފައި ވަނީ ހުސްވި އޭޕްރީލް މަހުގެ ތެރޭގައި ޕީސީބީން ބަދަލު ގެނައި އުސޫލާ ދެކޮޅު ހެދުމުންނެވެ. އެއީ ސަރުކާރުގެ ކުންފުނި ތަކުގެ އިސް މަގާމުތަކަށް ދަށް ފަންތީގެ މީހުން އައްޔަން ކުރެވޭ ގޮތަށް ގެނައި ބަދަލެވެ.

އެހެން ނަމަވެސް، ޕީސީބީ އިން ގެނައި އެ ބަދަލާ ދެކޮޅު ހެދި ފަރާތްތަކުގެ ތެރޭގައި އެސްޖީ ޔާމީން ހިމެނޭ ކަމަށް މައުލޫމާތު ލިބިފައިވެ އެވެ. އޭނާގެ އިތުރުން ބައެއް އެހެން ފަރާތްތަކުން ވެސް އެކަމާ ދެކޮޅު ހަދާފައިވާ ކަމުގެ މައުލޫމާތު ލިބިފައިވެ އެވެ.

މިކަމާ ގުޅިގެން "ރާއްޖެ އެމްވީ" އިން ސުވާލު ކުރުމުން ސިވިލް ސާރވިސް ކޮމިޝަންގެ ރައީސް މުޙައްމަދު ނާސިހު ވިދާޅުވީ ޕީސީބީގެ އެސްޖީ ސަސްޕެންޑު ކޮށްފައިވާ ކަމަށެވެ.

ޔާމީން ސަސްޕެންޑު ކޮށްފައި ވަނީ އޭނާގެ މައްސަލަތަކެއް ޕީސީބެ ބޯޑުން ހުށަހަޅާފައިވާތީ، އެކަމާ ގުޅިގެން ކަމަށް ވެސް ނާސިހު ވިދާޅުވި އެވެ. ނަމަވެސް އެ މައްސަލައާ ގުޅޭ އެއްވެސް ތަފުސީލެއް ނާސިހު ވިދާޅު ނުވެ އެވެ.

އެ މައްސަލަތައް ބަލައި ނިމެންދެން 30 ދުވަހުގެ މުއްދަތަކަށް ޔާމީން ސަސްޕެންޑު ކޮށްފައިވާ ކަމަށް ވެސް ނާސިހު ވަނީ ވިދާޅުވެފަ އެވެ.

ޕީސީބީގެ އެސްޖީގެ މަގާމަށް ޔާމީން އައްޔަން ކޮށްފައި ވަނީ 2022 ވަނަ އަހަރުގެ ނޮވެމްބަރު މަހުގެ ނުވަ ވަނަ ދުވަހު އެވެ.