ދައުލަތުގެ ވިޔަފާރި ތަންތަނުގެ ތެރެއިން ޑޮލަރުން އާމްދަނީ ލިބޭ ތަންތަނުން ޑޮލަރުން މުސާރަ ނުދިނުމަށް އަންގައިފި
12 ފެބުރުއަރީ 2025 | ބުދަ 14:38މާލީ ހާލަތުން އަރައިގަތުމަށް ދައުލަތުގެ ވިޔަފާރި ތަންތަނުގެ ހަރަދު ވީހާވެސް ކުޑަކުރުމަކީ ވަރަށް މުހިންމު ކަމެއް
ވެލާނާ އިންޓަރނޭޝަނަލް އެއާޕޯޓުތެރޭގައި އެމްއޭސީއެލްގެ މުވައްޒަފުން މަސައްކަތުގައި
ދައުލަތުގެ ވިޔަފާރި ތަންތަނުގެ ތެރެއިން ޑޮލަރުން އާމްދަނީ ލިބޭ ތަންތަނުން ޑޮލަރުން މުސާރައާއި، އިނާޔަތް ނުދިނުމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން އަންގައިފިއެވެ.
ބުދަ ދުވަހު ޕީސީބީން ބުނީ ދިވެހިރާއްޖެއަށް ކުރިމަތިވެފައިވާ އިގްތިސާދީ އަދި މާލީ ހާލަތުން އަރައިގަތުމަށް ރައީސް އިސްނެންގެވުމުގެ މަތިން ދައުލަތުގެ ހަރަދުތައް ހަމަމަގަށް އެޅުމަށް ގިނަގުނަ ފިޔަވަޅުތަކެއް އަޅުއްވަމުން ގެންދަވާ ކަމަށެވެ. މި ދަނޑިވަޅުގައި ސަރުކާރުން ހަރަދު ހަމަމަގަށް އެޅުއްވުމަށް ކުރަމުންދާ މަސައްކަތަށް އެއްބާރުލުން ދިނުމުގެ ގޮތުންނާއި، ރާއްޖެއަށް ކުރިމަތިވެފައިވާ މާލީ ހާލަތުން އަރައިގަތުމަށް ދައުލަތުގެ ވިޔަފާރި ތަންތަނުގެ ހަރަދު ވީހާވެސް ކުޑަކުރުމަކީ ވަރަށް މުހިންމު ކަމެއްކަމަށް ޕީސީބީން ބުނެއެވެ.
އެގޮތުން ބުދަ ދުވަހުން ފެށިގެން ސަރުކާރުގެ ވިޔަފާރި ތަންތަނާއި ސަރުކާރު ހިއްސާވާ ކުންފުނިތަކާއި، އެކުންފުނިތަކުގެ ސަބްސިޑިއަރީ ކުންފުނިތަކުގެ ހަރަދު ކުޑަކުރުމަށް ގިނަ ފިޔަވަޅުތަކެއް އެޅުމަށް ވަނީ އަންގާފައެވެ.
ދަތުރު ހަރަދާއި ގުޅޭގޮތުން ޕީސީބީން ބުނީ ރާއްޖެއިން ބޭރަށާއި، އަތޮޅުތެރެއަށް ކޮންމެހެން ކުރަންޖެހޭ ރަސްމީ ދަތުރުތައް ފިޔަވައި އެހެން ދަތުރުތައް ކުރުން މިވަގުތަށް ހުއްޓާލުމާއި، ރާއްޖެއިން ބޭރަށްކުރާ ދަތުރުތައް މަދުކޮށް ބައިނަލްއަގުވާމީ ކަސްޓަމަރުންނާއި، ސަޕްލަޔަރުންނާއި އޮންލައިންކޮށް ބަދަލުކުރުމާއި، ރާއްޖެއިން ބޭރަށް ކޮންމެހެން ކުރާ ރަސްމީ ދަތުރުތަކުގައި ފަސްޓް ކްލާސް އަދި ބިޒްނަސް ކްލާހުން ދަތުރު ނުކުރުމާއި، ދަތުރުގެ ހުރިހާ ހަރަދެއް ބޭރުގެ ފަރާތްތަކުން ދޭ ދަތުރުގެތަކުގައި ކުންފުނިން ކުރާ ހަރަދު ވީހާ ވެސް ކުޑަކުރުމާއި، ފެރީގެ ޚިދުމަތް ލިބޭ ސަރަހައްދުތަކުގައި ކުރަންޖެހޭ ދަތުރުތައް ފެރީ މެދުވެރިކޮށް ކުރުމާއި، އަތޮޅުތެރެއަށް ކުރާ ރަސްމީ ދަތުރުތަކުގައި ކެއުމާއި ހުރުމުގެ ހަރަދު އެންމެ ކުޑަވާނެ ގޮތަކަށް ދަތުރުގެ އިންތިޒާމްތައް ހަމަޖެއްސުމަށެވެ. އަދި ކުންފުންޏަށް ސީދާގޮތުން ފައިދާވާ ބޭރުގެ މަހާސިންތަކާއި، ފެއަރތަކުގައި ނޫނީ ބައިވެރިނުވުމަށް ވެސް ޕީސީބީން ވަނީ އަންގާފައެވެ.
މުވައްޒަފުންގެ ހަރަދާއި ގުޅޭގޮތުން ޕީސީބީން ބުނީ ކުންފުނިން މިހާރު ފާސްކޮށްފައިވާ އިދާރީ އޮނިގަނޑުގައި ހިމެނޭ މަގާމެއްކަމުގައި ވީނަމަވެސް ކުންފުނީގެ އޮޕަރޭޝަންސް ހިންގުމަށް ކޮންމެހެން ނަގަންޖެހޭ މުވައްޒަފުން ފިޔަވައި އިތުރު މުވައްޒަފުން އެ މަގާމުތަކަށް ނުނެގުމަށާއި، ''ސަރުކާރު ހިއްސާވާ ކުންފުނިތަކުގެ އިދާރީ އޮނިގަނޑާއި، މުސާރައިގެ އޮނިގަނޑަށް ބަދަލު ގެނައުމުގައި އަމަލުކުރާނެ ގޮތުގެ ގައިޑްލައިން'' ގައި ބަޔާންކޮށްފައިވާ ގޮތަށް މެނުވީ މުވައްޒަފުންގެ މުސާރައާއި އިނާޔަތްތަކަށް ބަދަލު ނުގެނައުމަށާއި، ރަސްމީގަޑީގައި މަސަައްކަތްތައް ނިންމޭނެ ގޮތަކަށް ކުންފުނީގެ މަސައްކަތްތައް ރޭވުމާއި، ރަސްމީގަޑީގެ ބޭރުން ކޮންމެހެން ކުރަންޖެހޭ މަސައްކަތެއް ކުރުމަށް މެނުވީ އިތުރުގަޑީގައި މަސައްކަތް ނުކުރުމަށެވެ. އަދި ދައުލަތުގެ ވިޔަފާރި ތަންތަނުގެ ތެރެއިން ޑޮލަރުން އާމްދަނީ ލިބޭ ތަންތަނުން ޑޮލަރުން މުސާރައާއި، އިނާޔަތް ނުދިނުމަށާއި، ތަމްރީނުތައް ހިންގުމުގައި ކުންފުނީގެ ކަމާގުޅޭ މުވައްޒަފުން ބޭނުންކުރުމާއި، ރާއްޖޭގެ ލިބެންހުރި ވަސީލަތްތައް ބޭނުންކުރުމަށާއި، ކޮންމެހެން މިވަގުތަށްކުރަންޖެހޭ މަސައްކަތެއް ނޫނީ އެހެން މަސައްކަތްތައް އައުޓްސޯސް ކޮށްގެން ނުކުރުމަށާއި، ޑިޕާޓްމަންޓްތަކުގެ މަސައްކަތްތަކަށް ބަލައި މުވައްޒަފުން އިތުރުވާނަމަ ނުވަތަ އައިޑަލްޓައިމް ގިނަނަމަ އިތުރު މުވައްޒަފުން ނުނަގައި އެފަދަ މުވައްޒަފުން ކުންފުނިން ކޮންމެހެން ފަށަންޖެހޭ ޕްރޮޖެކްޓްތަކާއި ކުރިއަށްދާ ޕްރޮޖެކްޓްތަކުގައި ބޭނުންކުރުމަށް ވަނީ އަންގާފައެވެ.
އެހެނިހެން ހަރަދަކަށް އިޝާރާތްކޮށް ޕީސީބީން ބުނީ ކުންފުނި ހިންގުމުގައި އިއާދަކުރަނިވި ހަކަތަ ބޭނުންކުރެވެން ހުރިނަމަ ވީ އެންމެ ފުޅާކޮށް އެކަންކުރުން އަދި ކަރަންޓުގެ ހަރަދު ކުޑަކުރުމާއި، ކަރުދާހާއި ސްޓޭޝަނަރީސްއަށް ކުރާ ހަރަދު ކުޑަކޮށް، މުއާމަލާތްތައް ޑިޖިޓަލް ކޮށްކުރުމާއި، އިވެންޓްތައް ބޭއްވުމުގައި ވަސީލަތްތައް ހުރި ކުންފުނިތަކުން އެހެން ކުންފުނިތަކަށް ވަސީލަތްތައް ހިއްސާކުރުމާއި، އިވެންޓްތަކުގެ ރިފްރެޝްމަންޓްތަކަށް ކުރާ ހަރަދު ވީހާވެސް ކުޑަކުރުމާއި، ކުންފުނީގެ އެނުއަލް ޕްރޮކިއުމަންޓް ޕްލޭނާއި ބަޖެޓާއި އެއްގޮތަށް ޕްރޮކިއުމަންޓްތައް ހިންގުމަށާއި، ކޮންސިއުމަބަލް ގަތުމުގައި ކޮންމެހެން ބޭނުންވާ ވަރަށް ގަތުމާއި، ސީއެސްއާރު އަދި ސްޕޮންސަރޝިޕް ދިނުމުގައި މިބޯޑުން އާއްމުކޮށްފައިވާ ދައުލަތުގެ ވިޔަފާރި ތަންތަނުގެ އިޖްތިމާއީ ޒިންމާއާއި، ގުޅޭ ގައިޑްލައިނުގައި ބަޔާންކޮށްފައިވާ ގޮތަށް އަދި ވީހާވެސް ހަރަދު ކުޑަވާނެހެން ކުރުމަށެވެ. އަދި ފާސްކޮށްފައިވާ އަހަރީ ބަޖެޓުގައި ހިމަނާފައިވާ ކަންކަމުގެ ތެރެއިންވެސް ކޮންމެހެން ކުރަންޖެހޭ ކަންކަން ފިޔަވައި އިތުރު ހަރަދުތައް މިވަގުތަށް ނުކުރުމާއި، އިސްރާފު ކުޑަކުރެވޭނެހެން މަސްކަތްތައް ރޭވުމަށް ޕީސީބީން ވަނީ އަންގާފައެވެ.
އިގްތިސާދީ އަދި މާލީ ހާލަތުން އަރައިގަތުމަށް ކަމަށް ބުނެ ސަރުކާރުން ގިނަ ފިޔަވަޅުތައް އަޅަމުންދާއިރު، މިސަރުކާރުގެ ސިޔާސީ މަގާމުތައް ދަނީ އިތުރު ކުރަމުންނެވެ.
