ފާއިތުވި 48 ދުވަހުގެ ތެރޭގައި، ފުރަތަމަ ރޭ ޣައްޒާގެ ރައްޔިތުން މަރުގެ ބިރެއް ނެތި ނިދައިފި
25 ނޮވެމްބަރު 2023 | ހޮނިހިރު 02:10ހަނގުރާމަ މެދުކަނޑާލިނަމަވެސް ބައެއް ހިސާބުތަކުގައި އަދިވެސް ފަލަސްތީނު ރައްޔިތުންނަށް ހަމަލާދޭކަމަށް ބައެއް ރިޕޯޓްތައް ބުނޭ
ހަނގުރާމަ މެދުކެނޑުމާއެކު ޣައްޒާގެ ރައްޔިތުން ގެތަކަށް ދަނީ
މިދިޔަ އޮކްޓޯބަރު މަހުގެ 7 ވަނަ ދުވަހުން ފެށިގެން ފާއިތުވި 48 ދުވަހުގެ ތެރޭގައި, ޣައްޒާގެ ރައްޔިތުން މަރުގެ ބިރެއް ނެތި ފުރަތަމަ ރޭ ނިދައިފިކަމުގައި އަލްޖަޒީރާއިން ރިޕޯޓްކޮށްފިއެވެ.
ޣައްޒާގެ ދެކުނުގައި ހުންނަ ޚާން ޔޫނިސްއިން ރިޕޯޓްކުރާ އަލްޖަޒީރާގެ ހާނީ މަހްމޫދު ވިދާޅުވީ، ހަނގުރާމައިގެ ސަބަބުން ހަލާކުވެފައިވާ އެންކްލޭވްގައި ތިބި ފަލަސްތީނު މީހުންނަށް، ހަތް ހަފުތާގެ ތެރޭގައި އިޒްރޭލުގެ ހަމަލާއެއް ނާންނާނެކަމުގެ ކުޑަނަމަވެސް ޔަގީންކަމެއް ލިބި އެމީހުންނަށް ނިދާލަން ފުރަމަތަ ރޭ ހަނި ފުރުސަތެއް ލިބިއްޖެކަމުގައެވެ.
މަހްމޫދު ވިދާޅުވީ މިއީ 48 ދުވަހުގެ ތެރޭގައި އަންދާޒާ ނުކުރެވޭވަރުގެ ވައިގެ ހަމަލާތަކާއި ބޮމުގެ ހަމަލާތަކަށްފަހު، ހަމަލާއެއް އަތުވެދާނެކަމުގެ ބިރެއް ނެތި ރަނގަޅަށް ނިދާލެވޭ ފުރަތަމަ ރެއަށް ވާނެކަމަށެވެ.
މާޔޫސްކަމާއި ރުޅިވެރިކަމުގެ އިހުސާސްތަކާއެކު ފަލަސްތީނުގެ ރައްޔިތުންގެ ޝަކުވާއަކީ، ހަނގުރާމަ ހުއްޓާލުމުގެ އެއްބަސްވުމުގައި އެމީހުންނަށް އަމިއްލަ ގެއަށް އެނބުރި ދިއުން ނުހިމެނުނީ ކީއްވެތޯ ކުރާ ޝަކުވާ ކަމަށާއި، އެހެންވީމާ ހަނގުރާމަ މެދުކަނޑާލުމުގެ ހިތްހަމަޖެހުމެއް ނެތްކަމަށް އޭނާ ވިދާޅުވިއެވެ.
ހަނގުރާމަ މެދުކަނޑާލި ފަހުންވެސް، ހުކުރު ދުވަހު އުތުރުން ފިލަން މަޖުބޫރުވި ފަލަސްތީނުގެ ތިން މީހުން ޝަހީދުވިއިރު، ޣައްޒާގެ އުތުރާއި ދެކުނު ވަކިކުރާ އިސްރާއީލުގެ އަސްކަރީ ލައިން ހުރަސްކޮށް އެނބުރި ގައުމަށް ދާން އުޅުމުގެ ތެރޭގައި އިސްރާއީލު ސިފައިން ވަނީ އެތައް ބަޔަކު ޒަޚަމްކޮށްލާފައެވެ.
ރިޕޯޓްތައް ބުނާގޮތުގައި، ހަނގުރާމަ މެދުކަނޑާލަން އިޒްރޭލުން އެއްބަސްވިނަމަވެސް ބައެއް ހާލަތްތަކުގައި ފަލަސްތީނުގެ ރައްޔިތުންނަށް އެމީހުން ދަނީ ހަމަލާތައް ދެމުންނެވެ.
