ފަތުރުވެރިކަމުގެ ދާއިރާއަށް އެމްޔޫ މަނިކު ކުރައްވަމުން ގެންދަވާ ޚިދުމަތުގެ އަގު ސާޓާއިން ވަޒަންކޮށްފި
23 ނޮވެމްބަރު 2023 | ބުރާސްފަތި 17:13ސަޓާއިން އެމްޔޫ މަނިކަށް މި އެވޯޑް ހަވާލުކުރީ ކުރުނބާގައި ބޭއްވި ޚާއްސަ ރަސްމިއްޔާތެއްގައި
އެމްޔޫ މަނިކަށް އެވޯޑް ހަވާލުކުރައްވަނީ
ފަތުރުވެރިކަމުގެ ދާއިރާއަށް މުހައްމަދު އުމަރު މަނިކު (އެމްޔޫ މަނިކު) ކުރައްވަމުން ގެންދަވާ ޚިދުމަތުގެ އަގު، ސައުތު އޭޝިއަން ޓްރެވަލް އެވޯޑްސް (ސާޓާ)އިން ވަޒަންކޮށްފިއެވެ.
އެމްޔޫ މަނިކު ފަތުރުވެރިކަމުގެ ދާއިރާއަށް ކުރެއްވި ޚިދުމަތުގެ އަގުވަޒަން ކުރުމުގެ ގޮތުން، ސައުތު އޭޝިއަން ޓްރެވަލް އެވޯޑްސް (ސާޓާ)އިން ވަނީ ބުރާސްފަތި ދުވަހު ކުރުނބާ މޯލްޑިވްސްގައި ޚާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި އެމްޔޫ މަނިކަށް ވަނީ އެވޯޑް ހަވާލުކޮށްފައެވެ.
އެވޯޑާ ގުޅިގެން އެމްޔޫ މަނިކު ވިދާޅުވީ, އެވޯޑް ލިބުމުން އުފާކުރައްވާ ކަމަށާއި، ސާޓާއަކީ ސައުތު އޭޝިއާގެ އޯގަނައިޒޭޝަނަކުން ހިންގާ ހަރަކާތެއް ކަަމަށެވެ. އަދި ސައުތު އޭޝިއާ މީހުންނަކީ އެއްވެސް ވަރަކަށް ފެނިފައި އޮތް ބައެއް ނޫންކަމަށެވެ.
އެމްޔޫ މަނިކަކީ ރާއްޖޭގެ ފަތުރުވެރިކަމުގެ ތަސައްވުރު ބައްޓަންކޮށް ކުރިއެރުވުމުގައި ވަރަށް މުހިންމު ދައުރެއް އަދާކުރައްވާފައިވާ ބޭފުޅެކެވެ. އެމަނިކުފާނުގެ ސާބިތު އަޒުމާއި، ޚިދުމަތްތަކާއި، ކެނޑިނޭޅި ކުރައްވަމުން ގެންދަވާ މަސައްކަތްޕުޅުތަކުގެ ސަބަބުން، އެ ސިނާއަތް ކުރިއެރުވުމަށް މަގުފަހިވެގެން ދިއުމުގެ އިތުރުން، ސިނާއަތުގެ ކުރިއެރުމުގައި ބެންޗް މާކެއް ގާއިމުކުރެވިފައި ވެއެވެ.
ފަތުރުވެރިކަމުގެ ދާއިރާގެ އިސް ފަރާތްތަކާ ގުޅިގެން ސަޓާއިން އެމްޔޫ މަނިކުގެ މަސައްކަތުގެ އަގު ވަޒަންކޮށްފައިވާއިރު، ރާއްޖޭގެ ފަތުރުވެރިކަމުގެ ސިނާއަތަށް ދެމެހެއްޓެނިވި ގޮތެއްގައި އޭނާ ކުރައްވަމުން ގެންދަވާ މަސައްކަތްތަކަށް ޝުކުރު ދަންނަވާފައިވެއެވެ.
ސައުތު އޭޝިއަން ޓްރެވަލް އެވޯޑްސްއަކީ، ޓްރެވަލް އެންޑް ޓޫރިޒަމް އިންޑަސްޓްރީގެ އެންމެ ޝަރަފުވެރި އެވޯޑެވެ. ސައުތު އޭޝިއާ ސަރަހައްދުގެ ފަތުރުވެރިކަން ކުރިއެރުވުމަށް ސަޓާއިން ކުރަމުންދާ މަސައްކަތަށް ބައިނަލްއަގުވާމީ، އަދި ސަރުކާރުގެ 15އަށްވުރެ ގިނަ އިދާރާތަކުން ވަނީ ތާއީދުކޮށްފައެވެ.
