ދެކުނު އޭޝިއާ ސަރަހައްދުގެ ފަތުރުވެރިކަމަށް ޗަމްޕާ ބްރަދާސް ކުންފުނީގެ ޗެއާމަން މުހައްމަދު މޫސާ (އުއްޗު) އާއި ކްރައުން ގްރޫޕުގެ ޗެއާމަން ހުސައިން އަފީފު ކޮށްދެއްވާފައިވާ ހިދުމަތްތަކުގެ އަގު ފާހަގަކޮށް އެ ދެ ބޭފުޅުންނަށް 'ފޭސް އޮފް ސައުތު އޭޝިއާ' އެވަރޑް އަރުވައިފިއެވެ.
ސައުތު އޭޝިއަން ޓްރެވަލް އެވޯޑްސް (ސާޓާ)އިން އެ ދެ ބޭފުޅުންގެ އަގު ވަޒަންކޮށްފައި ވަނީ އާދިއްތަ ދުވަހު މީރު މޯލްޑިވްސްގައި އޮތް ރަސްމިއްޔާތެއްގައެވެ.
ފަތުރުވެރިކަމުގެ އިސް މޭސްތިރީންގެ ތެރޭގައި ހިމެނިވަޑައިގަންނަވާ އެ ދެ ބޭފުޅުންގެ އަގު ވަޒަންކޮށް ދިން އެ އެވަރޑް އެ ދެބޭފުޅުންނާއި ހަވާލުކޮށްދެއްވާފައި ވަނީ ސާޓާގެ ނައިބު ރައީސް ސޫރަޖު ހާނެވެ.
އެ އެވަރޑާއި ހަވާލުވެވަޑައިގަތުމަށް ފަހު އެ ދެބޭފުޅުންވެސް ވަނީ އެފަދަ އެވަރޑެއް ލިބިވަޑައިގެންނެވީތީ އުފާކުރައްވާ ކަމަށް ވިދާޅުވެފައެވެ. އަދި އެފަދަ އެވަރޑަކަށް އުންމީދުވެސް ކުރައްވާފައި ނުވާކަމަށް އެ ދެބޭފުޅުން ވަނީ ފާހަގަކުރައްވާފައެވެ. އެ ރަސްމިއްޔާތުގައި ވާހަކަދައްކަވަމުން ސާޓާގެ ނައިބު ރައީސް ސޫރަޖު ވަނީ މުހައްމަދު މޫސާ އައި ހުސައިން އަފީފު ފަތުރުވެރިކަމުގެ ދާއިރާ އަށް ކުރައްވާފައިވާ ގިނަ ގުނަ ޚިދުމަތްތައް ފާހަގަކުރައްވާ އެކަމަށްޓަކާ އެ ދެބޭފުޅުންނަށް ޝުކުރު އަދާކުރައްވާފައެވެ.
ރާއްޖޭގެ ފަތުރުވެރިކަމަށް 50 އަށް ވުރެ ގިނަ އަހަރުވެފައިވާ އިރު ފަތުރުވެރިކަން މި ހިސާބަށް ގެނެސްދިނުމުގައި އެ ބޭފުޅުން އަދާކުރައްވާ މުހިންމު ދައުރު އޭނާ ވަނީ ފާހަގަކުރައްވާފައެވެ. މީގެ އިތުރުން ފަތުރުވެރިކަން ޒަމާނާއި އެއްހަމަކުރުމަށް އެ ދެބޭފުޅުން ދެއްވާ އަހައްމިޔަތުކަމާއި، އެ ސިނާއަތާއި މެދު ބަހައްޓަވާ ގާތްކަން އޭނާ ވަނީ ފާހަގަކުރައްވާފައެވެ.
މުހައްމަދު މޫސާ އާއި ގުޅޭގޮތުން ސޫރަޖް ވިދާޅުވީ މުހައްމަދު މޫސާ އާއި ޗަމްޕާ ބްރަދާސް އަކީ ރާއްޖޭގެ އިތުރުން ބައިނަލްއަޤުވާމީ ފެންވަރުގައި ފާހަގަކޮށްލެވޭ ނަމެއް ކަމަށެވެ. އެކަން އެގޮތަށް ވީ ފަތުރުވެރިކަމުގެ ދާއިރާ ކުރިއަރުވާ ނެގެހެއްޓުމުގައި މުހައްމަދު މޫސާ އަދާކުރެއްވި އިސް ދައުރުގެ ސަބަބުން ކަމަށް ސޫރަޖް ސިފަކުރެއްވިއެވެ. މީގެ އިތުރުން، ފަތުރުވެރިކަމުގެ އިތުރުން ހޮސްޕިޓާލިޓީ، ދަނޑުވެރިކަން އަދި ރިއަލް އެސްޓޭޓް، މާލީ ޚިދުމަތް ފަދަ ދާއިރާތަކުން ވެސް މުހައްމަދު މޫސާއަކީ ކާމިޔާބު ޝަހުސިއްޔަތެއްކަން ސޫރަޖު ވަނީ ފާހަގަކުރައްވާފައެވެ.
ހަމައެހެންމެ އަފީފަކީ ވެސް ފަތުރުވެރިކަމުގެ ސިނާއަތް މިހިސާބަށް ގެނެސްދިނުމުގައި އެންމެ އިސް ސަފުގައި އުޅުއްވާ ބޭފުޅެއްކަން ވަނީ ފާހަގަކުރައްވާފައެވެ. އަފީފަކީ ފަތުރުވެރިކަމުގެ ދާއިރާ އިން ގިނަ ޚިދުމަތްތަކެއް ކުރެއްވުމުގެ އިތުރުން އެ ސިނާއަތާއި ގުޅިފައިވާ އެހެނިހެން ދާއިރާތައް ތަރައްޤީކުރުމުގައި ވެސް މުހިންމު ހިއްސާދާރެއްކަން އޭނާ ވަނީ ފާހަގަކުރައްވާފައެވެ.
'ފޭސް އޮފް ސައުތު އޭޝިއާ' އެވޯޑަކީ ދެކުނު އޭޝިއާ ސަރަހައްދުގެ ފަތުރުވެރިކަމުގެ ދާއިރާގައި އެންމެ ފާހަގަކޮށްލެވޭ ބޭފުޅުންނަށް ދޭ ޚާއްސަ އެވޯޑެކެވެ.
ސާޓާ އެވޯޑްސްގައި މި ތިން ބޭފުޅުން ފިޔަވާ އިތުރު އެހެން ތިން ބޭފުޅަކަށް 'ފޭސް އޮފް ސައުތު އޭޝިއާ' ވަނީ އަރުވާފައެވެ. އޭގެ ތެރޭގައި ހިމެނެނީ ނޭޕާލްއަށް ނިސްބަތްވާ 2 ބޭފުޅުންނާއި ބަންގްލަދޭޝް އަށް ނިސްބަތްވާ ބޭފުޅެކެވެ.
