ތިލަމާލެ ބުރިޖުގެ މަޝްރޫއުގައި ހިމެނޭ، މާލެއާއި ވިލިމާލޭގެ ބުރިޖުގެ މަސައްކަތް 2025 ވަނަ އަހަރުގައި ނިމޭނެކަމަށާއި، މުޅި ބުރިޖުގެ މަސައްކަތް 2026 ވަނަ އަހަރަށް ނިންމާލަން ޝެޑިއުލްކޮށްފައިވާ ކަމަށް އިމާރާތްކުރުމާއި ބިނާރާބެހޭ ވަޒީރު ޑރ. އަބްދުﷲ މުއްތަލިބް ވިދާޅުވެއްޖެއެވެ.

ތިލަމާލެ ބުރިޖުގެ އެންމެ ފަހުގެ އަދާހަމަތައް ދެމުން ވަޒީރު ވިދާޅުވީ، ކުރީގެ ޝެޑިއުލުގެ އަންދާޒާގެ ދަށުން، ބުރިޖުގެ މުޅި އަމަލީ މަސައްކަތް ނިންމާލެވޭނެ ކަމަށް އޮތީ 2024 ވަނަ އަހަރުގެ މެއި މަހުގެ ތެރޭގައި ކަމަށެވެ.

އެހެން ނަމަވެސް އިބްރާހީމް މުހައްމަދު ސާލިހުގެ ސަރުކާރުން، ސެޕްޓެމްބަރު މަހުގެ 16 ވަނަ ދުވަހު ބުރިޖުގެ މަސައްކަތްތަކުގެ ސަޕްލިމެންޓަރީ އެއްބަސްވުމެއްގައި ސޮއިކޮށްފައިވުމުން، އެ އެއްބަސްވުމުގެ ދަށުން ބުރިޖުގެ މަސައްކަތް އިތުރު 2 އަހަރަށް ދިގުލައިގެން ދާނެކަމަށް ވަޒީރު ވިދާޅުވިއެވެ.

"އެފްކޮންސްއާ ދިވެހި ސަރުކާރުން އެ ދުވަހު ސޮއިކުރި ސަޕްލިމަންޓްރީ އެގްރިމަންޓުގަ، މަސައްކަތް ނިންމަން އޮތީ 2026 ވަނަ އަހަރުގެ ސެޕްޓެމްބަރު 30އާ ހަމައަށް،" ވަޒީރު ވިދާޅުވިއެވެ.

މުޅި ބުރިޖުގެ މަސައްކަތުގެ ތަފްސީލުތައް ދެއްވަމުން ވަޒީރު ވިދާޅުވީ، ބުރިޖުގެ މަސައްކަތްތައް ބެހިފައިވަނީ ޖުމްލަ ދެ ބައެއްގެ މައްޗަށް ކަމަށެވެ. ވަޒީރު ވިދާޅުވި ގޮތުގައި އެއީ މާލެއިން ގުޅީފަޅާއި ހަމައަށް ގުޅާލުމާއި އަދި ގުޅީފަޅުން ފެށިގެން ތިލަފުއްޓާ ހަމައަށް ގުޅާލުމެވެ.

"ސެކްޝަން އޭގެ މަސައްްކަތް ނިންމުމަށް އެއްބަސްވީ 27 މަސްދުވަހުން. އެއީ 14 ޑިސެމްބަރު 2023ށް. ސެކްޝަން ބީގެ މަސައްކަތް ނިންމުމަށް އެއްބަސްވީ 32 މަސް ދުވަހުގެ ތެރޭގަ. އެއީ 17 މޭ 2026ށް." ވަޒީރު ވިދާޅުވިއެވެ.

ވަޒީރު ވިދާޅުވީ މަސައްކަތް ލަސްވުމަށް ބަލާއިރު، މަސައްކަތްތައް އެންމެ ފުރަތަމަ ފެށުނުއިރު ކުރިއަށް ދިޔައީ ދާންޖެހޭ ވަރަށް ކަމަށާއި، އެހެން ނަމަވެސް އެ މަސައްކަތްތައް ފަހުން ވަރަށް ބޮޑަށް ލަސްވިކަމަށެވެ.

އެހެންކަމުން މަސައްކަތުގެ އަވަސްމިނަށް ބަލާއިރު، ކުރިން ކަނޑައެޅި 2024 ވަނަ އަހަރަށް އެ މަސައްކަތް ނުނިންމޭނެކަން އެފްކޮންސްއަށްވެސް ޔަގީންވި ކަމަށް ވަޒީރު ވިދާޅުވިއެވެ. ވަޒީރު ވިދާޅުވިގޮތުގައި، ސަޕްލިމެންޓަރީ އެއްބަސްވުމެއްގައި، ސަރުކާރާއި އަދި އެފްކޮންސްއިން ސޮއިކުރީ އެހާ ހިސާބުންނެވެ.

"މަސައްކަތް ލަސްވެގެން ދިޔައިމަ ކޮންޓްރެކްޓަރަށް އެ އަރާ ޖޫރިމަނާގެ އަދަދަކީވެސް ބޮޑު އަދަދެއް. ދެ ފަރާތުން މަޝްވަރާކޮށްފަ 16 ނޮވެމްބަރު 2023ގަ ސަޕްލިމެންޓްރީ އެގްރިމެންޓެއްގަ ސޮއިކޮށްފަ އޮތީ،" މުއްތަލިބު ވިދާޅުވިއެވެ.

އެހެން ނަމަވެސް މުއްތަލިބު ވިދާޅުވީ، މަސައްކަތް ދިގުލައިގެން ދިޔަނަމަވެސް، އެ މަޝްރޫއުގެ އަގަށް އިތުރު ބަދަލެއް އައިސްފައެއް ނުވާކަމަށެވެ. އަދި ކުރީ ސަރުކާރާ އެފްކޮންސްއާ ދެމެދު ކުރެވުނު އެއްބަސްވުމަށް އިހުތިރާމު ކުރައްވާނެ ކަމަށްވެސް ވަޒީރު ވިދާޅުވިއެވެ.