ގެދޮރުވެރިޔާ ސްކީމް: "76ން މަތިން މާކްސް ލިބުނު ފަރާތްތަކެއްގެ ގުރު ނުނަގާ ހުރި ކަމަށް ބުނަނީ ދޮގެއް"

ގެދޮރުވެރިޔާ ސްކީމްގެ ދަށުން، ފްލެޓަށް އެދި ހުށަހަޅާ 76ން ފެށިގެން މަތިން މާކްސް ލިބިފައިވާ ފަރާތްތަކުގެ ގުރު ނުނަގާ ހުރި ކަމަށް ދެކެވޭ ވާހަކަތައް ހައުސިން މިނިސްޓްރީގެ ކުރީގެ ސްޓޭޓް މިނިސްޓަރ އަކްރަމް ކަމާލުއްދީން ދޮގުކުރައްވައިފިއެވެ.

އަކްރަމް އެފަދައިން ވިދާޅުވީ އޭނާ އެކްސްގައި ހިއްސާކުރެއްވި ޕޯސްޓެއްގައެވެ. ކުރީގެ ސަރުކާރުން ހިންގާފައިވާ ގެދޮރުވެރިޔާ ސްކީމުން 76 އިން ފެށިގެން މަތިން މާކްސް ލިބިފައިވާ ފަރާތްތަކެއް، ގުރުއަތުގައި ބައިވެރި ނުކޮށް ހުރިކަން ފާހަގަކުރެވިފައިވާ ކަމަށްބުނެ ހައުސިންގ މިނިސްޓްރީން ކުރި އިއުލާނަކީ ރައްޔިތުންނަށް އޮޅޭގޮތަށް ކޮށްފައިވާ އިއުލާނެއް ކަމަށް ވެސް އަކްރަމް ވަނީ ވިދާޅުވެފައެވެ.

ގެދޮރިވެރިޔާ ސްކީމަށް ދެމަފިރިން ވަކިން ފޯމު ހުށަހަޅައިގެން ޝަރުތު ހަމަވެ ދެމަފިރިންނަށްވެސް ފުލެޓް ލިބޭވަރަށް މާކްސް ލިބިފައިވާނަމަ، ދެމަފިރިންނަށް ލިބޭނީ 1 ފުލެޓް ނުވަތަ، ދެމަފިރިންގެ ތެރެއިން ކަނޑައަޅާ 1 ފަރާތަކަށް ލިބޭނީ އެއް ފުލެޓް ކަމަށް މިނިސްޓްރީޓްރީ އޮފް ނޭޝަނަލް ޕްލޭނިންގ، އެންޑް އިންފްރާސްޓްރަކްޗަރ އިން 15 ނޮވެމްބަރ 2023 ގައި ކޮށްފައިވާ ނަމްބަރ: 471-HDS/471/2023/35 (IUL) އިއުލާނުގައި ބަޔާންކޮށްފައިވާނެކަމަށް އޭނާ ވިދާޅުވިއެވެ.

ހަމައެހެންމެ 15 ނޮވެމްބަރު 2023 ގެ އިއުލާނުގައި ބަޔާންކޮށްފައިވާ ގޮތުގެ މަތިން ޢަމަލުކުރުމުގެ ބޭނުމަށް ގެދޮރުވެރިޔާ ސްކީމުގެ ދަށުން ފްލެޓު ލިބުމަށް ޝަރުޠު ހަމަވި ފަރާތްތަކުގެ ތެރެއިން އަނބިމީހާ އަދި ފިރިމީހާއަށް ފްލެޓް ލިބުމުގެ ޝަރުޠު ހަމަވެފައިވާނަމަ އެ ފަރާތްތައް ގުރަށް ނުގެންގޮސް އެ 2 ފަރާތަށް 1 ފުލެޓް ނުވަތަ އެ 2 ފަރާތުންކުރެ ކަނޑައަޅާ ފަރާތަކަށް 1 ފުލެޓް ދިނުމަށްޓަކައި، ރިޒާވުގައި ފްލެޓް ބަހައްޓައި އަދި އެފަރާތްތަކަކީ ކޮބައިކަން އެނގޭނެހެން އެފަރާތްތައް ވަކިން ލިސްޓްކޮށްފައިވާނެ ކަމަށް އަކްރަމް ވަނީ ވިދާޅުވެފައެވެ.

އަދި 4000 ފުލެޓް ލިބޭ ފަރާތްތަކުގެ ގުރުއަތު ނެގުން ކުރިއަށް ގެންގޮސްފައި ވާނީ މޯލްޑިވްސް ކަސްޓަމްސް ސާވިސް އަށް އެކަށައަޅާފައިވާ 100 ފުލެޓާއި، ދެމަފިރިން ވަކިން ހުށަހަޅައިގެން ޝަރުތު ހަމަވެ، ފުލެޓް ލިބޭ މިންވަރަށް މާކްސް ލިބިފައިވާ ދެމަފިރިންނަށް 1 ފުލެޓް ހިމެނޭހެން އެ އެފަރާތްތަކަށް ފުލެޓް ހޯލްޑްކުރުމަށް ފަހުގައި ކަމަށް ވެސް އޭނާ ފާހަގަކުރެއްވިއެވެ.

އަކްރަމް ވިދާޅުވި ގޮތުގައި ކުރީ ސަރުކާރުން މި މަސައްކަތް ކޮށްފައިވަނީ ދައުލަތުގެ މަސައްކަތެއްގެ ގޮތުގައި ބަލައިގެން މިނިސްޓްރީގެ ސިވިލްސާވިސް މުވައްޒަފުންނަށް މިދެންނެވި ހުރިހާ މައުލޫމާތަކާއި ކަންކަން އިނގޭނޭހެންނެވެ. އަދި އެ މަސައްކަތް ކުރީ ސިޔާސީ ފަރާތްތައް ބަދަލުވީ ކަމުގައި ވީނަމަވެސް މިނިސްޓަރީން ކޮށްފައިވާ އެއްވެސް މަސައްކަތެއް ގެއްލިގެން ނުދާނޭހެން ކަމަށް ވެސް އަކްރަމް ވިދާޅުވިއެވެ.

އެހެންނަމަވެސް ސަރުކާރު ބަދަލުވެ މިނިސްޓްރީއާއި ހަވާލުވި ސިޔާސީ ބޭފުޅުން ވަޑައިގެން މިނިސްޓަރީގައި އެ މަސައްކަތުގައި އުޅުއްވި ފަރާތްތައް އެކަހެރިކޮށް ރަނގަޅަށް ކަންހިނގާފައިވާ ގޮތް ނުބަލާ ކަމަށް އޭނާ ވިދާޅުވިއެވެ. މި މަސައްކަތް ކުރުމުން ގެންދިޔުމުގެ ސަބަބުން ގެދޮރުވެރިޔާ ސްކީމުގެ ކަންކަން އޮޅުންބޮޅުން ކޮށްލައި ރައްޔިތުންނަށް އޮޅުންއަރާހެން ދޮގު މައުލޫމާތު ދެއްވަމުން ދާތަން މިވަނީ ފެނިގެންގޮސްފަކަމަށް އޭނާ ވަނީ ވިދާޅުވެފައެވެ.

އެހެންކަމުން ގެދޮރުވެރިޔާ ސްކީމު ފަދަ ރައްޔިތުންނާ ގުޅުންހުރި ހައްސާސް މައްސަލަތަކުގައި ކަން ހިނގާފައިވާގޮތް ނުބަލައި ރައްޔިތުންގެ ހިތްތަކުގައި ނުތަނަވަސްކަން އުފެދޭގޮތަށް، ގަސްތުގައި ވިޔަސް އަދި ގަސްތުގައި ނޫން ކަމުގައިވީނަމަ ވެސް މައުލޫމާތު ފެތުރުމަކީ ވަރަށް ޒިންމާދާރުކަންކުޑަ އަމަލެއް ކަމުގައި އޭނާ ވަނީ ފާހަގަކުރައްވާފައެވެ.