ފްލެޓް މައްސަލަ: މައްސަލަތަކަށް ހައްލުނުލިބި އާންމުން ހައުސިންގ މިނިސްޓްރީއަށް
ދެމަފިރިންގެ ތެރެއިން އެކަކު ފްލެޓް ދޫކޮށްލަން ޖެހުމާއި ގުޅިގެން ގިނަ ބަޔަކު ވަނީ ސުވާލު އުފައްދާފައި
ހައުސިން މިނިސްޓްރީއަށް އާއްމުން އެއްވުން
ފްލެޓް މައްސަލައިގައި އެއްވެސް ކަމަކަށް ހައްލު ނުލިބުމުން އަނެއްކާ ވެސް އާއްމުން ހައުސިންގމިނިސްޓްރީއަށް ގޮސް މުޒާހަރާ ކޮށްފި އެވެ.
އާއްމުން ހައުސިން މިނިސްޓްރީ އަށް ގޮސްފައި ވަނީ ވަކި ވަކިންނެވެ. ހެނދުނު 8 އިން ފެށިގެން މެންދުރު 2 އާއި ދެމެދު 40 ވަރަކަށް އާއްމުން ހައުސިން މިނިސްޓްރީ އަށް ގޮސްފައިވާ ކަމަށް ރާއްޖެއެމްވީ އަށް މައުލޫމާތު ދިން އާއްމު މީހަކު ވަނީ ކިޔާދީފައެވެ.
އަންގާރަ ދުވަހު ހައުސިން މިނިސްޓްރީ އަށް އާއްމުން އެއްވެފައިވާ އެއް ސަބަބަކީ ފްލެޓް ލިބުނު ދެމަފިރިންގެ ތެރެއިން އެކަކު ފްލެޓް ދޫކޮށްލަން ހައުސިން މިނިސްޓްރީން އަންގާ އިރު އޭގެ ތެރެއިން މިހާރު ފްލެޓް ލިބުނު ކަމަށް އަންގާފައިވާ ފަރާތްތަކަށް ވާ ގޮތެއް ސާފު ނުވާތީއެވެ. އެ މީހުން އަލުން ގުރުނަގަނީތޯ ނުވަތަ ނޫންތޯ، ދެން ލިބެ ފްލެޓަކީ ކުރިން ލިބުނު ފްލެޓް ނޫން އެހެން ފްލެޓެއްތޯ އާއްމުން ސުވާލު އުފައްދާފައިވެއެވެެ.
ގެދޮރުވެރިޔާ މަޝްރޫއުގެ ދަށުން ތިން ކޮޓަރީގެ ފްލެޓްތަކަށް ކުރިމަތިލި މީހުންގެ ތެރެއިން 75 މާކްސް ލިބުނު މީހުންގެ ފްލެޓާއި ގުޅޭ މަސައްކަތްތައް ކުރިއަށް ގެންދާނީ ފަހުން ކަމަށް ހައުސިންގ މިނިސްޓްރީން ހޯމަ ދުވަހު ހާމަކޮށްފައިވާތީ އެކަމާއި މެދު އާއްމުން ޝަކުވާކޮށްފައިވެއެވެ.
ހޯމަ ދުވަހު ހައުސިންގ މިނިސްޓްރީން ކުރި އިއުލާނެއްގައި ބުނީ ތިން ކޮޓަރީގެ ފްލެޓްތައް ލިބޭނީ 76 މާކްސް ލިބޭ މީހުންނަށް ކަމަށް ކަނޑައަޅާފައިވާ ކަމަށެވެ. އަދި އެ އެންމެންނަށް ފްލެޓް ދިނުމަށްފަހު 75 މާކްސް ލިބުނު މީހުންގެ ފްލެޓްތަކުގެ މަސައްކަތް ކުރަން ނިންމާފައިވާ ކަމަށް ވަނީ ބުނެފައެވެ. މިއާއި އެކު އާއްމުން ވަނީ 76 އަށް ވުރެ މަތިން މާކްސް ލިބުނު މީހުންގެ ޕޯޓަލް އަޕްޑޭޓް ނުވާތީ އެ ޝަކުވާކޮށްފައެވެ. އަދި 75 އިން މަތިން ލިބުނު މީހުންގެ އެގްރީމެންޓް ހޯލްޑްކޮށްފައިވުމަކީ ވެސް އާއްމުންގެ ޝަކުވާއެކެވެ. ހަމައެހެންމެ އޭގެ ތެރެއިން ފްލެޓް ލިބުނު ކަމުގެ އެގްރީމެންޓް އޮތް މީހުންނަށް ފްލެޓް ލިބޭނެތޯ ނޫންތޯ ސާފު ނުވާ ކަމަށް ވެސް އާއްމުން ދަނީ ބުނަމުންނެވެ.
މީގެ އިތުރުން މިދިޔަ ބުރާސްފަތި ދުވަހު ވެސް ވަނީ ފްލެޓް މައްސަލައިގައި އޮޅުން ބޮޅުން ބޮޑުވެ އާއްމުން ހައުސިންގ މިނިސްޓްރީ އަށް ގޮސް މުޒާހަރާކޮށްފަ އެވެ. އެދުވަހު މުޒާހަރާ އަށް 70 އެއްހާ މީހުން ގޮސްފައިވާއިރު މުޒާހަރައިގެ ބައިވެރިންގެ ތެރެއިން އެގްރީމެންޓް ނުލިބޭ މީހުން ބޭނުންވީ އެގްރީމެންޓް ނުލިބޭ މީހުންނަށް އެލިޖިބްލް ނަމަ، ފްލެޓް ލިބޭނެތޯ ނޫންތޯ ސާފުކުރުމަށެވެ. އަދި އެގްރީމެންޓް ލިބުނު މީހުން ބޭނުންވީ ޕޯޓަލް އަޕްޑޭޓް ނުވާތީ އެކަން ސާފުކުރުމަށެވެ.
މުޒާހަރާގެ ބައިވެރިންނަށް މައުލޫމާތު ދެއްވަމުން ހައުސިންގ މިނިސްޓްރީގެ ޕަރމަނަންޓް ސެކެރެޓަރީގެ މަޤާމުގައި ހުންނެވި ބޭފުޅަކު ވަނީ އެންމެ ފުރަތަމަ ފްލެޓް ދިނުމުގައި އިސްކަން ދެނީ އެގްރިމެންޓް ލިބިފައިވާ މީހުންނަށް ކަމަށް ވިދާޅުވެފައެވެ. އެގްރިމެންޓް ލިބުނު މީހުންގެ މައްސަލަ ފުރަތަމަ ހައްލުކޮށްދެއްވާނެ ކަަމަށް އޭނާ ވަނީ ވިދާޅުވެފައެވެ. އަދި އޭގެ ފަހުން އެގްރިމެންޓް ނުލިބޭ މީހުންނަށް ދިމާވެފައިވާ މައްސަލަތައް ބަލާނީ އެއަށް ފަހުގައި ކަމަށްވެސް ވަނީ ވިދާޅުވެފަ އެވެ.
