ރާއްޖެޓީވީގެ ސްކޮލަޝިޕް ޕްރޮގްރާމް ތައާރަފްކޮށްފި
25 ޖުލައި 2017 | އަންގާރަ 14:11މި ސްކޮލަޝިޕް ޕްރޮގްރާމަކީ ރާއްޖެޓީވީއާއި ލަންކާގެ މެޓްރޮޕޮލިޓޭން ގުޅިގެން ކުރިއަށް ގެންދާ ޕްރޮގްރާމެއް
ރާއްޖެޓީވީގެ ސްކޮލަރޝިޕް ޕްރޮގްރާމް ގެ އެއްބަސްވުމުގައި ސޮއިކުރުން
ރާއްޖެޓީވީގެ ސްކޮލަޝިޕް ޕްރޮގްރާމް ތައާރަފްކޮށްފި އެވެ.
މި ޕްރޮގްރާމުގެ ދަށުން ހުޅުވާލާ ފުރަތަމަ ސްކޯލަޝިޕްތަކުގެ އެއްބަސްވުމުގައި ކޮލަމްބޯގެ މެޓްރޯޕޮލިޓަން ކޮލެޖާއި ރާއްޖެޓީވީއާ ދެމެދު މިއަދު ވަނީ ސޮއިކޮށްފަ އެވެ.
މި އެއްބަސްވުމުގައި ރާއްޖެޓީވީގެ ފަރާތުން ސޮއި ކުރެއްވީ ޗީފް އޮޕަރޭޓިން އޮފިސަރު ހުސެއިން ފިޔާޒް މޫސާއެވެ. މެޓްރޯޕޮލިޓަންގެ ފަރާތުން ސޮއިކުރެއްވީ އެ ކޮލެޖްގެ ފަރާތުން ރާއްޖެއަށް ކަނޑައަޅާފައި ހުންނަވާ ކޯޑިނޭޓަރު ފާތުމަތު ނަފާޝާ އަބްދުﷲ އެވެ.
އެއްބަސްވުމުގައި ސޮއިކުރުމުގެ ހަފްލާގައި ފިޔާޒު ވިދާޅުވީ ހަބަރާއި މައުލޫމާތު ފެތުރުމުގެ އިތުރުން، މުޖުތަމައަށް ފައިދާހުރި ހިދުމަތްތަކެއް ކޮށްދެއްވުމަކީ ރާއްޖެޓީވީން އަބަދުވެސް އިސްކަންދޭ ކަމެއް ކަމަށާއި މި ސްކޯލާޝިޕް ޕްރޮގްރާމަކީ ރާއްޖެޓީވީގެ އިޖުތިމާއީ ޒިންމާގެ ތެރެއިން ކުރާ ކަމެއް ކަމަށެވެ.
މި ޕްރޮގްރާމުގެ ދަށުން މެޓްރޯޕޮލިޓަން ކޮލެޖްގެ ފުލްސްކޯލާޝިޕަކާއި 60 ޕަސެންޓް ޑިސްކައުންޓް ލިބޭ ފަސް ސްކޯލަޝިޕް އަދި 30 ޕަސެންޓް ލިބޭ ފަސް ސްކޯލަޝިޕް އިއުލާނުކުރާނެ އެވެ.
މި ސްކޯލަޝިޕްތަކަށް ހުށަހެޅުމުގެ ފުރުސަތު ވަރަށް އަވަހަށް ރާއްޖެޓީވީ ހުޅުވާލާނެ އެވެ.
މެޓްރީޕޮލިޓަން ކޮލެޖްގެ ފަރާތުން ނަފާޝާ ވިދާޅުވީ މިފަދަ މުހިންމު ޕްރޮގްރާމެއް ރާއްޖެޓިވީއާއެކު ފެށިގެން ދިއުމަކީ އުފަލެއް ކަމަށެވެ.
