ފުރަތަމަ ފަހަރަށް ބްރެޒިލް ބަލިވެއްޖެ، އެއްވަނަ އާޖެންޓީނާ އަށް
22 ނޮވެމްބަރު 2023 | ބުދަ 04:41ބަލިވުމުން ވަނީ ފާޑުކިއުން އަމާޒުވެފައި
އާޖެންޓީނާ އާއި ބްރެޒިލް ކުޅުނު މެޗުގެ ތެރެއިން
ވޯލްޑްކަޕް ކޮލިފައިންގައި ފުރަތަމަ ފަހަރަށް އަމިއްލަ ދަނޑުގައި ބްރެޒިލް ބަލިވެއްޖެ އެވެ.
2026ގެ މުބާރާތުގެ ކޮލިފައިންގައި ބްރެޒިލް ބަލިވީ އެންމެ ވާދަވެރި އާޖެންޓީނާ އަތުންނެވެ. މެޗުގެ ހަމައެކަނި ލަނޑު ޖެހީ ނިކޮލަސް އޮޓެމެންޑީ އެވެ.
ވޯލްޑްކަޕް ކޮލިފައިންގެ ތާރީހުގައި ބްރެޒިލް ރޭ ކުޅުނު މި މެޗަކީ އަމިއްލަ ގައުމުގައި ކުޅުނު 65 ވަނަ މެޗެވެ. މީގެ ތެރެއިން ބްރެޒިލް ވަނީ 51 މެޗު ކާމިޔާބުކޮށް 13 މެޗު ވަނީ އެއްވަރުވެފަ އެވެ. ބަލިވި ހަމައެކަނި މެޗަކީ ރޭގެ މެޗެވެ. ބްރެޒިލްގެ މި ބައްޔާއެކު ގައުމީ ޓީމަށް ވަނީ ވަރަށް ބޮޑަށް ފާޑުކިއުން އަމާޒުވެފަ އެވެ. ހާއްސަކޮށް އެ ގައުމުގެ ސްޓައިލް ބަދަލުކުރަންޖެހޭ ކަމަށް ވަރަށް ގިނަ މީޑިއާތަކުންނާއި ބްރެޒިލްގެ ސަޕޯޓަރުން ވަނީ ބުނަން ފަށާފަ އެވެ.
މިއާއެކު ޓޭބަލުގައި އާޖެންޓީނާ އެއްވަނާގައިވަނީ 15 ޕޮއިންޓާއެކުގަ އެވެ. ބްރެޒިލް އޮތީ ހަތް ޕޮއިންޓާއެކު ހަ ވަނާގަ އެވެ.
ރޭގެ މެޗަކީ އާޖެންޓީނާގެ ކެޕްޓަން ލަޔޮނަލް މެސީ ބްރެޒިލްގެ މަރަކާނާ ސްޓޭޑިއަމުގައި ކުޅޭނެ ފަހު މެޗު ކަމަށް އޮތީ ބެލެވިފަ އެވެ. މިހެންވެ އޭނާ ދެކިލުމަށް އެތައް ބަޔަކު ސްޓޭޑިއަމާއި އެ ސަރަހައްދަށް އެއްވި އެވެ. އަދި ތަޅާފޮޅުން ބޮޑުވެ، ބައެއް މީހުންނަށް އަނިޔާވެ، މެޗު ފެށުން ވެސް ފަސްކުރަން ޖެހުނެވެ.
