ފީފާ ވޯލްޑް ކަޕް ކޮލިފިކޭޝަންގެ ގުރޫޕް ކޭގައި އިންގްލެންޑުން ކުޅުނު ފަސް ވަނަ މެޗުގައި ސާބިއާ އަތުން ވެސް މޮޅުވެ، އެ ޓީމުގެ މޮޅުވުމުގެ ސިލްސިލާ ދަމަހައްޓައިފި އެވެ.

އަންގާރަ ދުވަހުގެ ރޭ ކުޅުނު މެޗު އިންގްލެންޑުން ކާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި އިންގްލެންޑުން ދެ ލަނޑު ޖެހިއިރު، ފަހު ހާފުގައި އެ ޓީމުން ވަނީ ތިން ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 33 ވަނަ މިނެޓުގައި އިންގްލެންޑަށް ލީޑު ނަގައިދިނީ އެ ޓީމުގެ ކެޕްޓަން ހެރީ ކޭން އެވެ. އޭނާ އެ ލަނޑު ޖެހީ ޑެކްލަމް ރައިސް ތަނަވަސްކޮށްދިން ފުރުސަތެއްގަ އެވެ. އޭގެ ދެ މިނެޓު ފަހުން ނޯނީ މަޑުއޭކޭ ވަނީ އިންގްލެންޑުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މެޗުގެ ދެ ވަނަ ހާފު ފަށައިގެން ހަތް ވަނަ މިނެޓުގައި އިންގްލެންޑުގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްދިނީ އެޒްރީ ކޮންސާ އެވެ. އޭގެ ފަހުން މެޗުގެ 75 ވަނަ މިނެޓުގައި އިންގްލެންޑުގެ ހަތަރު ވަނަ ލަނޑު ޖެހީ މާކް ގުއެހީ އެވެ. އަދި މެޗުގައި އިންގްލެންޑުގެ ފަސް ވަނަ ލަނޑު 90 ވަނަ މިނެޓުގައި ޖެހީ މާކަސް ރަޝްފޯޑު އެވެ. އެއީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެން އޭނާ ޖެހި ލަނޑެކެވެ.

މެޗަށް ފަހު ވާހަކަ ދައްކަމުން އިންގްލެންޑުގެ ކޯޗު ތޯމަސް ޓުޗެލް ބުނެފައި ވަނީ ސާބިއާ އަކީ އިދިކޮޅަށް ކުޅެން އުނދަގޫ ޓީމެއް ކަމަށާއި، އެ ޓީމު އަތުން އިންގްލެންޑު ހޯދީ މުހިންމު މޮޅެއް ކަމަށެވެ. އޭނާ ބުނީ އެ މެޗުގައި ފެނުނީ ޓީމުގެ ކުޅުންތެރިން އެކުވެގެން ކުރި މަސައްކަތް ކަމަށާއި، އެއީ ޓީމު ވޯކެއް ކަމަށެވެ.

މީގެ އިތުރުން އޭނާ ބުނީ މިހާތަނަށް އައިއިރު އިންގްލެންޑުން ގިނަ ކަންކަން ރަނގަޅު ކޮށްފައިވާ ކަމަށާއި، އިންގްލެންޑަށް ކުރިއަށް ދިޔުމަށް ކުރަން ޖެހޭ ކަންކަން އިނގޭ ކަމަށެވެ. ޚާއްސަކޮށް މިވަގުތު އެންމެ ބޮޑު ފޯކަސްއެއް އޮތީ ކުޅުންތެރިން ކުރިއެރުވުމަށް ކަމަށާއި، ކޮލިފިކޭޝަންގެ ފަސް މެޗުން ވެސް މޮޅުވެފައި އޮތުމުން ވަރަށް ހަމަ ޖެހިފައި ހުރި ކަމަށް ޓުޗެލް ބުންޏެވެ.

މިހާތަނަށް ކޮލިފިކޭޝަންގައި ކުޅެފައިވާ ފަސް މެޗުން ވެސް މޮޅުވެ، އިންގްލެންޑު އެއް ވަަނައިގައި އޮތީ 15 ޕޮއިންޓާ އެކު އެވެ. ކޮލިފިކޭޝަންގައި ދެން އިންގްލެންޑަށް އޮންނާނީ އޮކްޓޫބަރު މަހު ވޭލްސްއާ ދެކޮޅަށް ކުޅޭ މެޗެވެ.