ހާލަންޑަށް ލިބުނު އަނިޔާ ސީރިއަސްއެއް ނޫން

މެންޗެސްޓަރ ސިޓީ އަށް ކުޅެމުން އަންނަ ނޯވޭގެ ފޯވާޑް އާލިން ހާލަންޑަށް ލިބުނު އަނިޔާ ސީރިއަސް ނޫން ކަމަށް ރިޕޯޓުތައް ބުނެފި އެވެ.

ހާލަންޑަށް އަނިޔާވެފައި ވަނީ ޔޫރޯ ފުޓުބޯޅަ މުބާރާތުގެ ކޮލިފިކޭޝަންގައި ފެރޯ އައިލެންޑާ ދެކޮޅަށް ކުޅުނު މެޗުގަ އެވެ. އެ މެޗުގައި ލިބުނު އަނިޔާގެ ސަބަބުން، ހާލަންޑު ހުންނަން ޖެހެނީ ކުޅުމާ ދުރުގަ އެވެ. ނަމަވެސް، އޭނާ އަށް ލިބުނު އަނިޔާ ސީރިއަސް ނޫން ކަމަށް ނޯވޭގެ މެޑިކަލް ޓީމާ ހަވާލާދީ މީޑިއާ ތަކުގައި ވަނީ ބުނެފަ އެވެ. ޤައުމީ ޓީމުތަކުގެ މެޗުތަކަށް ލީގުގެ ކުޅުން މެދު ކަނޑާލާފައިވާއިރު، އިނގިރޭސި ޕްރިމިއާ ލީގުގެ ކުޅުން އަލުން ފަށާއިރު، މެންޗެސްޓަރ ސިޓީގެ ފުރަތަމަ މެޗު އޮތީ ލިވަޕޫލާ ދެކޮޅަށެވެ. ނޮވެމްބަރު މަހުގެ 25 ވަނަ ދުވަހު ސިޓީގެ އިއްތިހާދު ސްޓޭޑިއަމްގައި ކުޅޭ މެޗުގައި ހާލަންޑަށް ކުޅެވޭނެ ކަމަށް ވެސް ރިޕޯޓުތައް ބުނެ އެވެ.

ޖަރުމަނުގެ ބޮރޫޝިއާ ޑޯޓްމަންޑު ދޫކޮށް ހާލަންޑު ސިޓީ އަށް ބަދަލުވީ މިދިޔަ އަހަރު އެވެ. އެކުލަބަށް ބަދަލުވެ އޭނާ އަންނަނީ މޮޅު ކުޅުމެއް ވެސް ދައްކަމުންނެވެ. މިހާތަނަށް އޭނާ ވަނީ ސިޓީ އަށް 71 މެޗު ކުޅެދީ، 69 ލަނޑު ޖަހައިފަ އެވެ. މިހާރު ކުރިއަށްދާ ސީޒަންގައި ވެސް އޭނާގެ މޮޅު ކުޅުން އަންނަނީ ފެންނަމުންނެވެ. ސީޒަންގެ މިހާތަނަށް އޭނާ ވަނީ 18 މެޗުން 17 ލަނޑު ޖަހައިފަ އެވެ. މިދިޔަ ސީޒަންގައި ސިޓީން ތިން ތަށި ކާމިޔާބު ކުރިއިރު، އެންމެ އިސް ދައުރެއް އަދާ ކުރި އެއް ކުޅުންތެރިޔަކީ ވެސް ހާލަންޑު އެވެ.