ޣައްޒާގެ ދެކުނު ސަރަޙައްދުތައް ހުސްކުރަން އެންގިތާ މާގިނައިރުތަކެއް ނުވެ، އިސްރާއީލްގެ ހަނގުރާމަވެރިން ޣައްޒާގެ ދެކުނުގެ ސަރަހައްދުތަކަށް ނުރައްކާތެރި ހަމަލާތަކެއް ދީފިކަމަށް އަލްޖަޒީރާއިން ރިޕޯޓްކޮށްފިއެވެ.
ޣައްޒާގެ ދެކުނުގެ ސަރަހައްދުތަކަށް ނުރައްކާތެރި ހަމަލާތަކެއް ދީފައި މިވަނީ އެސަރަޙައްދުން ޢާއްމުން ނިކުތުމަށާއި، އެތަނުން ނުގޮސް ހުރި ކޮންމެ މީހެއްގެ ފުރާނައަށް ނުރައްކާވެދާނެކަމަށް އިސްރާއީލްގެ އަސްކަރިއްޔާއިން އިއުލާންކުރިތާ މަދުގަޑިއިރު ތަކެއްގެ ތެރޭގައެވެ.
އަލްޖަޒީރާގެ ނޫސްވެރިޔާ ޔުމްނާ އަލްސައްޔިދު ބުނީ އިސްރާއީލުން ޣައްޒާގެ ދެކުނުގެ އެކި ހިސާބުތަކަށް ވަރުގަދަ ތިން ހަމަލާއެއް ދީފައިވާ ކަމަށެވެ. އެގޮތުން އޭނާ ފާހަގަކުރީ ރަފާހުގައި ދިން ބޮމުގެ ހަމަލާތަކުގައި ހަތް މީހަކު މަރުވެފައިވާ ކަމަށާއި، އަދި އިތުރު ހަމަލާއެއްގައި ޚާން ޔޫނިސްގެ މީހުން ދިރިއުޅޭ އިމާރާތެއް ތަޅާލައި އެތެރޭގައި ނުވަ މީހަކު މަރުވި ހާދިސާ އޭނާ ފާހަގަކޮށްފައި ވެއެވެ.
އަލްސައްޔިދު އިތުރަށް ބުނީ އިސްރާއީލުގެ ހަމަލާއެއް ޚާން ޔޫނިސްގެ މެދުތެރޭގެ ބިޒީ ލޯކަލް މާރުކޭޓަކަށްވެސް ދީ އެތައް ބަޔަކު މަރުވެފައިވާ ކަމަށެވެ. ޣައްޒާގެ ޞިއްޙީ އޮފިޝަލުން ވިދާޅުވެފައިވަނީ މިއަދު ދިން ހަމަލާތަކުގައި އެތައް ބަޔަކު ޒަޚަމްވެ އެތައް ރައްޔިތުންނެއް މަރުވެފައިވާ ކަމަށެވެ.
ދެ ހަފުތާގެ ހަމަނުޖެހުންތަކުގައި މީގެ ކުރިން ވެސް ދެކުނުން ވަނީ އިސްރާއީލުގެ ވަރުގަދަ އޮޕަރޭޝަންތައް ކުރިއަށް ގެންގޮސްފައެވެ. އެހެންކަމުން ގެއްލުންތަކާއި މަރުތައް މިހާރު ދަނީ އިތުރުވަމުންނެވެ. އޭގެ ތެރޭގައި ގެދޮރު ގެއްލުނު މީހުން ވެސް ހިމެނެއެވެ.
އިންސާނީ ހައްގުތަކަށް މަސައްކަތް ކުރާ ޖަމާއަތްތަކުން ތުހުމަތު ކުރާ ގޮތުގައި އިސްރާއީލުން ޣައްޒާގެ ރައްޔިތުންނަށް އަމާޒުކޮށް ހަމަލާދެނީ އޮޅުވާލައިގެން ނެވެ. އެގޮތުން ދެކުނުގައި ރައްކާތެރިކަން ކަށަވަރު ވާނެކަމަށް ކުރިންބުނެ އެސަރަޙައްދަށް މީހުން ޖަމާކޮށް، އާންމުން އެއްވެ ތިބި ގެތަކާއި އިމާރާތްތައް ހަލާކުކޮށްފައިވާ ކަމަށް އެޖަމާޢަތްތަކުން ބުނެ އެވެ.
ޣައްޒާގެ ދެ މިލިއަނަށްވުރެ ގިނަ އާބާދީ އިސްރާއީލުގެ ބޮމުގެ ހަމަލާތަކުގައި ތާށިވެފައިވާ އިރު، ދެކުނުގެ އެކި ކަންކޮޅުތަކުގައި ދިން ހަމަލާތަކުގެ ސަބަބުން ސަލާމަތްވެވޭނެ އެއްވެސް މަގެއް މިހާރު ޣައްޒާގެ ރައްޔިތުންނަކަށް ނެތެވެ. ފުރާނަ ސަލާމަތްކުރެވޭނެ ގޮތެއް ހޯދުމަށް އެދި ޣައްޒާ ރައްޔިތުން ދަނީ އާދޭސް ކުރަމުންނެވެ.
