ލެވަންޑޯސްކީ އަކީ ބާސެލޯނާގެ ލީޑަރެއް: ޑެކޯ

ސްޕެއިންގެ ބާސެލޯނާ އަށް ކުޅެމުން އަންނަ ޕޮލެންޑުގެ ކެޕްޓަން ރޮބާޓް ލެވަންޑޯސްކީ އަކީ އެ ކުލަބުގެ ލީޑަރެއް ކަމަށް، ބާސެލޯނާގެ ސްޕޯޓިން ޑިރެކްޓަރު ޑެކޯ ވިދާޅުވެއްޖެ އެވެ.

ޑެކޯ މިހެން ވިދާޅުވީ ބާސެލޯނާގައި ލެވަންޑޯސްކީގެ ކުރިމަގާ ގުޅޭ ގޮތުން ވާހަކަ ދައްކަވަމުންނެވެ. އެގޮތުން، ބާސެލޯނާ އާއި ލެވަންޑޯސްކީއާ ދެމެދު ސޮއި ކުރެވިފައިވާ އެއްބަސްވުމެއް އޮންނާނެ ކަމަށް އޭނާ ވަނީ ވިދާޅުވެފަ އެވެ. އަދި ބާސެލޯނާގައި ލެވަންޑޯސްކީ ދައްކަމުން އަންނަ ކުޅުމާމެދު، ކުލަބުގެ ކޯޗިން އޮފިޝަލުން އަދި އިސްވެރިން ވެސް ހިތްހަމަ ޖެހޭ ކަމަށް ޑެކޯ ވިދާޅުވި އެވެ. އެކަން ފާހަގަކޮށް އޭނާ ވިދާޅުވީ، ބާސެލޯނާ އިން ލެވަންޑޯސްކީ ގެންނަން އެންމެ ފުރަތަމަ ބޭނުންވީ ވެސް، ކުލަބަށް އޭނާގެ ފަރާތުން ފައިދާތަކެއް ވާނެކަން ޔަގީން ކުރެވޭތީ ކަމަށެވެ.

މީގެ އިތުރުން އޭނާ ވިދާޅުވީ، ބާސެލޯނާގެ އެއްވެސް ކުޅުންތެރިޔަކާ ލެވަންޑޯސްކީއާ ދެމެދު މައްސަލައެއް ޖެހިފައި ނުވާ ކަމަށެވެ. ޚާއްސަކޮށް ބާސެލޯނާގެ ޒުވާން ކުޅުންތެރިޔާ ލަމީން ޔަމާލް އާއި ލެވަންޑޯސްކީއާ ދެމެދު އެއްވެސް މައްސަލައެއް ނެތްކަން އޭނާ ޔަގީންކޮށް ދެއްވަ އެވެ. ޑެކޯ ވިދާޅުވީ، އޭނާ އަށް ފެންނަ ތަނުގައި ލެވަންޑޯސްކީ އަކީ އަބަދު ވެސް ޔަމާލް އަދި ޒުވާން ކުޅުންތެރިންނަށް ހިތްވަރު ދެމުން އަންނަ ލީޑަރެކެވެ.

ޖަރުމަނުގެ ބަޔާން މިއުނިކުގައި މޮޅު ކުޅުމެއް ދައްކަމުން އައި ލެވަންޑޯސްކީ ބާސެލޯނާ އަށް ބަދަލުވީ މިދިޔަ އަހަރު އެވެ. ބާސެލޯނާ އާއެކު ލެވަންޑޯސްކީ ސޮއި ކޮށްފައި ވަނީ ހަތަރު އަހަރުގެ އެއްބަސްވުމެއްގަ އެވެ. އެހެންކަމުން، 2026 ވަނަ އަހަރުގެ ޖޫން މަހުގެ ނިޔަލަށް އޭނާ އެކުލަބުގައި ހުންނާނެ އެވެ. ލެވަންޑޯސްކީ ވަނީ މިހާތަނަށް ބާސެލޯނާ އަށް ކުޅެދިން 60 މެޗުން 41 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ މިހާތަނަށް ދެ ތައްޓެއް ކާމިޔާބު ކޮށްފަ އެވެ. އެއީ ސްޕެނިޝް ލީގު އަދި ސްޕެނިޝް ސުޕަ ކަޕް އެވެ.