މޭޖާ ލީގު ސޮކާ (އެމެރިކާ ލީގު)ގެ އިންޓަ މިއާމީން ހޮވާ އަހަރުގެ މޮޅު ކުޅުންތެރިޔަކަށް، އެ ޓީމުގެ ކެޕްޓަން ލިއޮނަލް މެސީ ހޮވިއްޖެ އެވެ.

މިއާމީގެ އަހަރުގެ މޮޅު ކުޅުންތެރިޔަކަށް މެސީ ހޮވުނުއިރު، އޭނާ އެ ކުލަބަށް ބަދަލުވީ މިއަހަރުގެ ޖުލައި މަހު އެވެ. ދެ އަހަރާ ބައިގެ މުއްދަތަކަށް މެސީ މިއާމީ އަށް ބަދަލުވީ، ޕެރިސް ސެއިންޓް ޖާމަން (ޕީއެސްޖީ) ދޫކޮށްލުމަށްފަހު އެވެ. މިއާމީ އަށް ބަދަލުވެ މެސީ ވަނީ މިހާތަނަށް އެ ކުލަބަށް ކުޅެދިން 14 މެޗުން 11 ލަނޑު ޖަހައިފަ އެވެ. އެ ކުލަބާއެކު މެސީ ވަނީ އެމެރިކާ ލީގްސް ކަޕް ކާމިޔާބުކޮށްފަ އެވެ. މިއީ މިއާމީގެ ތާރީޚުގައި ވެސް އެ ކުލަބަށް ކާމިޔާބު ކުރެވުނު ފުރަތަމަ ތައްޓެވެ. މީގެ އިތުރުން އެކުލަބު ވަނީ ޔޫއެސް އޯޕަން ކަޕްގެ ފައިނަލްގައި ވެސް ވާދަކޮށްފަ އެވެ. ލީގްސް ކަޕްގެ އެންމެ ގިނަ ލަނޑު ޖެހި ކުޅުންތެރިޔަކަށް އަދި އެންމެ މޮޅު ކުޅުންތެރިޔަކަށް ހޮވުނީ ވެސް މެސީ އެވެ.

މެސީ ވަނީ ފްރާންސް ފުޓުބޯޅަ އިން އަހަރުގެ އެންމެ މޮޅު ފުޓުބޯޅަ ކުޅުންތެރިޔާ އަށް ދެމުން އަންނަ ބެލޮންޑިއޯ އެވޯޑު ކާމިޔާބުކޮށްފަ އެވެ. މިދިޔަ އޮކްޓޫބަރު މަހު ކާމިޔާބު ކުރި ބެލޮންޑިއޯ އާއެކު، މެސީ ވަނީ މިހާތަނަށް ޖުމުލަ އަށް ފަހަރު ބެލޮންޑިއޯ އެވޯޑު ކާމިޔާބު ކޮށްފަ އެވެ. އޭނާ އަކީ އެންމެ ގިނަ ފަހަރު ބެލޮންޑިއޯ ކާމިޔާބު ކުރި ކުޅުންތެރިޔާ އެވެ. މިއާމީގެ ކުޅުންތެރިން އަދި ކުލަބުން ވެސް ވަނީ މެސީގެ ކާމިޔާބީ ފާހަގަކޮށްފަ އެވެ.