މޭޖާ ލީގު ސޮކާ (އެމެރިކާ ލީގު) ގައި ސިންސިނާޓީއާ ދެކޮޅަށް ކުޅުނު މެޗުން އިންޓަރ މިއާމީ ބަލިވެއްޖެ އެވެ.

ބުރާފްސަތި ދުވަހުގެ ހެނދުނު ކުޅުނު މެޗުން މިއާމީ ބަލިވެފައި ވަނީ 3-0 އިންނެވެ. މެޗުގެ ފުރަތަމަ ހާފުގައި ސިންސިނާޓީ އިން އެއް ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން 16 ވަނަ މިނެޓުގައި ސިންސިނާޓީ އިން ވަނީ މިއާމީ ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޖެރާޑޯ ވަލެންޒުއެލާ އެވެ.

އޭގެ ފަހުން މިއާމީ އަށް ވަނީ މެޗުގެ ނަތީޖާ ހަމަހަމަ ކުރާނެ ފުރުސަތު ވެސް ލިބިފަ އެވެ. މިއާމީ އަށް މެޗުގެ ނަތީޖާ ހަމަހަމަ ކޮށްދޭން އެ ޓީމުގެ ލުއިސް ސުއަރޭޒް ދިން ފުރުސަތެއްގައި ކެޕްޓަން ލިއޮނަލް މެސީ ފޮނުވާލި ބޯޅަ ގޯލާ އަމާޒުވާ ގޮތެއް ނުވި އެވެ.

އޭގެ ފަހުން ވެސް މިއާމީ އަށް ނަތީޖާ ހަމަހަމަ ކޮށްދޭން މެސީ އަށް ވަނީ ފުރުސަތު ލިބިފަ އެވެ. ސުއަރޭޒް ދިން ފުރުސަތެއްގައި އޭރިޔާ ބޭރުން މެސީ ފޮނުވާލި ބޯޅަ ސިންސިނާޓީގެ ގޯލު ކީޕަރު ވަނީ މަތަކޮށްފަ އެވެ.

މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި ސިންސިނާޓީ އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެ ލަނޑު އެ ޓީމަށް ޖަހައިދިނީ އެވަންޑާ އެވެ. އޭގެ ފަހުން މެޗުގެ 70 ވަނަ މިނެޓުގައި އޭނާ ވަނީ އިތުރު ލަނޑެއް ޖަހައި އެ ޓީމުގެ ލީޑު އިތުރަށް ފުޅާ ކޮށްފަ އެވެ.

މިއާމީ އަތުން ހޯދި މޮޅާއެކު ސިންސިނާޓީ އޮތީ ދެ ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ 23 މެޗުން 45 ޕޮއިންޓާ އެކު އެވެ. ސިންސިނާޓީ އަތުން ބަލިވި މިއާމީ އޮތީ 20 މެޗުން 38 ޕޮއިންޓާ އެކު ފަސް ވަނައިގަ އެވެ.