ފީފާ ވާރލްޑް ކަޕް ކޮލިފިކޭޝަންގައި އާޖެންޓީނާ އިން އެކުއެޑޯއާ ދެކޮޅަށް ކުޅޭ މެޗުގައި، އެ ޓީމުގެ ކެޕްޓަން ލިއޮނަލް މެސީ ނުކުޅޭނެ ކަމަށް ހާމަކޮށްފި އެވެ.

ވާރލްޑް ކަޕް ކޮލިފިކޭޝަންގައި އާޖެންޓީނާ އިން ވަނީ ވެނެޒުއެލާއާ ދެކޮޅަށް ކުޅެފަ އެވެ. އާޖެންޓީނާގައި ކުޅުނު އެ މެޗަކީ، ވޯލްޑް ކަޕް ކޮލިފިކޭޝަންގައި މެސީ އަމިއްލަ ޤައުމުގައި ކުޅުނު ފަހު މެޗެވެ. އެ މެޗުން އާޖެންޓީނާ މޮޅުވީއިރު، އެ މެޗުގައި މެސީ ވަނީ ދެ ލަނޑު ޖަހައިފަ އެވެ.

އެ މެޗަށް ފަހު ދެން އާޖެންޓީނާ އަށް އޮތީ ސެޕްޓެމްބަރު މަހުގެ 10 ވަނަ ދުވަހު އެކުއެޑޯއާ ދެކޮޅަށް ކުޅޭ މެޗެވެ. ނަމަވެސް، މެސީ ވަނީ އެ މެޗުގައި އޭނާ ނުކުޅޭނެ ކަމަށް އިއުލާން ކޮށްފަ އެވެ.

އެގޮތުން މެސީ ބުނެފައި ވަނީ، އޭނާ އަށް މިވަގުތު ދެން އެންމެ މުހިންމީ އަރާމު ކުރުން ކަމަށެވެ. އެހެންވެ، އާޖެންޓީނާގެ ކޯޗު ލިއޮނަލް ސްކަލޯނީއާ މަޝްވަރާކޮށް، ވާހަކަ ދައްކާފައިވާ ކަަމަށާއި، އަރާމު ކުރަން ބޭނުންވާތީ އެކުއެޑޯ މެޗުގައި އޭނާ ބައިވެރި ނުވާނެ ކަމަށް މެސީ ބުންޏެވެ.

އެކުއެޑޯއާ ދެކޮޅަށް އާޖެންޓީނާ އިން ކުޅޭ މެޗަށް، އާޖެންޓީނާގެ ޓީމާ އެކު ވެސް މެސީ ދަތުރު ނުކުރާނެ އެވެ. އެކަން ފާހަގަ ކުރަމުން މެސީ ބުނީ، މިވަގުތު ވެސް އޭނާ ކުޅެމުން އަންނަނީ އަނިޔާ އިން އެނބުރި އައިސް ކަމަށާއި، އޭނާ އަށް އަދި ވެސް އަރާމު ކުރުން މުހިންމު ކަމަށެވެ.

މެސީ ބުނީ އޭނާގެ އަނިޔާގެ މާ ބޮޑު މައްސަލައެއް މިވަގުތު ނެތް ނަމަވެސް، އަރާމު ކުރުމަށާއި، އިތުރު އަނިޔާއެއް ކުރިމަތިވިޔަ ނުދިނުމަށް އެ މެޗުގައި ނުކުޅެން ނިންމާފައިވާ ކަމަށެވެ. އެގޮތުން އޭނާ ބޭނުން ވަނީ އަރާމު ކުރުމަށް ފަހު، ފުރިހަމަ އަށް ތައްޔާރުވެގެން އައިސް ކުރިއަށް ހުރި މެޗުތަކާ ކުރިމަތިލާން ކަމަށް މެސީ ބުންޏެވެ.

އެމެރިކާގެ އިންޓަރ މިއާމީ އަށް ވެސް ކުޅެމުން އަންނަ މެސީ އަންނަނީ، މިއަހަރު ފެށުނު ފަހުން ރަނގަޅު ކުޅުމެއް ދައްކަމުންނެވެ. މިއާމީގައި އޭނާ އަށް ކޮންމެ ވެސް ވަރެއްގެ އަނިޔާގެ މައްސަލައަކާ ކުރިމަތިލާން ޖެހުނެވެ. މެސީ ވަނީ މިއަހަރުގެ މިހާތަނަށް ކުޅެފައިވާ 37 މެޗުގައި 29 ލަނޑު ޖަހައިފަ އެވެ.

މީގެ އިތުރުން ދެކުނު އެމެރިކާ ސަރަހައްދުގެ ވާރލްޑް ކަޕް ކޮލިފިކޭޝަންގައި ވެސް އެންމެ ގިނަ ލަނޑު ޖަހާފައިވާ ކުޅުންތެރިޔަކީ އޭނާ އެވެ. މެސީ ވަނީ ކޮލިފިކޭޝަންގައި އަށް ލަނޑު ޖަަހައިފަ އެވެ.