މީޑިއާއިން ދައްކާ ވާހަކަތަކުން ޒުވާން ކުޅުންތެރިންނަށް ދަނީ އަސަރު ކުރަމުން: ޒަވީ
13 ނޮވެމްބަރު 2023 | ހޯމަ 05:23ގުންޑޮގަން، ލެވޮންޑޯސްކީ، ކަންސެލޯ ފަދަ ކުޅުންތެރިންނަށް މިކަމުން އަސަރެއް ނުކުރާނެ
ބާސެލޯނާގެ ކުޅުންތެރިންނާއެކު ޒަވީ
މީޑިއާއިން ޓީމާ ބެހޭ ގޮތުން ދައްކާ ނޭދެވޭ ވާހަކަތަކުގެ ސަބަބުން ޒުވާން ކުޅުންތެރިންނަށް އަސަރުކުރަމުންދާ ކަމަށް ބާސެލޯނާގެ ކޯޗު ޒަވީ ހަނާންޑޭޒް ބުނެފި އެވެ.
ސްޕެނިޝް ލީގުގައި ރޭ އަލްވެޒް އަތުން 2-1އިން މޮޅުވި މެޗުގެ އިންޓޯލް ވަގުތުގައި ބައެއް ސަޕޯޓަރުން ވަނީ ޓީމަށް މަލާމާތްކޮށް ތުނބުންފުމެ ހަދައިފަ އެވެ. މެޗަށް ފަހު ވާހަކަ ދައްކަމުން ޒަވީ ބުނީ އަލްވެޒް ސެމިއުލް އޮމޮރޯޑިއަން މެޗުގެ ފުރަތަމަ މިނެޓުގައި ޖެހި ގޯލާއެކު އޭނާގެ ޓީމަށް މެޗު ފަަށަން ޖެހުނީ ވަރަށް ބޮޑަށް ފަހަތުގައި ތިބެގެން ކަމަށެވެ.
އޭނާ ބުނީ ދެވަނަ ހާފަށް ނުކުތުމުގެ ކުރިން ހަމަޖެހެން ކުޅުންތެރިން ކައިރީގައި ބުނި ކަމަށާއި ބާސެލޯނާގެ ކޮންޓްރޯލްގެ ދަށަށް މެޗު ގެނެވި ރޮބަޓް ލެވޮންޑޯސްކީގެ ދެ ގޯލުން ފަހަތުން އަރައި މޮޅުވެވުނީ އެގޮތަށް ކުޅެން ފެށުމުން ކަމަށެވެ.
އޭނާ ބުނީ މީޑިއާއިން ޓީމުގެ ކުޅުމާމެދު ތަފާތު ގޮތްގޮތަށް ވާހަކަ ދައްކާތީވެ ޒުވާން ކުޅުންތެރިން އެކަމާ ވިސްނާ ކަމަށެވެ.
ބާސެލޯނާގެ ސަޕޯޓަރުން މި ފަހުން އެންމެ ބޮޑަށް ހިތްހަމަނުޖެހުނީ ވާދަވެރި ރެއާލް މެޑްރިޑް އަތުން ބަލިވެ، ޗެމްޕިއަންސް ލީގުގައި ކުޅުނު މެޗުން ވެސް ބަލިވުމުންނެވެ.
