ފިހާރައަކަށް ވަދެ، ކޭޝިއަރަށް ހަމަލާދިން މީހާ ދޫކޮށްލައިފި

މާލޭގެ ފިހާރައަކަށް ވަދެ، އެ ފިހާރައިގައި އިން ކޭޝިއަރަށް ތޫނު އެއްޗަކުން ހަމަލާދިން މައްސަލާގައި ހައްޔަރުކުރި އަންހެން މީހާ ބަންދުން ދޫކޮށްލައިފި އެވެ.

29 އަހަރުގެ އެ އަންހެން މީހާ މިދިޔަ އޮކްޓޯބަރު މަހުގެ ކުރީކޮޅުގައި ހައްޔަރުކޮށްފައިވަނީ މާލޭގެ ފިހާރައަކަށް ވަދެ، އެތަނުގައި އިން ބިދޭސީ ކޭޝިއަރަށް ބިރުދައްކައި، ތޫނު އެއްޗެއް ބޭނުންކޮށްގެން އޭނާގެ ކަރަށް ހަމަލާ ދިނުމުގެ ސަބަބުންނެވެ.

އެ މައްސަލައިގައި އޭނާ ހައްޔަރުކުރުމަށް ފަހު އޭނާގެ ބަންދަށް ދެ ފަހަރެއްގެ މަތިން ވަނީ 15 ދުވަސް ޖަހާފަ އެވެ.

އެ މައްސަލައާ މެދު ފުލުހުން ބުރާސްފަތި ދުވަހު ބުނީ، އޭނާގެ ބަންދުގެ މުއްދަތު ހަމަވެގެން މިދިޔަ އަންގާރަ ދުވަހު، މުއްދަތު އިތުރު ކުރުމަށް ކޯޓަށް ހާޒިރު ކުރުމުން، ބަންދުގައި ބެހެއްޓުމަށް ނުފެންނާތީ ބަންދުން ދޫކޮށްލައިފައިވާ ކަމަށެވެ.

އެހެން ނަމަވެސް އަދިވެސް އެ މައްސަލަ ތަހުގީގު ކުރަމުންދާ ކަމަށް ފުލުހުން ބުންޏެވެ. ނަމަވެސް، އިތުރު ތަފްސީލެއް ފުލުހުން ނުދެ އެވެ.