ސައުދީ ޕްރޯ ލީގުގެ އަލް އިއްތިހާދުގެ ކޯޗުކަމުގެ މަގާމުން ޕޯޗުގަލްގެ ނޫނޯ އެސްޕިރިޓޯ ސަންޓޯ ވަކިކޮށްފި އެވެ.
ސަންޓޯ މަގާމުން ވަކި ކުރަން އެކުލަބުން ނިންމީ، މަޝްހޫރު ކުޅުންތެރިންނާއެކު ވެސް މި ސީޒަންގައި އެ ޓީމުގެ ނަތީޖާތައް ދަށްވުމުންނެވެ. މި ސީޒަންގެ ލީގުގައި މިހާތަނަށް ކުޅުނު 12 މެޗުގެ ތެރެއިން އެ ޓީމު މޮޅުވެފައި ވަނީ ހަ މެޗުންނެވެ. ތިން މެޗުން އެއްވަރުވެފައިވާއިރު، އަނެއް ތިން މެޗުން ވަނީ ބަލިވެފަ އެވެ. މިހާތަނަށް ލިބުނު 21 ޕޮއިންޓާއެކު އެ ޓީމު އޮތީ ވެސް ހަ ވަނައިގަ އެވެ.
އަލް އިއްތިހާދުގެ ކޯޗުކަމާ ސަންޓޯ ހަވާލުވީ މިދިޔަ އަހަރުގެ ޖުލައި މަހު އެވެ. އެ ޓީމުގެ ކޯޗުކަމާ ހަވާލުވެ އޭނާ ވަނީ ރަނގަޅު ނަތީޖާތަކެއް ވެސް ނެރެފަ އެވެ. އޭގެ ފަހުން އޭނާ ވަނީ މިއަހަރުގެ ޖަނަވަރީ މަހު އެ ކުލަބާއެކު ސައުދީ ސުޕަ ކަޕް ކާމިޔާބުކޮށްފަ އެވެ. އޭގެ ފަހުން މެއި މަހު އޭނާ ވަނީ އެ ކުލަބަށް ސައުދީ ޕްރޯ ލީގު ކާމިޔާބުކޮށްދީފަ އެވެ. މިއީ 14 އަހަރުގެ ތެރޭގައި އެ ކުލަބަށް ލީގު ކާމިޔާބު ކުރެވުނު ފުރަތަމަ ފަހަރެވެ. އެ ކާމިޔާބީތަކާ އެކު ވެސް، މި ސީޒަންގައި ސަންޓޯ އަށް ނަތީޖާ ނުނެރެވޭތީ އޭނާ އަށް އޮތީ ޕްރެޝަރު ވެސް ބޮޑުވެފަ އެވެ.
ކޯޗުކަމުން ސަންޓޯ ވަކި ކުރުމަށްފަހު، އަލް އިއްތިހާދުން އަންނަނީ އައު ކޯޗެއް ހޯދުމުގެ މަސައްކަތް ކުރަމުންނެވެ. އަލް އިއްތިހާދާ ހަވާލުވުމުގެ ކުރިން ސަންޓޯ ވަނީ ޓޮޓެންހަމް، ވުލްވްސް، ޕޯޓޯ އަދި ވެލެންސިއާ ފަދަ ކުލަބުތަކަށް ވެސް އިރުޝާދު ދީފަ އެވެ.
