ފްލެޓް ދެއްވާނެކަމުގެ ޔަގީންކަން ދެއްވި! މަޑުމަޑުން ރާގުފުޅު ބަދަލުވަނީބާ؟
7 ނޮވެމްބަރު 2023 | އަންގާރަ 12:13އިންތިޚާބީ ރައީސަކީ ރައްޔިތުންނަށް ލިބިގެންވާ އަސާސީ ހައްގުތައް ނިގުޅައިގަންނަވާނެ ވެރިއަކަށް ވެވަޑައިގެންފާނެ ބާވައެވެ؟
އިންތިޚާބީ ރައީސް، ޑރ. މުހައްމަދު މުއިއްޒު
ރިޔާސީ އިންތިޚާބުގެ ދެވަނަ ބުރުގެ ކެމްޕެއިނުގެ ތެރޭގައި ވިދާޅުވަމުން ގެންދެވީ، ވެރިކަމަށް ހޮވިވަޑައިގަތްނަމަވެސް، މި ސަރުކާރުން ހިންގާ އެއްވެސް މަޝްރޫއަކަށް ހުރަސް ނާޅުއްވާނެކަމަށެވެ. އަދުގެ ސަރުކާރުން އެންމެ ބޮޑު އިސްކަމެއް ދެއްވައިގެން ކުރިއަށް ގެންދާ ބޯހިޔާވަހިކަމުގެ ބިޔަ ބޮޑު މަޝްރޫއަށް ހުރަސް އެޅުއްވުމުގެ އެއްވެސް ކަހަލަ ވިސްނުންފުޅެއް ނުގެންގުޅުއްވާ ވާހަކައެވެ.
ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން، މާލޭ ސަރަހައްދުން ފްލެޓް ދޫކުރުމަށްޓަކައި ހިންގާ ގެދޮރުވެރިޔާ ސްކީމުގެ ދަށުން، ފްލެޓަށް ޝަރުތުހަމަވެ އަދުގެ ސަރުކާރުން އެކަން އިއުލާނުކުރައްވާފައި ވާއިރު، އެ މަޝްރޫއުގެ ދަށުން ފްލެޓް ލިބޭ އެއްވެސް ފަރާތަކަށް ހުރަސް ނާޅުއްވާނެކަމަށް އިންތިޚާބީ ރައީސާއި އެމަނިކުފާނުގެ އިންތިގާލީ ތަރުޖަމާނުވެސް ތަރުކާރުކޮށް ވިދާޅުވަމުން ގެންދެވިއެވެ. ނަމަވެސް، އިންތިޚާބުވެ ވަޑައިގަތުމުގެ ކުރިން ވިދާޅުވި ޅެންތައް ފަރިއްސަށް ބަދަލުވެއްޖެއެވެ.
އަންގާރަ ދުވަހު، އިންތިގާލީ ތަރުޖަމާނު މުހައްމަދު ފިރުޒުލް އަބްދުﷲ ޚަލީލް ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުތަކުގެ ރާގު މުޅިން ބަދަލުވެއްޖެއެވެ. ފިރުޒުލް ވިދާޅުވީ، އުސޫލުން ބޭރުން ފްލެޓްތައް ދީފައިވާނަމަ އެކަން ބައްލަވައި އެކަމާމެދު ފިޔަވަޅު އަޅުއްވާނެކަމަށެވެ. ނަމަވެސް، މީގެކުރިން ވިދާޅުވަމުން ގެންދެވީ، ފްލެޓް ލިބޭ ދާއިމީ ލިސްޓުގައިވާގޮތުގެ މަތީން، އެ ހުރިހާ ފަރާތްތަކަށްވެސް ފްލެޓް ލިބޭނެކަމަށެވެ. އަދި އެކަމަށް ހުރަސްއެޅޭ ފަދަ އެއްވެސް އަމަލެއް އިންތިޚާބީ ރައީސް ނުކުރައްވާނެކަމުގެ ފުރިހަަމަ ޔަގީންކަންވެސް ރައްޔިތުންނަށް ވަނީ ދެއްވާފައެވެ. އޭރު ތަކުރާރުކޮށް ވިދާޅުވަމުން ގެންދެވީ، ފްލެޓުގެ ޝަރުތުހަމަވާ ހުރިހާ ފަރާތްތަކަށް ފްލެޓް ލިބޭނެކަމަށާއި، ކުރިއަށް ގެންދާ ހުރިހާ މަޝްރޫއުތަކެއްވެސް ހުޓުމެއްނެތި ކުރިއަށް ގެންދަވާނެކަމަށެވެ.
ނަމަވެސް، ހުވާކުރެއްވުމަށް 10 ވަރަކަށް ދުވަހަށް ވެފައިވަނިކޮށް މި ދައްކަވާ ވާހަކަތައް މުޅިން ބަދަލުވެއްޖެއެވެ. ކަންކަން މިފަދައިން ހުރިއިރު، ރާއްޖޭގެ ތަރައްގީއަށް ހިންގާ ބިޔަ، ބޮޑު މަޝްރޫއުތައްވެސް ހުއްޓުވާލައާވައި، ރައްޔިތުންގެ ހައްގުތައް ނިގުޅައިގަންނަވާނެ ވެރިއަކަށް އިންތިޚާބީ ރައީސް ވެވަޑައިގެންފާނެ ބާވައެވެ؟
އިންތިޚާބީ ރައީސް ވެރިކަމަށް ވަޑައިގަތުމުގެ ކުރިން މިފަދަ ވާހަކަފުޅުތައް ދައްކަވައިގެން ރައްޔިތުންގެ ތާއީދު ހޯއްދެވީ، މި ނޫން ގޮތަކަށް ވެރިކަން ލިބިވަޑައިގަންނަވާނެ ކަމުގެ ޔަގީންކަން ނެތީމަތޯ؟ ނޫނީ މި ވާހަކަފުޅުތަކަކީ ވެރިކަމަށް ވަޑައިގަތުމަށް އިންތިޚާބީ ރައީސް ޖެއްސެވި މޮޅު ސްޓަންޓެއްތޯއެވެ؟
