ޓާޓާ ފްލެޓް ވިއްކާ ކަމަށް ބުނެ އަޑިނޭނގޭ ބޮޑު ޖަރީމާ އެއް ހިންގަނީ!

ގާކޮށްޓާއި އަރަބިއްޔާ ސްކޫލް ކުރިން ހުރި ބިމުގައި ތަރައްގީކޮށްފައިވާ ފްލެޓްތައް ސަރުކާރުން ވިއްކުން ހުއްޓާލާފައިވާއިރު، އެ އިމާރާތްތަކުން ފްލެޓް ވިއްކާ ކަމަށް ބުނެ ބަޔަކު ފައިސާ ނަގާކަން ކަށަވަރު ވެއްޖެއެވެ.

ރާއްޖެއެމްވީ އަށް ލިބުނު މައުލޫމާތަކާ ގުޅިގެން، ފްލެޓް ވިއްކާ ކަމަށް ބުނި މީހުންނަށް ގުޅުމުން އެ ފަރާތްތަކުން އެންމެ ފުރަތަމަ އެއީ ދެނަހުރި ކަމަކަށް ވެސް ނުހެދިއެވެ. އަދި ފޯނު ކަނޑާލިއެވެ. ނަމަވެސް އޭގެ އެއް ދުވަސް ފަހުން އެތަނުން ނަންބަރަކުން ގުޅައި އެ މައުލޫމާތު ލިބިފައި ވަނީ ކިހިނެއްތޯ ސުވާލުކުރިއެވެ. ރައްޓެއްސެއްގެ ފަރާތުން ކަމަށް ބުނުމުން އެކަމާ ގުޅޭ ގޮތުން އެއްވެސް މައުލޫމާތެއް ދެވޭނީ ދިމާވެގެން ކަމަށާއި ފޯނުން ވާހަކަ ނުދެއްކޭނެ ކަމަށް އެމީހާ ބުންޏެވެ.

ރާއްޖެއެމްވީ މިކަން އިތުރަށް އޮޅުން ފިލުވުމަށްޓަކާއި ފްލެޓް ވިއްކާ ކަމަށް ބުނާ ފަރާތުން ބުނި ރެސްޓޯރެންޓަކަށް މީހަކު ފޮނުވީމެވެ. އެމީހާ ފޮނުވީ ފްލެޓް ގަންނަން ބޭނުންވާ މީހެއްގެ ގޮތުގައެވެ. އެންމެ ފުރަތަމަ ވެސް މައުލޫތު ލިބުނީ ކޮންގޮތަކުންތޯ އެހިއެވެ. ފްލެޓް ވިއްކުމުގެ މަސައްކަތުގައި އުޅޭ އެ މީހާ ބުނި ގޮތުގައި ވިއްކަމުން ދަނީ ޓާޓާ ފްލެޓްތަކުގެ ތެރެއިން ތިން ކޮޓަރީގެ އެޕާޓްމެންޓްތައް ކަމަށާއި އެކަމުގައި ކުރިއަށް ދެވޭނީ ކޮމިޝަނުގެ ގޮތުގައި، 460،000ރ. (ހަތަރު ލައްކަ ފަސްދޮޅަސްހާސް ރުފިޔާ) ދިނުމުންނެވެ. އަދި އެ ފައިސާ ތިން ދުވަހުގެ ތެރޭގައި ދައްކަންޖެހެއެވެ. އެފައިސާއަކީ ވެސް ހައުސިންގ މިނިސްޓްރީއަށް ދާނެ ފައިސާ ކަމަށް އެފަރާތުން ބުންޏެވެ. މީގެ އިތުރުން، އެ ފައިސާ ހައުސިންގ މިނިސްޓްރީގެ ތެރެއަށް ވަންނާނީ ފްލެޓް ލިބި، ކޯޓު މަރުހަލާ ނިމުމުން ކަމަށް ވެސް ބުންޏެވެ.

ފްލެޓް ރަޖިސްޓްރީ ކުރުމުގެ ހުރިހާ ކަމެއްވެސް ހިނގާނީ އޮންނަ އުސޫލުގެ ތެރެއިން ހައުސިން މިނިސްޓްރީ ތެރެއިން ކަމަށް ވެސް، ފްލެޓް ވިއްކުމުގެ ބްރޯކަރުން ކަށަވަރު ކޮށްދިނެވެ. އަދި ފައިސާ ދައްކަން ޖެހޭނީ ވެސް ސޯޝަލް ހައުސިން ސްކީމްގެ ތެރެއިން ގާކޮށްޓާއި އަރަބިއްޔާގެ ފްލެޓްތަކަށް ފައިސާ ދައްކަންޖެހޭ އުސޫލުން 19 އަހަރު ވަންދެން ކޮންމެ މަހަކު 7200ރ. ކަމަށް ވެސް އެމީހާ ބުންޏެވެ.

ރާއްޖެއެމްވީގެ ތަހްގީގު ޓީމް ބައްދަލުކުރީ މެދުއުމުރުގެ ދެ ފިރިހެނުންނާ އެވެ. މި ގްރޫޕްގެ އިތުރުން ވެސް ފްލެޓް ވިއްކުމުގައި އެހެން ބްރޯކަރުން ވެސް ހަރަކާތްތެރިވެ އެވެ. ރާއްޖެ އެމްވީގެ ތަހްގީގު ޓީމާ ބައްދަލުކުރި ބްރޯކަރުން ހިންގަނީ ސައްހަ މުއާމަލާތެއްކަން ކަށަވަރުކޮށް ދިނުމަށް އަދި އެ ފަރާތްތަކާމެދު އިތުބާރު ހޯދުމަށް އެތައް ވާހަކައެއް ދައްކަ އެވެ. އެ މީހުން މީގެ ކުރިން ވެސް ފްލެޓް ވިއްކާފައިވާ ކަމަށާއި މައްސަލައެއް ދިމާވެފައި ނެތް ކަމަށް ބުނެ އެވެ.

މި ބްރޯކަރުން ފައިސާ ނަގަނީ އެމީހުންގެ އައިޑީކާޑް ކޮޕީ ދީ، ވަގުތީ އެއްބަސްވުމެއް ވެސް ހެދުމަށް ފަހުގައެވެ. ކޮމިޝަންގެ ގޮތުގައި ހަތަރު ލައްކައެއްހާ ރުފިޔާ ދެއްކުމުން ތިން ދުވަހުގެ ތެރޭގައި ފްލެޓް ދައްކާނެ ކަމަށް ބުނެ އެވެ. ފްލެޓް ދެއްކުމުން ވަގުތީ އެއްބަސްވުން ވީދާލަންޖެހޭނެ ކަމަށް އެމީހުން ޝަރުތު ކުރެއެވެ. ފައިސާ ދައްކާ އިރު ނަގުދު ފައިސާ ދިނުމަށް އެ މީހުން ޑިމާންޑްކުރެއެވެ.

މި ގްރޫޕުން ފެލްެޓް ވިއްކާފައިވާ ބައެއް މީހުން ބުނި ގޮތުގައި ވަގުތުން ނަގުދު ފައިސާ ނުދެއްކޭ ނަމަ ބޭންކް އެކައުންޓަކަށް ފައިސާ ވަގުތުން ޖަމާކުރަންޖެހެ އެވެ. އަދި ޗެކް ވެސް ގަބޫލުކުރެއެވެ.

ރާއްޖެއެމްވީގެ ތަހްގީގު ޓީމުން ވާހަކަ ދެއްކި ބައެއް ބްރޯކަރުން ބުނި ގޮތުގައި އެ މީހުން ފްލެޓް ވިއްކަނީ ހައުސިންގ މިނިސްޓްރީ މެދުވެރިކޮށް ހިންގާ މުއާމަލާތްތަކެއްގެ ގޮތުގައި ކަމަށާއި މިކަން ކުރަނީ ސަރުކާރުގެ ބައެއް އިސް ބޭފުޅުންނާ ގުޅިގެން ކަމަށް އޭނާ ބުނެ އެވެ.

ފައިސާ ދެއްކުމުން ފްލެޓް ލިބޭނެކަން ގެރެންޓީ ކުރަނީ ކިހިނެތްތޯ ސުވާލު ކުރުމުން ބްރޯކަރަކު ބުނީ "މިކަހަލަ ކަންކަން ކުރެވޭނީ ކޮންމެވެސް ވަރެއްގެ އިތުބާރެއް ވެސް ކޮށްގެން" ކަމަށެވެ. މިކަމުގެ ޒާތުން މިކަން ކުރަންޖެހޭނީ ވަރަށް ފޮރުވައިގެން ކަމަށް ވެސް އެފަރާތުން ބުންޏެވެ. ފްލެޓްގެ ތަޅުދަނޑި އަތަށް އެރުމަށް ދެ މަސްވަރު ނަގާނެ ކަމަށް އޭނާ ބުންޏެވެ.

މިގޮތަށް ޓާޓާ ފްލެޓްތައް ވިއްކަމުންދާ މީހުންނާ ގުޅޭ ގޮތުން ހައުސިންގ މިނިސްޓަރ ޑރ. މުހައްމަދު މުއިއްޒުއަށް ގުޅުމުން މައުލޫމާތު ލިބޭ ގޮތް ވަނީ ނުވެފައެވެ. އަދި މެސެޖްކުރުމުން އެ މެސެޖް ބެއްލެވި ނަމަވެސް ޖަވާބު ދެއްވާފައެއް ނުވެއެވެ.

އަރަބިއްޔާ ސްކޫލް ކުރިން ހުރި ބިމާއި ގާކޮށީ ހުރި ބިމުގައި އިމާރާތް ކުރި ފްލެޓްތައް ލިބުނު ފަރާތްތަކުގެ ތެރެއިން ދިން މުއްދަތުގައި ފައިސާ ނުދެއްކުމުން ހައުސިން ޑެވެލޮޕްމެންޓް ކޯޕަރޭޝަން (އެޗްޑީސީ) އިން ވިއްކުމަށް ކަނޑައެޅި ފްލެޓްތައް ވިއްކުން މަޑުޖައްސާލާފައި ވަނީ 2017 ވަނަ އަހަރުގެ ޑިސެމްބަރު މަހުއެވެ. ހުށަހަޅާ ތަރުތީބުން ފްލެޓްތައް ވިއްކުމަށް އިއުލާނު ކުރުމަށް ފަހު، ފްލެޓްތައް ވިއްކުން މަޑުޖައްސާފާއި ވަނީ ގިނަ އަދަދެއްގެ ބަޔަކު ފްލެޓް ގަތުމައްޓަކައި ދެ ދުވަސްކުރިން ކިއު ހެދި ވެސް ފަހުންނެވެ. އޭރު މިނިސްޓަރ މުއިއްޒު ވިދާޅުވީ، އެ ފްލެޓްތައް ގަތުމަށް ރައްޔިތުން ކިއު ހެދުމަކީ ސަރުކާރުން ގަބޫލު ކުރައްވާ ކަމެއް ނޫން ކަމަށާއި އެހެންކަމުން ފްލެޓްތައް ގަތުމަށް ފަސޭހަ ގޮތެއް ހަމެޖެއްސެންދެން އެ ފްލެޓްތައް ވިއްކުން މަޑުޖައްސާލުމަށް ސަރުކާރުން ނިންމާފައިވާ ކަމަށެވެ. ނަމަވެސް އެއީ ކޮރަޕްޝަންގެ ތެރެއިން ފްލެޓްތައް ވިއްކުމަށް ސަރުކާރުން ނިންމި ނިންމުމެއް ކަމަށް ބައެއް ފަރާތްތަކުން އޭރު ވެސް ތުހުމަތުކުރިއެވެ. އަދި އޭގެ ފަހުން އެގޮތަށް ބައެއް ފަރާތްތަކަށް ފްލެޓްތައް ވިއްކަމުންދާކަމުގެ އަޑުތައް ވަނީ ފެތުރިފައެވެ.

އެޗްޑީސީއިން ޓާޓާ ފްލެޓްތައް ވިއްކުމަށް ނިންމާފައި ވަނީ ބޭންކް ގެރެންޓީ އެންމެ ފުރަތަމަ ގެންނަ 105 ފަރާތަކަށް ފްލެޓް ފޯމު ދޫކުރާ އުސޫލުގެ ތެރެއިންނެވެ. ފްލެޓް ގަތުމަށްޓަކައި ގެންނަން ޖެހެނީ އެއް ލައްކަ ރުފިޔާގެ ބޭންކް ގެރެންޓީ އެކެވެ.

ޓާޓާ އިން ގާކޮށްޓާއި އަރަބިއްޔާ ސްކޫލު ކުރިން ހުރި ބިމުގައި އިމާރާތްކުރީ 264 ފްލެޓެވެ. މި ފްލެޓް ލިބުނު ފަރާތްތަކުގެ ތެރެއިން ފްލެޓް ދޭ ފަރާތްތަކުގެ ޑައުންޕޭމެންޓް ބޮޑުވުމުގެ ސަބަބުން ފްލެޓް ލިބުނު ފަރާތްތަކުން ވަނީ ކަންބޮޑުވުން ފާޅުކޮށްފަ އެވެ.