ސްރީ ލަންކާގެ ކްރިސްޓިއަނުން އީސްޓަ ސަންޑޭ ފާހަގަކުރަމުން ދަނިކޮށް އާދިއްތަ ދުވަހު ލަންކާގެ އެކި ސަރަހައްދުތަކަށް ދޭން ފެށި ބޮމުގެ ހަމަލާތަކާ ގުޅިގެން އަދިވެސް އެ ޤައުމު އޮތީ ބޮޑު ބިރުވެރިކަމެއްގެ ތެރޭގައެވެ. މުޅި ޤައުމުން ފެންނަނީ ހަލަބޮލިކަމާއި ހިތް ނުތަނަވަސްކަމެވެ. އެ ހަމަލާތަކާ ގުޅިގެން އެތައް ބައެއްގެ ފުރާނަ ގޮސް އެތައް ބަޔަކަށް ބޮޑެތި ޒަހަމްތަކެއް ލިބިފައިވާއިރު، ލަންކާ ރައްޔިތުން މިއަދު ތިބޭނެ ހާލު ވަޒަންކޮށްލަން ވެސް ދައްޗެވެ. އެ ހަމަލާތަކާ ގުޅިގެން އެކި ޤައުމުތަކުން ލަންކާއަށް ތައުޒިޔާ ކިޔައި ހިތްވަރު ދެމުންދާއިރު، ރާއްޖެއިން ވެސް ދަނީ ވެވުނު މިންވަރަކުން އަވައްޓެރި ލަންކާއަށް އެހީީތެރިކަން ފޯރުކޮށްދެމުންނެވެ. އެގޮތުން ރާއްޖޭގައި ތިބި ލަންކާ ރައްޔިތުންނާއެކުގައި ތިބިކަން ހާމަ ކުރުމަށް ހުކުރު ދުވަހު ރެޑް ކްރެސެންޓުން އިސްނަގައިގެން ބޭއްވި ހަރަކާތް ފާހަގަކޮށްލެވެއެވެ.

ކުރީގެ ރައީސް މައުމޫނު އަބްދުލް ޤައްޔޫމާއި، ފަރސްޓްލޭޑީ ފަޒްނާ އަހުމަދުގެ އިތުރުން ސަރުކާރުގެ އިސް ބޭފުޅުން އަމިއްލަ އިސްނެންގެވުމަށް މި ހަރަކާތުގައި ބައިވެރިވެފައިވާއިރު، ލަންކާ ރައްޔިތުންގެ ހިތާމަތަކުގައި ބައިވެރިވުމަށް އެއް މިނެޓުގެ ހަމަހިމޭން ކަމުގެ ސުކޫތެއް ވެސް މި ހަރަކާތުގެ ތެރެއިން ކުރިއަށްގެންގޮސްފައިވެއެވެ. ނަމަވެސް މި ހަރަކާތުގެ ތެރެއިންވެސް އެންމެ އަޅައިގަތް އެއް ކަމަކީ ރައީސް އޮފީހުގެ ފޮރިން ރިލޭޝަންސް ސެކެޓްރީ ސަބްރާ ނޫރައްދީން ދެއްވި ސްޕީޗެވެ. އެވަގުތު އެ ސްޕީޗް އަޑުއަހާފައި ލޮލުން ކަރުނަ ނުހިލޭ މީހެއް އެތަނުގައި މަދުވާނެކަން ހަމަ ޔަޤީނެވެ. 

"މި ސްޕީޗް ދެވޭނެކަމާމެދު އެތައް ފަހަރަކު ވިސްނިން" އޭ ވިދާޅުވަމުން އިނގިރޭސި ބަހުން ސަބްރާ ފެއްޓެވި މި ސްޕީޗް ފުރިހަމަވެފައި އެހާމެ އަސަރުގަދައެވެ. އެގޮތުން ސަބްރާ ވިދާޅުވީ، އެވަރަށް ވިސްނަން ޖެހުނީ ކިޔާނެ އެއްޗެއް ނެތިގެން ނޫން ކަމަށާއި، ބުނަން ބޭނުންވާ ވަރަށް ގިނަ ވާހަކަތައް އެބަހުރި ކަމަށެވެ. އެގޮތުން ލަންކާއާ އޮތް ގާތް ގުޅުން ސިފަ ކުރަމުން ލަންކާގައި އުފަންވި ސަބްރާ ބުނީ، އޭނާ އުޅެ ބޮޑުވީ ލަންކާގައި ކަމަށާއި، ލަންކާ އަބަދު ވެސް ޚާއްސަވާނެ ކަމަށެވެ. އަދި ދިރިއުޅުމުގެ މުހިއްމު ކަންކަން ވޭތުކޮށްފައިވާ ލަންކާއަކީ "ގެއާ ދުރުގައިވާ ގެއެއް" ކަމުގައި ސަބްރާ ވިދާޅުވިއެވެ. އެވާހަކަތައް ދައްކަމުން ދިޔަ އިރު ސަބްރާ ދިޔައީ ރޮމުން ގިސްލަމުންނެވެ. އަދި އެ ހަރަކާތުގައި ބައިވެރިވި ލަންކާ ރައްޔިތުންނާއި ދިވެހީން ވެސް ސަބްރާގެ އެ އަސަރުގަދަ ސްޕީޗް ދެމުން ދިޔަ ވަގުތުގައި ރޮމުން ދިޔަތަން ފެނުނެވެ. 

މި ސްޕީޗުގައި ސަބްރާ ވަނީ ރާއްޖެއާއި ލަންކާއާ ދެމެދު އޮތް ގާތް ގުޅުމާ ބެހޭގޮތުންވެސް ވާހަކަދައްކަވާފައެވެ. އެގޮތުން ސަބްރާ ވިދާޅުވީ، ލަންކާއަކީ ހަަމައެކަނި ޑިޕްލޮމަޓިކް ގުޅުމެއް އޮތް ޤައުމެއް ނޫން ކަމަށާއި، ލަންކާއާ ދެމެދު އޮތީ ގާތް އެކުވެރި ގުޅުމެއް ކަމަށެވެ. އެގޮތުން ލަންކާގެ ބޮމުގެ ހަމަލާގެ ވާހަކައަޑުއިވުމުން ޤަބޫލުކުރަން ދަތިވި ކަމަށާއި، ވަގުތުންް ލަންކާގައި ތިބި އާއިލާތަކާއި ރައްޓެހިންގެ ހާލު ބެލުމަށް އަވަސްވެވުނު ކަމަށެވެ. އަދި ހަމަލާތަކުގެ ޚަބަރުތައް އާންމުވަމުން ދިޔަ ވަރަކަށް އެ ޚަބަރުތައް އަޑުއެހީ ފުން ހިތާމައާއެކުގައި ކަމަށާއި، ޚަބަރުތަކާއި މީސް މީޑިއާ މެދުވެރިކޮށް ހުއްޓުމެއް ނެތި ލަންކާގެ ޚަބަރުތައް ބަލަމުން ގެންދިޔަ ކަމަށެވެ. 

ސަބްރާގެ އާއިލާ ސިއްހީ ސަބަބުތަކަށްޓަކައި ކޮލަމްބޯއަށް ބަދަލުވީ 1 މޭ 1993 ގައެވެ. އެގޮތުން ލަންކާގެ ސިޔާސީ މަޝްރަހަށް އައި ގިނަ ލޮޅުންތައް ވަރަށް ގާތުން ހިއްސާ ކުރި ކަމަށާއި، އާދިއްތަ ދުވަހު ދިން ބޮމުގެ ހަމަލާތަކުގެ ސަބަބުން ނޭނގޭ ބިރުވެރިކަމެއްގެ އިހުސާސް އަލުން އަނބުރާ އައިސްފައިވާ ކަމަށްވެސް ސަބްރާ ވިދާޅުވިއެވެ. އެގޮތުން ސަބްރާ ވިދާޅުވީ، އެފަދަ ހަމަލާތަކުގެ ސަބަބުން  އަމާން ކަމާއި، ސުލްހަމަސަލަސްކަން ގެއްލި އެކުގައި އެއްބައެއްގެ ގޮތުގައި އުޅުމުގެ އަސާސް ފުހެވިގެންދިއުމަށް މަގުފަހިވާ ކަމަށެވެ. އެގޮތުން މުސްލިމުންނަށް ދެރަ ކަމެއް ދިމާވުމުން ކްރިސްޓިއަން ދީނުގެ މީހުން އުއްބައްތި ދިއްލައިގެން ޗާރޗްތަކުގައި ދުއާ ކުރާ ހަނދާން ތަކާއި، މުސްލިމުން އީދު ފާހަގަކޮށް ތަފާތު ކެއުންތައް ކައްކައިގެން އެހެން ދީން ތަކުގެ މީހުންނަށް ވެސް "ބިރިޔާނި" އާއި ތަފާތު ކެއުންތަކަށް ދައުވަތު ދޭ ކަމަށާއި، ބުޑިސްޓް މީހުންނާއި ހިންދޫއިން ވެސް އެކުގައި އެއްމުޖުތަމައެއްގައި އުޅެވޭ ތަނެއްގެ ގޮތުގައި ލަންކާ އޮތްކަން ސަބްރާ ފާހަގަކުރެއްވިއެވެ.

ސްރީ ލަންކާގެ ކްރިސްޓިއަނުން އީސްޓަ ސަންޑޭ ފާހަގަ ކުރަމުން ދަނިކޮށް އާދިއްތަ ދުވަހު އެ ޤައުމުގެ އެކި ސަރަހައްދުތަކަށް ދިން ބޮމުގެ ހަމަލާތަކުގައި 200 އަށްވުރެ ގިނަ މީހުން މަރުވެފައިވާއިރު، 500 އަށްވުރެ ގިނަ މީހުން ޒަހަމްވެފައިވާ ކަމަށް އެޤައުމުގެ ރިޕޯރޓްތައް ބުނެއެވެ. އަދި މި ހަމަލާތަކާއި ގުޅިގެން 80 މީހަކު ހައްޔަރުކޮށްފައިވާ ކަމަށް އެ ގައުމުގެ ފުލުހުން ވަބުނެފައިވާއިރު، އަދިވެސް މި ހަމަލާތަކާއި ގުޅުން ހުރި މީހުން ހޯދަން ފުލުހުން ވަނީ އިއުލާނުކޮށްފައެވެ.