ޔަހޫދީ އިސްރާއީލުން ފަލަސްތީނަށް ދެމުންދާ ހަމަލާތަކުގައި ނިޔާވި މީހުންގެ އަދަދު 10،000 އަށް އަރައިފިއެވެ.

އަލްޖަޒީރާ ނޫހުގައި ރިޕޯޓްކޮށްފައިވާ ގޮތުން މަރުވި މީހުންގެ އަދަދު 10،022 އަށްވަނީ އަރާފައެވެ. އަދި، ޒަޙަމު ވެފައިވާ މީހުންގެ ޢަދަދު ވަނީ 32,000 އަށް އަރާފައެވެ. ނިޔާވި މީހުންގެ ތެރޭގައި އަންހެނުންނާއި ކުޑަކުދިން ގިނަ އަދަދަކަށް ހިމެނެއެވެ. މިދިޔަ އޮކްޓޯބަރ މަހުގެ 7 ވަނަ ދުވަހުން ފެށިގެން އެ ދެ ޤައުމުގެ ދެމެދުގައި ހަމަލާ ބަދަލުކުރުންތައް ކުރިއަށް ދާއިރު އިސްރާއީލުގެ 1400 މީހުން ވަނީ މަރުވެފައެވެ. ޔޫއެން އިން ވަނީ ފަލަސްތީނުގެ އިންސާނީ ހާލަތު ގޯގުން ގޯހަށް ދާތީ އެކަމާއި މެދު ކަންބޮޑުވުން ފާޅުކޮށްފައެވެ.

މީގެ އިތުރުން އާދިއްތަ ދުވަހު ޣައްޒާ އިން 3 ފަހަރު ކަރަންޓާއި މުވާސަލާތުގެ ޚިދުމަތް އެއްކޮން ކަނޑާލުމާއި ގުޅިގެން އިތުރު ދަތިތަކާއި ވަނީ ކުރިމަތިވެފައެވެ. އެގޮތުން ޣައްޒާގައި މަސައްކަތް ކުރިއަށްދާ ގޮވާމުގެ ފެކްޓްރީގެ މަސައްކަތް ވަނީ ހުއްޓުމަކަށް އައިސްފައެވެ. އަދި ހަމަލާތަކުގައި ޒަހަމްވެ އަނިޔާވާ މީހުންނަށް އެކަށީގެންވާ ފަރުވާ ދިނުމަށް ވަނީ ނުކުޅެދިފައެވެ.

ޔަހޫދީ އިސްރާއީލުން ޣައްޒާއަށް ބޮންއަޅަން ފަށާފައި ވަނީ، ފަލަސްތީނުގެ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް އޮކްޓޯބަރު މަހުގެ ކުރީކޮޅު ހަމަލާ ދިނުމުންނެވެ.