ޣައްޒާގެ މަތިން އުދުހެމުން ދިޔަ ހަތިޔާރު ނެތް ޑްރޯންތަކަކީ އެމެރިކާގެ ޑްރޯންތަކެއް ކަމަށް ޕެންޓަގަންއިން ކަށަވަރު ކޮށްފީއެވެ.

އިސްރާއީލާއި ފަލަސްތީނުގެ ހަނގުރާމަވެރި ޖަމާއަތްތަކާ ދެމެދު މިހާރު އުފެދިފައިވާ ނުތަނަވަސްކަމުގެ ތެރޭގައި އެމެރިކާގެ އަސްކަރިއްޔާއިން ފުރަތަމަ ފަހަރަށް ޣައްޒާގެ މަތިން ހަތިޔާރު ނެތް ޑްރޯންތައް އޮޕަރޭޓް ކުރަމުންދާކަން ޕެންޓަގަންއިން ކަށަވަރުކޮށްދީފައި މިވަނީ އެޑްރޯންތަކާމެދު ސުވާލު އެފެދިފައި ވަނިކޮށެވެ.

ޕެންޓަގަންގެ ތަރުޖަމާނު ބްރިގޭޑިއާ ޖެނެރަލް ޕެޓްރިކް ރައިޑާ ހުކުރު ދުވަހު ނެރުއްވި ބަޔާނެއްގައި ވިދާޅުވީ މި ދަތުރުތައް ފެށީ އޮކްޓޯބަރު މަހުގެ ހަތްވަނަ ދުވަހު ހަމާސް ޖަމާއަތުން އިސްރާއީލަށް ދިން ހަމަލާގައި 1،400 މީހުން މަރުވުމާ ގުޅިގެން ކަމަށެވެ. އަދި މި ޑްރޯންތަކަކީ ހަމާސް ޖަމާޢަތުން ހައްޔަރުކުރި އިސްރާއީލްގެ ރައްޔިތުން ހޯދުމުގެ މަސައްކަތަށް އެއްބާރުލުން ދިނުމުގެ ގޮތުން އުފައްދާފައިވާ ޑްރޯންތަކެއް ކަމަށް އޭނާ ވިދާޅުވި އެވެ.

އެމެރިކާގެ އެމްކިއު-9 ރީޕަރ ޑްރޯންތައް ފްލައިޓް ޓްރެކާތައް މެދުވެރިކޮށް ޣައްޒާވަށައިގެން އުޅޭތަން ނޫސްވެރިންނަށް ވަނީ ފެނިފައެވެ. ވައިގެ ހަމަލާތައް ދިނުމުގެ ގާބިލުކަން ހުރި ނަމަވެސް ރީޕަރުން ގިނަފަހަރަށް ބޭނުންކުރަނީ އެމީހުންގެ ސެންސަރުތައް ބޭނުންކޮށްގެން ސަވައިލެންސް ކުރުމަށެވެ.

އެމެރިކާގެ އޮފިޝަލުން ބުނަނީ ޑްރޯން މިޝަންތަކުން އިސްރާއީލުގެ އަސްކަރީ އޮޕަރޭޝަންތަކަށް އެހީތެރިކަން ފޯރުކޮށްނުދޭ ކަމަށާއި އެ މިޝަންތަކުން ފާސްކުރަނީ ހަމައެކަނި ރަހީނުކޮށްފައިވާ މީހުންނާ ގުޅުންހުރި އިންޓެލިޖެންސް ކަމަށެވެ.

އެމެރިކާއިން އެ ސަރަހައްދަށް ގިނަ އަދަދެއްގެ އަސްކަރީ ސާމާނު ފޮނުވާފައި ވީ ނަމަވެސް ސުލްހަ ބަލަހައްޓާ ސިފައިންގެ ގޮތުގައި ލަޝްކަރެއް ޣައްޒާއަށް ފޮނުވުމުގެ ވައިޓްހައުސްއިން ވަނީ ދޮގުކޮށްފަ އެވެ. އަދި ޣައްޒާއަށް އެހީތެރިކަން ފޯރުކޮށްދިނުމުގެ ގޮތުން ހަނގުރާމަތައް މެދުކަނޑާލަން އެމެރިކާއިން ވަނީ ހުށަހަޅައިފައި ކަމަށްވެސް ވައިޓް ހައުސްއިން ބުނެ އެވެ.

ނަމަވެސް އިސްރާއީލުގެ ހައްދު ފަހަނައަޅާފައިވާ ބޮޑުވަޒީރު ނަތަންޔާހޫ ވިދާޅުވީ ރަހީނުކުރި މީހުން އަނބުރާ ގައުމަށް ނުގެނެވޭހާ ހިނދަކު ހަނގުރާމަ އެންމެ ތަންފުކެއްވެސް ނުހުއްޓާނެކަމަށެވެ.

އޮކްޓޯބަރު މަހުގެ ކުރީކޮޅުން ފެށިގެން އިސްރާއީލުން ދެމުންދާ ހަމަލާތަކުގައި ފަލަސްތީނުގެ 9،200 އަށް ވުރެ ގިނަ މީހުން ޝަހީދުވެފައިވާއިރު، އެތަލައްކަ ބަޔަކުވަނީ ގެދޮރު ގެއްލިފަ އެވެ.