އިސްރާއީލުން ޖަބާލިޔާ ރެފިޔުޖީ ކޭމްޕަށް ދިން ހަމަލާތަކުގައި ފުރާނަ ގެއްލުނު މީހުންގެ އަދަދު 195ށް އަރައިފި

އަންގާރަ ދުވަހާއި ބުދަ ދުވަހު އިސްރާއީލުން ޣައްޒާގައި ހުންނަ ޖަބާލިޔާ ރެފިޔުޖީ ކޭމްޕަށް އަމާޒުކޮށް ދިން ހަމަލާތަކުގައި ފުރާނަ ގެއްލުނު މީހުންގެ އަދަދު 195ށް އަރާފައިވާކަމަށް ޣައްޒާ ސަރުކާރުގެ މީޑިޔާ އޮފީހުން ބުނެފިއެވެ.

މިހަމަލާތަކުގައި އަދިވެސް 120 މީހަކު ގެއްލިފައިވާކަމަށާއި މިމީހުން ވެއްޓިފައިވާ އިމާރާތްތަކުގެ ދަށުން ހޯދުމުގެ މަސައްކަތްކުރަމުން އަންނަކަމަށް ވަނީ ބުނެފައެވެ. މިހަމަލާތަކުގައި ޒަޚަމްވި މީހުންގެ އަދަދު 777ށް ވަނީ އަރާފައެވެ.

ޣައްޒާގެ އެންމެ އުތުރުގައި އޮންނަ ޖަބާލިޔާ ރެފިޔުޖީ ކޭމްޕަކީ އެންމެ ގިނަ އަދަދެއްގެ ބަޔަކު ދިރިއުޅެމުން އަންނަ ރެފިއުޖީ ކޭމްޕެވެ. 1.4 ސްކުޔަރ ކިލޯމީޓަރުގެ ސަރަހައްދެއްގައި ހުންނަ މިރެފިއުޖީ ކޭމްޕުގައި ލައްކައަކަށްވުރެ ގިނަ މީހުން ދިރިއުޅެމުން އަންނަކަމަށްވެއެވެ. އަންގާރަ ދުވަހު ދިން ހަމަލާތަކުގައި 50ށް ވުރެ ގިނަ މީހުންގެ ފުރާނަ ގެއްލިގެންދިޔައެވެ. މިހަމަލާތަކުގައި ބައެއް އާއިލާތަކުގެ އެންމެންގެ ފުރާނަ ވަނީ ގެއްލިފައެވެ.

ހަމާސް އިން ބުނާގޮތުގައި އިސްރާއީލުން ޖަބާލިޔާ ރެފިޔުޖީ ކޭމްޕަށް ދިން ހަމަލާތަކުގައި އެމީހުންގެ އަތްދަށުގައި ތިބި އަސީރުންގެ ތެރެއިން 7 މީހަކު ވަނީ މަރުވެފައެވެ. ހަމާސްގެ ބެލުމުގައި ދަށުގައި 200ށް ވުރެ ގިނަ މީހުން އަސީރުންގެ ގޮތުގައި އެބަތިއްބެވެ.

ޖަބާލިޔާ ރެފިޔުޖީ ކޭމްޕަށް އަމާޒުކޮށް އިސްރާއީލުން ދިން ހަމަލާއަކީ އޮކްޓޯބަރ މަހުގެ 7 ވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންދާ ހަމަލާތަކުގައި ދިން އެންމެ ބާރުގަދަ ހަމަލާތަކެވެ. ހަމަލާތަކާއެކު މުޅި ރެފިޔުޖީ ކޭމްޕް އެއްކޮށް ކަހަލަ ގޮތަކަށް ވަނީ ބިމާ ހަމަވެފައެވެ. އިސްރާއީލުން ބުނެފައިވަނީ އެހަމަލާ ދީފައިވަނީ އެ ރެފިއުޖީ ކޭމްޕްގައި އުޅޭ ހަމާސްގެ ކޮމާންޑަރެއް މަރާލުމަށެވެ.