އުފަން ވަޒަނުގައި ރެފިއުޖީއަކަށް: އޮއްޓަރުހުރި ކާއެއްޗެއް ލިބުނީ 25 ދުވަސް ފަހުން

އުފަން ވަޒަނުގައި ރެފިއުޖީއަކަށް ވުމަކީ، ފަރުދެއްގެ ހައިސިއްޔަތުން ކުރިމަތިލާންޖެހޭނެ އެންމެ ބޮޑު އެއް ނިކަމެތިކަމެވެ. މުހައްމަދު ޒަކީ އައްސައީދީއަކީ ޔަހޫދީ އިޒްރޭލުން ހިންގަމުންދާ ގަތުލުއާންމުގެ ތެރޭގައި ގެދޮރު ގެއްލި، ހާލުގައިޖެހިފައިވާ މީހެކެވެ. މުހައްމަދާއި އޭނާގެ ދަރިން މިއަދު އިށީނދެލައިގެން އެ ތިބީ ޚާން ޔޫނިސްގެ ކޭމްޕެއްގައެވެ. ބަތާއި އެއްގަމު މަހުގެ ކެއުމަކަށް އިންސާފުކޮށްލެވޭތޯއެވެ. މިއީ މިދިޔަ 22 ދުވަހުގެ ތެރޭގައި އެ އާއިލާއަށް، އޮއްޓަރުހުރި ކާއެތިކޮޅެއް ކާލަން ލިބުނު ފުރަތަމަ ފަހަރެވެ.

އައްޒަހްރާ ސިޓީގައި ދިރިއުޅެމުން ދިޔަ ގެ ދޫކޮށް، މުހައްމަދު މިހާރު ދިރިއުޅެމުން ދަނީވެސް ޚާން ޔޫނިސްގައެވެ. ނާސިރު ހޮސްޕިޓަލްދޮށުގައި ހުންނަ ކޭމްޕެއްގައެވެ.

އެ ތަނުގައި އޭނާ ވަނީ ލުއިބުއިންތައް ވިއްކުމަށް ޚާއްސަކޮށްގެން ގާޑިޔާ ވިޔަފާރިއެއްވެސް ފަށާފައެވެ. ބުއިންތަކުގެ އިތުރުން މާމުޔާއި ކަސްޓަޑުވެސް އެތަނުން ލިބެއެވެ. ގާޑިޔާ ވިޔަފާރިކޮށްގެން ދުވާލެއްގެ މައްޗަށް މުހައްމަދަށް ލިބެނީ 10ޝެކްލްއާ 20 ޝެކްލްއާ ދެމެދުގެ މިންވަރެކެވެ. އެއީ ގާތްގަނޑަކަށް 3 ޑޮލަރާ 5 ޑޮލަރާ ދެމެދު މިންވަރެކެވެ.

ކޭމްޕުގައި ދިރިއުޅުމުގެ ހާލަތު ހުރީ އިންތިހާ ދަށް ފެންވަރެއްގައެވެ. އެ ހާލުގައި ދިރިއުޅެމުން، އާއިލާއަށް ބޭނުންވާ ޒަރޫރީ ކެއިންބުއިމުގެ ޚަރަދުތައް ފުއްދެނީ ހަމަ ކިރިޔާކަމަށް މުހައްމަދު ބުނެއެވެ.

މުހައްމަދުގެ އިތުރުން، އެ ޓެންޓު ކޭމްޕުގައި ދިރިއުޅޭ އެހެން މީހުންވެސް މިހާރު ދަނީ ކުދިކުދި މަސައްކަތްތައް ކުރަމުންނެވެ. އޭގެ ތެރެއިން އެކަކީ ބިލާލާ އަބޫ މުސްތަފާއެވެ. ބިލާލް ހުޅުވައިގެން އުޅެނީ ބޯކޮށުމުގެ ޚިދުމަތްދޭ ކުޑަ ފިހާރައެކެވެ.

އޮކްޓޯބަރު މަހުން 30 ވަނައަށް ވީދުވަހު، އިޒްރޭލުން ވަނީ އެއްގަމު މަގުންވެސް ޣައްޒާއަށް ހަމަލާތައް ދޭންފަށާފައެވެ. ޣައްޒާގެ އާންމު ރައްޔިތުންނަށް ހިމާޔަތާއި ރައްކާތެރިކަން ކަށަވަރުކޮށްދިނުމަށް އިޒްރޭލަށް ގޮވާލުން ފިޔަވައި، ބައިނަލްއަގުވާމީ މުޖުތަމައުން އަމަލީގޮތެއްގައި ކުރި އެހެން އެއްވެސް ކަމެއް ނެތޭ ދެންނެވިދާނެއެވެ.

ޣައްޒާ ކޮންޓްރޯލްކުރަމުންދާ ހަމާސް ޖަމާއަތުގެ ބޭސްތަކާއި މަރުކަޒުތަކަށް ކަމަށް ބުނެ އިޒްރޭލުގެ އަސްކަރިއްޔާއިން ހަމަލާތައް ދެމުން ދާއިރު، މިހާތަނަށް، 600އެއްހާ އަމާޒަށް ހަމަލާދީފައި ވާނެކަމަށް އިޒްރޭލުން ބުނެއެވެ. ނަމަވެސް، މި ދުނިޔެއާ ވަކިވެ ގޮސްފައިވަނީ އާންމު ރައްޔިތުންނެވެ. އުދުވާނުގެ ޝިކާރައަކަށްވެ، މި ދުނިޔެއާ ވަކިވެދިޔަ މީހުންގެ އަދަދު 9000އާ ގާތްކުރާއިރު، ޝަހީދުވި ކުޑަކުދިންގެ އަދަދުވެސް އުޅެނީ 3000ން މަތީގައެވެ.