ތާޜީޚުގައި ވެސް އެންމެ މޮޅު ކުލަބަކީ ބާސެލޯނާ: މެސީ

ފުޓުބޯޅައިގެ ތާރީޚުގައި ވެސް އެންމެ މޮޅު ކުލަބަކީ ސްޕެއިންގެ ބާސެލޯނާ ކަމަށް އެ ޓީމުގެ ކުރީގެ ކެޕްޓަން، އާޖެންޓީނާގެ ލިއޮނަލް މެސީ ބުނެފި އެވެ.

މެސީ މިހެން ބުނީ ފްރާންސް ފުޓުބޯޅަ އިން ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާ އަށް ދެމުން އަންނަ ބެލޮންޑިއޯ އެވޯޑު އަށް ވަނަ ފަހަރަށް ހޯދުމަށް ފަހު ވާހަކަ ދައްކަމުންނެވެ. ފްރާންސްގެ ވެރި ރަށް، ޕެރިހުގައި އޮތް ޚާއްސަ ރަސްމިއްޔާތުގައި އަށް ވަނަ ފަހަރަށް ބެލޮންޑިއޯ ހާސިލްކުރުމަށްފަހު މެސީ ވަނީ އޭނާގެ ކެރިއަރުގެ ވާހަކަ ދައްކައިފަ އެވެ. އެގޮތުން މެސީ ބުނީ، ބާސެލޯނާ އަކީ އެންމެ މޮޅު ޓީމު ކަމަށާއި، އެ ޓީމުގައި ހިމެނިގެން ކުޅުމުގެ ފުރުސަތު ލިބުމަކީ އޭނާ އަށް ލިބުނު ވަރަށް ބޮޑު ނަސީބެއް ކަމަށެވެ. އެކަން ފާހަގަކޮށް މެސީ ބުނީ ތާރީޚުގައި ވެސް އެންމެ މޮޅު ފުޓުބޯޅަ ކުލަބަކީ ބާސެލޯނާ ކަމަށެވެ.

އުމުރުން 34 އަހަރުގެ މެސީ އޭނާގެ ސީނިއާ ކެރިއަރު ފެށީ ބާސެލޯނާ އިންނެވެ. އޭނާ ވަނީ ބާސެލޯނާ އަށް 778 މެޗު ކުޅެދީ 672 ލަނޑު ޖަހައިފަ އެވެ. އެ ކުލަބާއެކު މެސީ ވަނީ 34 ތައްޓެއް ކާމިޔާބު ކޮށްފަ އެވެ. 2018 ވަނަ އަހަރު ބާސެލޯނާގެ ކެޕްޓަން އަންދްރެސް އިނިއެސްޓާ ކުލަބު ދޫކޮށްލަން ނިންމުމާއެކު، އެ ޓީމުގެ ކެޕްޓަންކަން ވަނީ މެސީ އަށް ލިބިފަ އެވެ. އޭގެ ފަހުން ބާސެލޯނާގެ މާލީ މައްސަލަ ގޯސްވެ، އެ ކުލަބުގެ އެއްބަސްވުން އައު ނުކުރެވި މެސީ އަށް ޖެހުނީ 2021 ވަނަ އަހަރު އެ ކުލަބު ދޫކޮށްލުމަށެވެ. އެ އަހަރު ބާސެލޯނާ ދޫކޮށް އޭނާ ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ބަދަލުވީ ހިލޭ ޓްރާންސްފާއެއްގެ ދަށުން، ދެ އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު މިއަހަރު ހަމަވުމުން، މެސީ ނިންމީ އެއްބަސްވުން އައު ނުކުރުމަށެވެ. އެއާއެކު އަނެއްކާ ވެސް ބާސެލޯނާ އިން ވަނީ އަލުން މެސީ އެ ކުލަބަށް ގެނައުމުގެ މަސައްކަތް ކޮށްފަ އެވެ. ނަމަވެސް އެކަމުގައި އެކުލަބަށް އެއްވެސް އަލި މަގެއް ފެނިފައި ނުވާއިރު، މެސީ ނިންމީ އެމެރިކާ ލީގުގެ އިންޓަ މިއާމީ އަށް ބަދަލުވުމަށެވެ. މެސީ އިންޓަ މިއާމީ އަށް ބަދަލުވީ ދެ އަހަރަ ބައިގެ އެއްބަސްވުމެއްގެ ދަށުންނެވެ.

މެސީގެ ފުޓުބޯޅައިގެ ދިގު ކެރިއަރުގެ ގިނަ ކާމިޔާބީތައް ގުޅިފައި ވަނީ ބާސެލޯނާއާ އެވެ. ބާސެލޯނާގެ ސަޕޯޓަރުންގެ ހިތުގައި އަދިވެސް މެސީ އަށް ޚާއްސަ ލޯތްބެއް އޮވެ އެވެ. ބާސެލޯނާ ދޫކޮށް ޕީއެސްޖީ އަށް ބަދަލުވި ފަހުން ވެސް މެސީ ވަނީ އެކި ފަހަރު މަތިން ބާސެލޯނާ އަށް ދަތުރު ކޮށްފަ އެވެ. އެ ދަތުރުތަކުގައި އޭނާ ވަނީ އެ ކުލަބުގެ ކުޅުންތެރިންނާއެކު ވެސް ވަގުތު ހޭދަކޮށްފަ އެވެ.