މުވާސަލާތީ ގުޅުން ކަނޑާލުމާއެކު، ޣައްޒާގެ އެމްބިއުލާންސްތައް މިސްރާބު ދެނެގަންނަނީ ހަމަލާގެ ދުންގަނޑުން!

ޣައްޒާއަކަށް ގޮތެއް ހުހެއް ނުވާނެއެވެ. ކުރިމަތިލާން ޖެހުނު ކޮންމެ ކަމަކާ ސާބިތުކަމާއެކު ކުރިމަތިލުމާއި، ހުރަސްކުރަން ޖެހޭ އަޑިގުޑަންތައް ހުރަސްކުރުމުގައި ޣައްޒާގެ ފަހުލަވާލުންގެ ކިބައިން ފެންނަ ހިތްވަރެއް ދުނިޔޭގެ އެހެން އެއްވެސް ހިސާބަކުން ނުފެނެއޭ ދެންނެވުމަކުން ގޯހެއް ނެތެވެ. ޔަހޫދީންގެ ނުބައި ނުލަފާ ރޭވުންތަކުން މުޅި ޣައްޒާއާއި ދުނިޔެ ވަކިކޮށް، އެކަހެރި ކޮށްލާފައި ވާއިރު، އެއީވެސް ޣައްޒާގެ ރަށްވެހިންނަށް ލިބުނު ނިކަމެތި ކަމެއްގެ ގޮތުގައި އެމީހުންނެއް ނުދެކެއެވެ. އެ ހާލަތުގައިވެސް ދިރިއުޅުން ކުރިއަށްގެންދިއުމުގެ ވަރުގަދަ އަޒުމުގައި، އައު ރާސްތާތައް ހޯދައިގެން ފިޔަވަޅުތައް އަޅަންފެށީ ކުރިޔަށެވެ. 

ޣައްޒާއިން މުވާސަލާތީ ޚިދުމަތް ކަނޑާލާފައި ވާއިރު، ސިއްހީ ނިޒާމު އޮތީ އިނދަޖެހިފައެވެ. އުދުވާންތަކުގައި ބޮޑެތި އަނިޔާތައް ލިބޭ މީހުންގެ ފަރުވާއަށްވެސް އެކަމުގެ ސަބަބުން ދަނީ ހުރަސްތަކާ ކުރިމަތިވަމުންނެވެ. އެގޮތުން، އަވަސް ފަރުވާ ބޭނުންވާ މީހުން ބަލައި އެމްބިއުލާންސްތައް ދަތުރުކުރަނީ، އިޒްރޭލުން ދޭ ހަމަލާތައް އަމާޒުވާ ސަރަހައްދުތަކުން އަރަމުންދާ ދުންގަނޑަކަށް ބަލައިގެންނެވެ. ދުންގަނޑެއް ފެނިއްޖެނަމަ އެ ދިމާއަކަށް އެމްބިއުލާންސް ދުއްވަނީއެވެ.

ސިއްހީ ފަރުވާ ދިނުމުގައި ހަރަކާތްތެރިވާ ނަސީމް ހަސަން ބުނިގޮތުގައި، އޮކްޓޯބަރު 28 ވަނަ ދުވަހު ފޯނާއި އިންޓަރނެޓުގެ ޚިދުމަތް ކަނޑާލި ހިސާބުން، ޣައްޒާއަށް ޖެހިފައި އޮތް މުސީބާތް ވަނީ ވަކިން ބޮޑުވެފައެވެ.

2.3 މިލިއަން މީހުންގެ އާބާދީއެއް ދިރިއުޅެމުންދާ ޣައްޒާއަށް އަމާޒުކޮށް، އޮކްޓޯބަރ 7 ވަނަ ދުވަހުން ފެށިގެން އިޒްރޭލުން ދެމުން ގެންދާ ހަމަލާތަކުގައި ފުރާނަ ގެއްލިދިޔަ މީހުންގެ އަދަދު މިހާރު ވަނީ 8500އަށްވުރެ މައްޗަށް އަރާފައެވެ. ޒަޚަމްވި މީހުންގެ އަދަދު 20000އާ ގާތްކުރާއިރު، ހޮސްޕިޓަލުތަކުގައި އެކަށީގެންވާ ފަރުވާއެއް ދެވޭކަށް ނެތެވެ. ފެނާއި ކަރަންޓުގެ ޚިދުމަތުގައިވެސް އިޒްރޭލުން އަތް އަޅައިގެން އޮތްއިރު، ޣައްޒާއަށް ބޭނުންވާ ހަކަތައިގެ ސަޕްލައިއަށްވެސް ޔަހޫދީން ވަނީ އަތްގަދަކޮށްފައެވެ.

އެންމެ ފަހުގެ އުދުވާންތައް ފެށިފަހުން އެކަނިވެސް ޣައްޒާއިން 1.4 މިލިއަނަށްވުރެ ގިނަ މީހުންގެ ގެދޮރު ގެއްލިފައިވާއިރު، އެތައް ބަޔަކު ދިރިއުޅެމުން ދަނީ އިންސާނަކު ދިރިއުޅެން ހެޔޮވާ ވަރަށްވުރެ ނިކަމެތި ހާލެއްގައެވެ. އިޒްރޭލުން ހިންގަމުންދާ ގަތުލުއާންމުގެ ނުސީދާ ނަތީޖާއަކަށް ވެފައިވަނީ މުޅި ޣައްޒާގައި ބަލިމަޑުކަން ފެތުރިގެން ދިޔުމެވެ. މިހާރުވެސް އެކި ކަހަލަ ހުމާއި، ރޯގާ އަދި ބަނޑުގެ ބަލިތައް ތަހައްމަލު ކުރަމުންދާ މީހުންގެ އަދަދު އިންތިހާއެވެ. ހޮސްޕިޓަލުތަކުން މިހާރު ބަލައިގަންނަނީ، އުދުވާންތަކުގައި ބޮޑެތި އަނިޔާތައް ލިބި، ސަރޖަރީ ހަދަންޖެހޭ ހާލުގައި ތިބި މީހުން އެކަންޏެވެ. ދާއިމީ ބަލިތަކަށް ބޭސްކުރާ މީހުންނަށް ޚިދުމަތް ދިނުން މަޑުޖައްސާލާފައި އޮތްއިރު، އިންސާނަކަށް ވީތީ ލިބިދޭންޖެހޭ އެންމެ އަސާސީ ހައްގުތައް، ޣައްޒާގެ ރަށްވެހިންނަށް ހޯދައިދިނުމަށް އަމަލީގޮތުން ފިޔަވަޅެއް އަޅަންކެރުނު ހަމަ އެންމެ ގައުމެއް، މުއައްސަސާއެއް ނުވަތަ އިދާރާއެއްވެސް އަދުގެ ދުނިޔޭގައި ނެތީތޯއެވެ؟