ބައިނަލްއަޤުވާމީ މައްސަލަތަކުގައި މިދިޔަ 4 އަހަރު ކުޑަކުދިން މަރުވި އަދަދަށް ވުރެ ގިނަ ކުދިން މިހާތަނަށް ޣައްޒާގައި މަރުވެފައިވާ ކަމަށް މީޑިއާ ރިޕޯޓްތައް ބުނެފިއެވެ.

މީޑިއާތަކުން ރިޕޯޓްކޮށްފައިވާ ގޮތުން ފާއިތުވި 3 ހަފްތާގައި ޣައްޒާގައި މަރުވި ކުޑަކުދިންގެ އަދަދު 3000 އަށް ވުރެ އިތުރެވެ. ތަފާސްހިސާބުތަކަށް ބަލާއިރު 2022ގައި 24 ޤައުމުން ޖުމްލަ 2985 ކުޑަކުދިން އެކި މައްސަލަތަކުގައި މަރުވެފައިވެއެވެ. 2021ގައި 2515 ކުދިން އަދި 2020ގައި 2674 ކުދިން ވަނީ މަރުވެފައެވެ. 2019ގައި 4019 ކުދިން މަރުވެފައިވާއިރު މިއީ އެ އަހަރުތަކުގައި ދުނިޔޭގެ އެކި ކަންކޮޅުތަކުގައި ހިނގި ހަމަނުޖެހުންތަކުގައި ކުޑަކުދިން މަރުވި މީހުންގެ އަދަދުކަން ފާހަގަކޮށްލެވެއެވެ.

ެިއިސްރާއީލުން ޣައްޒާ އަށް ދެމުންދާ ލާއިންސާނީ ހަމަލާތަކުގައި އެތައް ކުޑަކުދިންނެއް މަރުވަމުންދާއިރު ބައިނަލްއަޤުވާމީ އިދާރާތަކުން ވެސް އެކަމާއި އެކަށީގެންވާ ގޮތުގައި އަޑު އުފުލަމުންނެއް ނުދެއެވެ. ފާއިތުވި 15 އަހަރު ވެސް ފަލަސްތީނާއި އިސްރާއީލާ ދެމެދު ހަމަލާތައް ބަދަލުކުރަމުންދާއިރު ދޭތެރެ ދޭތެރެއިން މަސްރަހު ހޫނުވެ ހަމަލާތައް އިތުރަށް ވަރުގަދަވެފައިވެއެވެ. މި އަހަރުގެ އޮކްޓޯބަރު މަހުގެ 7 ވަނަ ދުވަހު ހަމަލާތައް ބަދަލު ކުރަން ފެށީ ހަމާސް އިން ކުއްލި ގޮތަކަށް އިސްރާއީލަށް ދިން ހަމަލާތަކާއި އެކުގައެވެ.

އެއަށް ފަހު އިސްރާއީލުން ވަނީ ފަލަސްތީނަށް މެދުނުކެނޑި ވަރުގަދަ ހަމަލާތަކެއް ދޭން ފަށާފައެވެ. މިހާތަނަށް މި ހަމަލާތަކުގައި އިސްރާއީލުން 1400 މީހުން މަރުވެފައިވެއެވެ. އަދި ޣައްޒާ އިން 7950 މީހުން ވަނީ ޝަހީދުވެފައެވެ.