ހައްދު ފަހަނައަޅާފައިވާ ޔަހޫދީ އިސްރާއީލުން ފަލަސްތީނުގެ ޣައްޒާއަށް އަމާޒުކޮށް ދެމުންދާ ހަމަލާތަކުގެ ސަބަބުން ޣައްޒާގައި ތާށި ވެފައި ތިބި ޢާއްމު ރައްޔިތުންނަށް އެހީތެރިވެވޭނެ ގޮތްތައް ދަނީ ބަންދުވަމުން ކަމަށާއި، އެމީހުން މިހާރުތިބީ ބަނޑުހައި ހޫނުކަން މަތީ ކަމަށް އދ ގެ ފަލަސްތީން ރެފިއުޖީ އޭޖެންސީ (ޔޫއެންއާރްޑަބްލިޔުއޭ) ގެ ކޮމިޝަނާ ޖެނެރަލް ފިލިޕް ލަޒަރިނީ ވިދާޅުވެއްޖެއެވެ.
ފިލިޕް އާ ހަވާލާދީ އަލްޖަޒީރާއިން ރިޕޯޓްކޮށްފައިވާގޮތުގައި ޣައްޒާގެ ރައްޔިތުންނަށް އެ އޭޖެންސީން ދެމުންގެންދިޔަ އެހެން ހިދުމަތްތައްވެސް މިހާރު ދެވެން ނެތް ކަމަށާއި ހަނގުރާމައިގައި ޣައްޒާގެ ތާށިވެފައި ތިބި މީހުންނަށް ކާބޯތަކެތީގެ ދަތިކަން ކުރިމަތިވެފައިވާ ކަމަށް އޭނާ އިތުރަށް ވިދާޅުވިއެވެ.
އަލް އަހްރަމް ނޫހުންވެސް ރިޕޯޓުކޮށްފައިވާ ގޮތުގައި ޣައްޒާގައި ޢާއްމުންނަށް އެހީތެރިކަން ފޯރުކޮށްދޭ އެ އޭޖެންސީގައި ހުރި ތެޔޮ ވެސް މިހާރު އަންނަނީ ހުސްވަމުންނެވެ. ހޮސްޕިޓަލްތަކާ ބޭކަރީތައް ހިންގުމަށްވެސް ކޮންމެ ދުވަހަކު 160000 ލީޓަރު ތެޔޮ ޣައްޒާއަށް ބޭނުންވާކަން ފިލިޕްއާ ފާހަގަ ކުރެއްވި ކަމަށް އެނޫހުގައި ބުނެފައިވެއެވެ.
އެޖެންސީގެ މުވައްޒަފުން ބުނާ ގޮތުން އެ މީހުންގެ ޣައްޒާގައި ކުރިޔަށް ގެންދާ އޮޕަރޭޝަންތައް މިހާރު ހުރީ ހުއްޓޭ ހިސާބުގައެވެ. އަދި ޣައްޒާގެ އާންމު ރައްޔިތުން މިހާރު ތިބީ ބަނޑުހައި ހޫނު ކަންމަތީގައި ކަމަށް އެ އޭޖެންސީން ބުނެއެވެ. މިއީ ބަނޑުހައި ހޫނުކަމުގެ މައްސަލަ އެ އޭޖެންސީން ރިޕޯޓުކޮށްފައިވާ ފުރަތަމަ ފަހަރެވެ.
މި މަހުގެ ހަތް ވަނަ ދުވަހު އިސްރާއީލުން ޣައްޒާއަށް ދޭން ފެށި ހަމަލާތަކުގައި އެ އޭޖެންސީގެ 57 މެމްބަރުން މަރުވެފައިވާ ކަމަށްވެސް ފިލިޕް ވިދާޅުވިއެވެ.
ބައިނަލްއަގުވާމީ ގާނޫނުތަކުގެ ތެރެއިން ޣައްޒާގެ އާންމު ރައްޔިތުން ރައްކާތެރިކޮށް ސްކޫލްތަކާއި ހޮސްޕިޓަލްތަކަށް ހަމަލާދިނުން އިސްރާއީލުން ހުއްޓާލަން ޖެހޭ ކަމަށް އދ ގެ ހާއްސަ އިންވެސްޓިގޭޓަރަކު ހޯމަ ދުވަހު ވިދާޅުވިއެވެ.
އިސްރާއިލުން ހަމަލާތައް ދޭން ފެށިފަހުން އދ ގެ އޭޖެންސީގެ ހިޔާވަހިކަން އެތައް ސަތޭކަ މީހުން ވަނީ ހޯދާފައެވެ. ފަލަސްތީނުގެ ސިއްހީ ވުޒާރާއާ ހަވާލާދީ އަލްއަހްރަމް ނޫހުން ރިޕޯޓުކުރާ ގޮތުގައި އިސްރާއީލުގެ ލާއިންސާނީ ހަމަލާތަކުގެ ސަބަބުން މިހާތަނަށް ޣައްޒާގެ 7000 މީހުން ވަނީ ޝަހީދުވެފައެވެ. އަދި 19000 މީހުން ވަނީ ޒަހަމްވެފައެވެ.
