އިސްރާއީލުން ފަލަސްތީނަށް ދެމުންދާ ހަމަލާތަކުގައި ޝަހީދުވި މީހުންގެ އަދަދު 7000ށް އަރައިފި

އިސްރާއީލުން ފަލަސްތީނަށް ދެމުންދާ ހަމަލާތަކުގައި ޝަހީދުވި މީހުންގެ އަދަދު 7000 މައްޗަށް އަރައިފިއެވެ.

ބައިނަލްއަގުވާމީ ނޫސް އިދާރާއެއް ކަމަށްވާ އަލްޖަޒީރާ، އޮފިޝަލުންނާ ހަވާލާދީ ބުނެފައިވަނީ މިދިޔަ 24 ގަޑިއިރަކީ އެންމެ ގިނަ މީހުން ޣައްޒާގައި މަރުވި 24 ގަޑިއިރު ކަމަށެވެ. މީގެ ކުރިން އަދާ ހަމަތައް ހިއްސާކުރިއިރު، މަރުވި މީހުން އަދަދަކީ 6546އެވެ. މަރުވި މީހުންގެ ތެރޭގައި ކުޑަކުދިންނާއި އަންހެނުން ގިނަ އަދަދަކަށް ހިމެނޭއިރު 400އަށްވުރެ ގިނަ ޓާގެޓަށް އަންގާރަ ދުވަހު އެކަނި ވެސް ވަނީ ހަމަލާ ދީފައެވެ. އިސްރާއީލުގެ ހަމަލާތައް ވަރުގަދަކޮށްފައި ވަނީ އެއީ ހަމާސްގެ އައްޑާތަކަށް ދޭ ހަމަލާތަކެއް ކަަމަށް ބުނެއެވެ.

ފާއިތުވި 24 ގަޑިއިރު ތެރޭގައި މަރުވި މީހުންގެ އަޕްޑޭޓްތައް އަދިވެސް ލިބެމުންދާއިރު، ރިޕޯޓްތައް ބުނާގޮތުން މި ހަމަލާތަކުގައި މަރުވި މީހުންގެ އަދަދު ވަނީ 700ން މައްޗަށް އަރާފައެެވެ.

އޮކްޓޯބަރ މަހުގެ 7 ވަނަ ދުވަހުން ފެށިގެން އިސްރާއީލުން ފަލަސްތީނަށް މެދުކެނޑުމެއްނެތި ހަމަލާތައް ދެމުންދާއިރު، ސިއްހީ ޚިދުމަތްދޭ ތަންތަނަށް އަމާޒުކޮށް 72 ހަމަލާއެއް ފޮނުވާލާފައިވާކަމަށް ޑަބްލިޔުއެޗްއޯއިން ބުނެއެވެ. އަދި މި ހަމަލާތަކުގައި ސިއްހީ ޚިދުމަތްދޭ 34 ތަނެއް ހަލާކުވެފައި ވާކަމަށް ޑަބްލިޔުއެޗްއޯއިން ބުނެއެވެ.