ޖާސޫސް ކުރުމުގެ ތުހުމަތުގައި، އިންޑިއާ ނޭވީގެ ކުރީގެ 8 އޮފިސަރަކަށް ގަތަރުގައި މަރުގެ ހުކުމް އިއްވައިފި

ޖާސޫސް ކުރުމުގެ ތުހުމަތުގައި، އިންޑިއާގެ ނޭވީގެ ކުރީގެ 8 އޮފިސަރަކަށް ގަތަރުގައި މަރުގެ ހުކުމް އިއްވައިފިއެވެ. މި ހުކުމުގެ ސަބަބުން ދެ ގައުމުގެ ދެމެދުގައި އޮތް ޑިޕްލޮމެޓިކް ގުޅުމަށްވަނީ ބުރޫއަރާފައެވެ.

އިންޑިއާގެ ފޮރިން މިނިސްޓްރީ މެދުވެރިކޮށް، އެ ގައުމުގެ ސަރުކާރުން ވަނީ މައްސަލައިގެ ސީރިއަސްކަމަށް ބަލައި، އެ އަމުރާ ދެކޮޅުކަން އަންގާފައެވެ.

އިންޑިއާގެ މުހިންމު ހަނގުރާމަމަތީ އުޅަނދުތަކަށް ކޮމާންޑްކުރުމުގެ ތާރީޚެއް އޮތް ވަރަށް ޝަރަފްވެރި އޮފިސަރުންވެސް މީގެތެރޭގައި ހިމެނޭއިރު، މިއީ ގަތަރުގެ ސިފައިންނަށްވެސް ތަމްރީނާއި އެއާ ގުޅުންހުރި ޚިދުމަތްތަކަށް ޚާއްސަ އަމިއްލަ ކުންފުންޏެއް ކަމަށްވާ ދަހްރާ ގްލޯބަލް ޓެކްނޮލޮޖީސް އެންޑް ކޮންސަލްޓެންސީ ސަރވިސަސްގައި ވަޒީފާ އަދާކުރާ މީހުންނެވެ.

މި 8 އޮފިސަރުންގެ މައްޗަށް މަރުގެ އަދަބު އިއްވިކަން މީޑިއާތަކަށް ތިލަވެފައި ވީނަމަވެސް، އެ ހުކުމްގެ މާބޮޑު ތަފްސީލެއް އަދި ހާމަވެފައެއް ނުވެއެވެ.

އެ މީހުން ބަންދުގައި ބޭތިއްބުމަކީ އިންޑިއާގެ ކަމާބެހޭ ފަރާތްތަކުން ކަންބޮޑުވާ ކަމެއް ކަމަށްވާއިރު، އެ މީހުންގެ ކަފާލާތުގެ އެދުމަށް ތަކުރާރުކޮށް ގަތަރުން އިންކާރުކޮށް، ގަތަރުގެ ކަމާބެހޭ ފަރާތްތަކުން އެ މީހުންގެ ބަންދުގެ މުއްދަތު ވަނީ އެތައް ފަހަރެއްގެ މަތިން އިތުރުވެސް ކޮށްފައެވެ.

މިއަދު ގަތަރުގެ ކޯޓް އޮފް ފަސްޓް އިންސްޓަންސްއިން ނެރުނު ހުކުމަކީ އޮބްޒާވަރުންނާއި އޮފިޝަލުން ހައިރާންކޮށްލި ހުކުމެކެވެ.

އިންޑިއާގެ ޚާރިޖީ ވުޒާރާއިން ނެރުނު ބަޔާނެއްގައި ވަނީ، މަރުގެ އަދަބުގެ ހުކުމާމެދު ވަރަށް ބޮޑަށް ހިތާމަ ފާޅުކޮށް، އެ މައްސަލާގައި ވަކާލާތު ކުރާނެކަމުގެ ޔަގީންކަން ދީފައެވެ. އަދި މިކަމަށް ވަރަށް ބޮޑަށް ފާރަވެރިވާނެ ކަމަށް އެމިނިސްޓްރީން ވަނީ ބުނެފައެވެ. އަދި ހާލަތު ވަރަށް ގާތުން ބަލަމުން އަންނަ ކަމަށާއި، މަރުގެ ހުކުމް އިއްވި މީހުންގެ އާއިލާގެ މެންބަރުންނާއި ގާނޫނީ މަންދޫބުންނާ ވާހަކަދައްކަމުން އަންނަ ކަމަށް އެ ބަޔާނުގައި ވެއެވެ.

އަދި މިކަމުގައި ޝާމިލުވާ ފަރާތްތަކަށް ފުރިހަމަ ކޮންސިއުލަރ އަދި ގާނޫނީ އެހީތެރިކަން ފޯރުކޮށްދިނުމަށް އިންޑިއާ ސަރުކާރުން ފުރިހަމައަށް މަސައްކަތްކުރަމުން ދާނެކަމަށާއި، މިމައްސަލަ ގަތަރުގެ ކަމާބެހޭ ފަރާތްތަކާވެސް ހިއްސާކުރާނެ ކަމަށް އެ ބަޔާނުގައި ވެއެވެ.