އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ނިންމުމުގެ ފުރުސަތެއް ލިބިފައިވާ ކަމަށް، ޤަތަރުގެ ބޮޑު ވަޒީރު ޝައިޚް މުޙައްމަދު ބިން ޢަބްދުއް ރަޙުމާން ބިން ޖާސިލް އަލް ޘާނީ ވިދާޅުވެއްޖެ އެވެ.

ޤަތަރުގެ ބޮޑު ވަޒީރު ވިދާޅުވީ ޣައްޒާގައި ހިނގަމުންދާ ހަނގުރާމަ ނިމުމަކަށް ގެނައުމަށް އެމެރިކާގެ ރައީސް ޑޮނަލްޑް ޓްރަމްޕް ހުށަހަޅުއްވާފައިވާ ޕްލޭނަކީ މެދުވެރިންގެ މައިގަނޑު މަޤުސަދުތައް ކަމަށްވާ، ފަލަސްޠީނުގެ ރައްޔިތުން ޝަހީދުވުމާއި، ނަސްލު ނައްތާލުން ހުއްޓުވުމަށް މަގު ފަހު ކޮށްދޭ ޕްލޭނެއް ކަމަށެވެ.

ބުދަ ދުވަހު އަލް ޖަޒީރާ އަށް ދެއްވި އިންޓަވިޔުއެއްގައި ޤަތަރުގެ ބޮޑު ވަޒީރު ވިދާޅުވީ، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވެސް ތާއީދު ކުރައްވާފައިވާ އެ ޕްލޭން ހަމާސްގެ ޓީމާ ހިއްސާ ކޮށްފައިވާ ކަމަށާއި، މައިގަނޑު ކަންތައްތަކާ މަޝްވަރާ ކުރައްވާފައިވާ ކަމަށެވެ.

މީގެ އިތުރުން ޤަތަރުގެ ބޮޑު ވަޒީރު ވިދާޅުވެފައި ވަނީ އެ ޕްލޭންގައި އަމަލީ އަދި ތަންފީޒު ކުރުމުގެ ގޮންޖެހުންތަކެއް ހުރި ނަމަވެސް، އެންމެ އަވަސް އިސްކަމެއް ދޭން ޖެހޭ ކަމެއް ކަމުގައިވާ ޣައްޒާގައި ލޭއޮހޮރުވަން ހުއްޓުމަށް މަގު ފަހި ކޮށްދޭ ކަމަށެވެ.

އެމެރިކާގެ ރައީސް ޓްރަމްޕް ހުށަހަޅުއްވާފައިވާ 20 ނުކުތާގެ މައްޗަށް އެކުލެވިގެންވާ ޕްލޭނަށް ސައުދީ އަރަބިއްޔާ އާއި، ޔޫއޭއީ، މިޞްރު، ތުރުކީ އަދި އިންޑޮނޭޝިއާ ފަދަ ޤައުމު ތަކުން ވަނީ ތާއީދު ކޮށްފަ އެވެ. އަދި އެ ހުށަހެޅުމަށް ޤައުމު ތަކުން ވަނީ މަރުޙަބާ ވެސް ކިޔައިފަ އެވެ. އެ ޕްލޭންގެ ދަށުން އެއްބަސްވުމަކަށް އާދެވުމުން، ޣައްޒާ އަށް ދެމުން އަންނަ ހަމަލާތައް ހުއްޓި، ފުރިހަމަ އެހީތެރިކަން ޣައްޒާ އަށް ލިބިގެން ދާނެ އެވެ.

އެމެރިކާ އިން ހުށަހަޅާފައިވާ މި ޕްލޭން މިހާރު ވަނީ ހަމާސް ޖަމާއަތާ ވެސް ހިއްސާ ކޮށްފަ އެވެ. ނަމަވެސް، މިހާތަނަށް ހަމާސް އިން އެކަމަށް ޖަވާބެއް ދީފައި ނުވާއިރު، އެމެރިކާގެ ރައީސް ޓްރަމްޕް ވަނީ ހަމާސް އަށް ވަކި ވަގުތެއް ދީފައިވާ ކަމަށް ވިދާޅުވެފަ އެވެ.

އިތުރަށް ޤަތަރުގެ ބޮޑު ވަޒީރު ވިދާޅުވެފައިވާ ގޮތުގައި، އިސްރާއީލްގެ އަސްކަރިއްޔާ ފަހަތަށް ޖެހުމާއި، ކުރި މަގުގައި ފަލަސްޠީނުގެ އިދާރީ ހިންގުން އޮންނާނެ ގޮތުގެ ތަފްސީލުތައް އިތުރަށް ސާފުކޮށް، އެކަމާ ގުޅޭ ގޮތުން ވާހަކަ ދައްކަން ޖެހޭނެ އެވެ.

ޤަތަރަކީ، އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ނިމުމަކަށް ގެނައުމަށް މެދުވެރިއެއްގެ ދައުރު އަދާ ކުރަމުން އަންނަ ޤައުމެވެ. ދާދި ފަހުން އިސްރާއީލް އިން ވަނީ ޤަތަރުގައި ތިބި ހަމާސް ޖަމާއަތުގެ ސިޔާސީ ގޮފީގެ އިސްވެރިންނަށް އަމާޒުކޮށް ހަމަލާ ވެސް ދީފަ އެވެ. ނަމަވެސް، ފަހުން ޓްރަމްޕްއާއެކު އޮތް ބަައްދަލުވުމުގައި ނަތަންޔާހޫ ވަނީ ޤަތަރުގެ ބޮޑު ވަޒީރު ކިބައިން މައާފަށް އެދިވަޑައިގެންފަ އެވެ.