ދޯހާ އަށް ވަޑައިގަންނަވާ އަރަބި އަދި އިސްލާމީ ގައުމުތަކުގެ މުހިންމު ވެރިންގެ ތެރޭގައި މުއިއްޒުގެ ނަން ބައިނަލް އަގްވާމީ މީޑިއާގައި ފާހަގަ އެއް ނުކުރޭ

އިސްރާއީލުން ދޯހާ އަށް ދިން އުދުވާނީ ހަމަލާ އާ ގުޅިގެން އަރަބި އަދި އިސްލާމީ ގައުމުތަކުގެ ވެރިން ދޯހާ އަށް ވަޑައިގަންނަވަމުން ގެންދަވާ ކަމަށް ބައިނަލް އަގްވާމީ މީޑިއާ ގައި ކަވަރު ކުރަމުންދާއިރު އޭގެ ތެރޭގައި ރައީސް މުއިއްޒުގެ ނަން ހިމަނާފައި ނުހުންނަކަން ފާހަގަ ފާހަގަ ވެއްޖެއެވެ.

މެދުއިރުމަތީގެ އެންމެ މަގުބޫލު އެއް މީޑިއާ ކަމަށްވާ ސައުދީ ސަރުކާރުން ފަންޑު ކުރާ އަލް-އަރަބިއްޔާ އިން މި ސަމިޓުގެ ޚަބަރުތައް ގެނެސްދެމުންދާއިރު، ސަމިޓަށް ވަޑައިގަންނަވާ މުހިންމު ލީޑަރުގެ ގޮތުގައި ތަކުރާރުކޮށް ފާހަގަ ކޮށްފައިވަނީ، އީރާނުގެ ރައީސް މަސްޢޫދު ޕެޒެޝްކިއަން، ޢިރާޤުގެ ބޮޑުވަޒީރު މުޙައްމަދު ޝިޔާ އަލް-ސުދާނީ އަދި ތުރުކީގެ ރައީސް ރަޖަބް ޠައްޔިބް އުރުދުޣާން ފަދަ ފަރާތްތަކެވެ.

އޭގެ އިތުރުން ފަލަސްތީނުގެ ރައީސް މަޙްމޫދު ޢައްބާސް ވަނީ އާދިއްތަ ދުވަހު ދޯހާ އަށް ވަޑައިގެންފައިވާ ކަމަށް ވެސް ރިޕޯޓު ކޮށްފައި ވެއެވެ.

ރައީސް މުއިއްޒު ވެސް ވަނީ އާދިއްތަ ދުވަހު މި ސަމިޓުގައި ބައިވެރިވެވަޑައިގަތުމަށް ގަތަރަށް ވަޑައިގެންފައެވެ.

ދޯހާގައި ހޯމަ ދުވަހު ކުއްލި އަރަބި-އިސްލާމީ ސަމިޓެއް ބޭއްވުމަށް ބޭއްވުމަށް ނިންމާފައިވަނީ ފާއިތުވި ހަފުތާގައި ގަތަރުގައި ތިބި ހަމާސްގެ ލީޑަރުންނަށް އަމާޒުކޮށް އިސްރާއީލުން ދިން ނުރައްކާތެރި ހަމަލާއާ ގުޅިގެންނެވެ.

އެމެރިކާގެ ގާތް އެކުވެރިއެއްގެ ގޮތުގައި ބެލެވެމުން އައި ގަތަރަށް އެމެރިކާގެ އެންމެ ގާގް އެކުވެރިޔާ އިސްރާއިލުން ދިން މި ނުރައްކާތެރި މަރުގެ ހަމަލާއާ ގުޅިގެން އިސްރާއީލަށް ގިނަ ފާޑުކިޔުންތައް އަމާޒުވެފައިވެއެވެ. މީގެ ތެރޭގައި އެމެރިކާގެ ރައީސް ޑޮނަލްޑް ޓްރަމްޕްގެ ފާޑުވިދާޅުވުން ވެސް ހިމެނެއެވެ.

އެހެން ނަމަވެސް މިހާރު އިސްރާއީލުގައި ހުންނެވި އެމެރިކާގެ ޚާރިޖީ ވަޒީރު، ދަތުރުފުޅު ފެއްޓެވުމުގެ ކުރިން މީޑިއާ އަށް ވިދާޅުވީ، މިހަމަލާގެ ސަބަބުން އެމެރިކާ އިން އިސްރާއީލާ އެކު އޮންނަ ގާތް ގުޅުމަށް ބަދަލެއް ނާންނާނެ ކަމަށެވެ.

ހޯމަ ދުވަހުގެ މި ކުއްލި ބައްދަލުވުމަކީ ގަލްފު ޤައުމުތަކުގެ އެއްބައިވަންތަކަން ދައްކުވައިދޭ މުހިންމު ބައްދަލުވުމަކަށްވާނެއެވެ. އަދި މި ބައްދަލުވުމުން އިސްރާއީލަށް ބައިނަލްއަގްވާމީ އިތުރު ޕްރެޝަރތައް ކުރިމަތިވާނެ ކަމަށް ވަނީ ބެލެވިފައެވެ. މިހާރުވެސް ޣައްޒާގައި އިސްރާއީލުން ހިނގަމުންދާ ހަނގުރާމައާއި، ޣާއްޒާގެ ރައްޔިތުންނަށް އެ ގައުމުން ކުރިމަތި ކޮށްފައިވާ މުސީބާތްތަކުގެ ސަބަބުން، އިންސާނީ ކާރިސާ ނިމުމަކަށް ގެނައުމަށް އިސްރާއީލަށް ބޮޑެތި ފާޑުކިޔުންތައް ވަނީ އަމާޒު ވެފައެވެ.

މި ސަމިޓުގައި ބައިވެރިވާ ގައުމުތަކުން މަޝްވަރާ ކުރާނެ ކަމަށް ބެލެވެނީ އާދިއްތަ ދުވަހު ސަމިޓަށް ތައްޔާރު ވުމުގެ ގޮތުން ބޭއްވުނު މިނިސްޓީރިއަލް ބައްދަލުވުމުގައި އެކުލަވާލެވުނު ޑްރާފްޓް ގަރާރާ ގުޅޭގޮތުންނެވެ.

މި ޑްރާފްޓުގައި ބަޔާންކޮށްފައިވާ ގޮތުގައި ފާއިތުވި ހަފުތާގައި ދޯހާގައި އިސްރާއީލުން ދިން ހަމަލާ އާއި އިސްރާއީލުގެ އެހެނިހެން ޢަމަލުތަކުން އަރަބި ޤައުމުތަކާއެކު އިސްރާއީލުން ގުޅުން ޢާއްމު ހާލަތަކަށް ގެނައުމަށް ކުރެވޭ މަސައްކަތްތަކަށް ވަނީ ނުރައްކާވެފައެވެ.

ގަތަރަށް އިސްރާއީލުން ދިން ހަމަލާ އާއި "އިސްރާއީލުގެ އަދާވާތްތެރި ޢަމަލުތައް ކަމުގައިވާ ނަސްލު ނައްތާލުމާއި، ބަނޑަށްޖެއްސުމާއި، ހިޞާރުކުރުމާއި، ފަލަސްތީނުގެ ބިމުގައި ޔަހޫދީން އާބާދު ކުރުން ފަދަ ސިޔާސަތުތަކުން ސަރަޙައްދުގައި ސުލްޙަވެރިކަމާއި އެކުއެކީގައި ދިރިއުޅުމުގެ ފުރުޞަތުތަކަށް ނުރައްކާވެއެވެ. އަދި އިސްރާއީލާއެކު ގުޅުން ޢާއްމު ހާލަތަކަށް ގެނައުމުގެ މަގުގައި ހާސިލުކުރެވިފައިވާ ހުރިހާ ކަމަކަށް ނުރައްކާވެއެވެ. މީގެ ތގެ ތެރޭގައި މިހާރު ވެފައިވާ އެއްބަސްވުންތަކާއި ކުރިމަގުގައި ވެވޭނެ އެއްބަސްވުންތައް ހިމެނެއެވެ." ޑްރާފްޓުގައި ބަޔާން ކޮށްފައި ވެއެވެ.

އާދިއްތަ ދުވަހު ބޭއްވުނު މިނިސްޓީރިއަލް ބައްދަލުވުމުގައި ވާހަކަ ދައްކަވަމުން ގަތަރުގެ ބޮޑުވަޒީރު ބައިނަލްއަޤްވާމީ މުޖުތަމަޢުއަށް ގޮވާލެއްވީ "ދެފުށް ދޮގޮތް ސިޔާސަތު" ދޫކޮށްލައި އިސްރާއީލުގެ ޢަމަލުތަކަށް ޖަވާބުދާރީ ކުރުވުމަށެވެ.

"ބައިނަލްއަޤްވާމީ މުޖުތަމަޢު އިން ދެފުށް ދެގޮތް ސިޔާސަތު ގެންގުޅުން ހުއްޓާލައި، އިސްރާއީލުން ހިންގާފައިވާ ހުރިހާ ކުށްތަކަކަށް އަދަބު ދިނުމުގެ ވަގުތު އައިސްޖެހިއްޖެ،" ޝައިޚް މުޙައްމަދު ބިން ޢަބްދުއްރަޙްމާން އާލް ޘާނީ މި ބައްދަލުވުމުގައި ވިދާޅުވިއެވެ. އަދި އިތުރަށް ވިދާޅުވީ ޣައްޒާ ގައި އިސްރާއީލުން ހިންގަމުންދާ "ފަނާ ކޮށްލުމުގެ ހަނގުރާމަ" ކާމިޔާބު ނުވާނެ ކަމަށެވެ.

"އިސްރާއީލަށް މިކަން ކުރިއަށް ގެންދިއުމަށް ހިތްވަރު ލިބެނީ ބައިނަލްއަޤްވާމީ މުޖުތަމަޢުން ހަނު ތިބުމާއި، އިސްރާއީލު ޖަވާބުދާރީ ކުރުވުމުގެ ގާބިލުކަން ނެތުމުން،" ކަމަށް ގަތަރުގެ ބޮޑު ވަޒީރު ވިދާޅުވިއެވެ.